Ṯɔṯalɔ ṯǝthi Sǝbiṯ.
(Mɔrgus 2:23-28Luuga 6:1-5)1 Ki-lɔɔmɔr-la kila nǝ Yǝcu ele rɔrɔny-ri-na ki-laamin lǝni Sǝbiṯ mindaŋ nǝ yaaŋwɔ yee ṯalaamiiza ṯuuŋwun, nǝr aari ibṯǝḏi ethi undu gemeh-ya ethi daawi. 2 Laakin mǝsi Lifirriisiiyyiin ese ŋɔ, nǝr-ǝccǝŋw, “Iisati ṯalaamiiz ṯɔɔŋwa ṯotho ṯǝrrǝ ŋiɽaŋali ŋɔrtɔŋw ŋǝṯi-ŋi Sherii@a aarɔŋw ethisi ere ǝrri ki-laamin-la lǝthi? Sǝbiṯ mac.” 3 Nɔŋwsǝccǝŋw, “Ŋiti ŋimǝsi ɔrti mac ŋa ŋǝrrǝsi Ḏaawḏ kinaŋw niithi yaaŋwɔ, nǝ kila tok linaanir-li, 4 mɔŋgwɔ ǝnḏi ki-dɔɔnɔ kwǝthi Allah mindaŋ nɔŋw yee ethneya wirllicǝr Allah-lɔ ter, witi wir shere@i mac ethi yee nǝ kila tok linaanir-li, kaka nɔrɔ-ŋgwɔ wǝthi kahana dak? 5 Alla ŋiti ŋimǝsi ɔrti mac ki Sherii@a-na ǝṯi kahana ǝnḏi ki Heikal-na ki-laamin lǝthi Sǝbiṯ mindaŋ ǝṯir ki Sherii@a-na kwǝthi Sǝbiṯ, laakin ǝtireere oro kaṯṯi mac-a? 6 Nyii kwɔŋǝsi andaci, kwomne ŋgwɔ kwette kɔnɔŋw kwɔthǝmthi Heikala-la. 7 Eŋgisi elŋe ŋɔ ŋaarɔŋw, ‘Nyii kwɔnaŋna-ŋǝsi ethoro limɽi, ninyeere naŋni kiraama mac’, ǝŋgiseere ruusi kila lisaaw kaṯṯi mac. 8 Kaka nɔrgwɔ Tɔr ṯǝthi Kwizigwunǝŋ Kweeleny kwǝthi Sǝbiṯ.”
Kwɔr kwɔnḏathɔ ṯii.
(Mɔrgus 3:1-6Luuga 6:6-11)9 Nǝ Yǝcu ɔrlacci ǝzir wa ŋwɔḏoŋw nɔŋweele nɔŋw ǝnḏi ki-majma@-na kweeŋen. 10 Nǝ kwɔr naani kwette kinaŋw kwɔndathɔ ṯii. Nǝr uṯicǝlɔ nǝrǝccǝŋw, “Ŋir shere@i ethi sǝwi ki-laamin-la lǝthi Sǝbithǝ?” Mindaŋ ǝŋgir ruusi kaṯṯi. 11 Nɔŋwsǝccǝŋw, “Mǝ kweere daŋgal-na ǝthi kaaŋali, mindaŋ mɔŋw iidǝthi ki-ṯill-na ki-laamin-la lǝthi Sǝbiṯ, e-ta ŋweere alla mac-a? 12 Nǝ kwizigwunǝŋ kwuthǝmthi-pǝ kaaŋali-la pur-pur. Ŋwɔṯaŋw nǝr oro shere@i ethisi ǝrri ŋisaaw ki-laamin-la lǝthi Sǝbit” 13 E-ta nɔŋwɔccǝ kwɔɔrɔŋw, “Ǝlli ṯii-na.” Nǝ kwɔr alla ṯii-na, nɔŋw aaɽathi nɔŋworo kaka ṯithaathɔ. 14 Laakin Lifirriisiiyyiin-tǝ, nǝr ruu nǝreele nǝraaɽathi dɔŋw nǝrsi mɔmri-la ŋǝni ŋuuŋun ethi kiirasalɔ.
Khaḏaam kicca Allah-na.
15 Mǝsi Yǝcu liŋthathana ŋɔ nɔŋwsi ɔrlacci ŋwɔḏoŋw kinaŋw. Nǝr kwaathitha littǝzir, nɔŋwsi sǝwi kila tatap luumǝ, 16 mindaŋ nɔŋwsi inḏǝthǝ waamira etheere iṯithi ŋiɽaŋali-la ŋǝni ŋundu mac. 17 Ǝŋgir-mǝ rattathi ŋɔ ŋandinna kwiɽii-ŋgi kwǝni Isha@ya ŋaarɔŋw,
18 “Khaḏaam kiinyi kirṯa ŋgɔ, kiccanyina,
kamɽanyii, nǝ kaaminy-gina tok.
Nyii ɔɔsi Ṯigɽimǝ ṯiinyi duŋgwun-nǝ,
mindaŋ ŋwɔsi ruwǝcci Umama-lɔ ŋirllalɔ.
19 Ŋweere ɔppathalɔ kwizi-gi kweere mac,
wala ethi allasi lǝwǝlǝ leere,
wala ethi attasi kenyjera ki-raay-la.
20 Lɔvɔɔrɔ lɔgwɔdmana ŋweere agrithalɔ mac,
ŋweere iɽinyatha lombo linḏi ethi ai mac,
ŋwɔ kwɔrmɔṯanni mindaŋ a kila lirllalɔ ǝthi
ŋɔma ethi illazi kwomne kii tatap,
21 mindaŋ mǝ Umam tatap kittatha naanɔ-ŋgwɔ.”
Yǝcu nǝ Ba@l-zabuul.
(Mɔrgus 3:20-30Luuga 11:14-23)22 Nǝr mɔlca kwɔɔrɔ kwette kwǝthi ṯigɽimǝ-nǝ ṯigii, kwir kwunduŋ, kwanninna ṯiŋla-lɔ, mindaŋ nɔŋw sǝwi. Nǝ kwunduŋw kwanninna ṯiŋla-lɔ avri yǝynǝ, mindaŋ nɔŋw aami andasiŋw tok. 23 Nǝ lizi tatap linaanɔ kinaŋw liŋɽi, nǝraarɔŋw, “Kworo ŋarna Tɔr ṯǝthi Ḏaawḏ rac-a?” 24 Laakin mǝ Lifirriisiiyyiin neŋne ŋiɽaŋali ŋɔ nǝraarɔŋw, “Kwǝṯi allilla rigɽimǝ rigii, kaka nǝti-gwɔ kweeleny kweeŋen kwǝni Ba@l-zabuul inḏǝthǝ ŋunduŋw ŋɔma ethisi-ŋi ǝrri.” 25 Nǝsi Yǝcu liŋthatha ŋiɽaŋal-na bir ŋurtutunǝr-ŋinǝ, mindaŋ nɔŋwsǝccǝŋw, “Mǝ bǝlǝḏ kweere undǝnninǝ mindaŋ mǝr ṯɔgthathisi-na tǝ, ŋweere nannitha tɔttɔṯ kwokwony mac. Na mǝ mǝḏiinǝ kweere alla dɔɔnɔ kweere mɔŋw uṯǝnninǝ ethi ṯɔgthathisi-na, ŋweere nannatha kwokwony mac laakin ŋwernene. 26 Na mǝ Shiiṯaan ṯɔgthathisi-na Shiiṯaan-gi ŋwɔni kwɔmǝ-ṯǝ uṯǝnninǝŋw, e-ta ǝmǝ Ŋeeleny ŋuuŋun rilli aŋgwɔrɔ? 27 Ŋaaŋa laarɔŋw kwǝṯi allilla rigɽimǝ rigii kaka nǝti-gwɔ Ba@l-zabuul inḏǝthǝ ŋɔma ethisi ǝrri. E-ta ǝyǝ kwinḏǝthǝ lizi laalɔ ŋɔma ŋǝthisi-ŋi alla kithaay? Ŋwɔṯaŋw nǝrṯǝ oro ŋundu-ŋǝ lette-lette linḏi-ŋǝsi ethi ǝccǝ haakima ŋiɽaŋal-ŋi ŋaalɔ. 28 Laakin mǝnyii rutti rigɽimǝ rigii kithaay ŋɔma-ŋi ŋǝthi Ṯigɽim ṯǝthi Allah, ṯaŋw a Ŋeeleny ŋǝthi Allah ǝni ŋimǝ iila daŋgal-na. 29 Kwizi kwǝnḏi ki-dɔɔnɔ kwǝthi kwɔr kwɔfirlli aŋgwɔrɔ ethi kiṯatha ŋunduŋw, mɔŋweere kǝkki kwɔɔrɔ kerreny mac, e-ta ethi-mǝ urṯǝthǝ dɔɔnɔŋw kwuuŋwun.
30 “Mǝnyii-gi ere oro kweere kildɔŋw mac tǝ, kwundǝr-ṯǝ kwɔdirnathiny-lɔ, nǝ kweere kwiti kwǝnyii-gi luuvǝzi mac tǝ, kwunder-ṯǝ kwǝṯi fǝthǝlɔ. 31 Nǝ sǝbǝb-gi tǝ ŋgwɔ ŋǝsi ǝccǝŋw, lizi lǝrsi fivrici ŋikiyaŋi ŋeere nyithak, ya ŋiɽaŋali ŋeere nyithak ŋigii ŋǝṯirsi andasi; laakin kweere nyithak kwollo Ṯigɽimǝ Ṯirllinǝlɔ t er, ǝrseere fivrici ḏuṯ. 32 Kweere nyithak kwandisasa Ṯɔɔrɔ naana ṯǝthi Kwizigwunǝŋ ŋiɽaŋali ŋigii, ǝrsi fivrici; laakin kweere mɔŋw andisasa Ṯigṯimǝ naana Ṯirllinǝlɔ ter ŋiɽaŋali ŋigii, ǝrseere fivrici ḏuṯ, ki-ṯurmun-nǝ kɔthɔ alla ki-lɔɔmɔr-la kila linḏi ethiila.
Kwaaɽi-ŋa nyɔr-nyi nyuuŋwun.
(Luuga 6:43-45)33 “Ǝṯi aŋraci kwaaṯi ethi daɽimatha naana, mindaŋ ŋwɔmǝ riiɽi nyɔǝrǝ nyisaaw; mǝthi kwaaɽi kwiti kwɔdaɽimathir naana mac, ŋwɔ riiɽi nyɔɔrɔ nyigii. Kwaaɽi kwǝṯi elŋethine nyɔr-nyi nyuuŋwun.
34 “Ŋaaŋa lir nyɔr nyǝthi yimǝw, a lǝthi ŋɔma ethi andasi ŋiɽaŋali ŋisaaw-ŋisaaw aŋgwɔrɔ, ɔrŋa-ma lizi ligii? Kaka nǝti-gwɔ ṯuunyu andasi ŋiɽaŋali ŋa ŋuurǝnnǝ ṯɔgwori. 35 Ŋgwa kwisaaw ǝṯɔŋwsi-tǝ allisa ŋǝwinnǝ ki-ṯɔgwor-na ŋisaaw; nǝ ŋgwa kwigii, ǝṯɔŋwsi-tǝ allisa ŋa ŋǝwinnǝ ki-ṯɔgwor-na ŋigii.
36 “Ilŋithirsi ŋɔ rerrem, ethaarɔŋw, ŋeere nyithak ŋǝtisi kwizi ṯǝmsǝlɔ mirec-mirec, ǝrŋi mithici hɔkwɔma ki-laaminda lǝthi kwaathan-ŋwɔ. 37 Ŋiɽaŋal ŋɔɔŋa ŋir ŋinḏi-ŋǝ ethi suuɽi, ya ǝrŋǝ ǝccǝ haakima ŋiɽaŋal-ŋi ŋɔɔŋa.”
Lifirriisiiyyiin nɔṯɔrgwɔ-lɔ ŋilim-ŋi.
(Mɔrgus 8:11-12Luuga 11:29-32)38 E-ta nǝ mɔ@allimiin kwokwo kwǝthi Sherii@a nǝ Lifirriisiiyyiin tok, ǝccǝŋw, “Yaa mɔ@allim, nyiiŋǝ linaŋna etheese ŋilima ŋeere naaniŋa gwɔ.” 39 Nǝsi Yǝcu ǝŋnici nɔŋwsǝccǝŋw, “Lizi lǝthi lɔɔmɔr kɔlɔ lirmba ligii, nǝ liira ṯǝmminǝ-gǝ. Ŋaaŋa luṯucǝny-lɔ ŋilim-ŋiya? Bǝri-mǝ! Laakin ŋilim ŋǝthisi baaŋaci ŋaaŋwɔsi, nǝroro ŋǝthi kwiɽii kwǝni Yuunaan.
40 “Kaka-ṯǝ a-naanɔ-gwɔ Yuunaan kaari-na kǝthi kwɔm kwɔppa, ǝṯǝ Tɔr ṯǝthi Kwizigwunǝŋ naani ki-wurǝyu-nǝ lac, ŋwaamin ṯoɽol nǝ yulŋǝ ṯoɽol tok. 41 Ki Laamin-la lǝthi Hɔkwɔm, a lizi diiɽǝ lǝthi Niiniwǝ-ŋw, mindaŋ ǝrŋǝsi kette kaṯṯi, kaka mǝr-gwɔ urlǝ rɔgwor-lɔ kinaŋw nǝccǝsi Yuunaan bǝshirǝ, nǝ nyii kwɔŋǝsi andǝɔi ŋiɽaŋali ŋɔ kwomne ŋgwɔ kwette kɔnɔŋw kwuthǝmthi Yuunaan-ŋwɔla! 42 Mǝlika kwǝthi Januub-ŋwɔ kwɔdiiɽǝ ki Laamin-la lǝthi Hɔkwɔm, ŋwɔ kette ŋaaŋwɔsi katṯi, kaka ninḏi-ŋgwɔ bǝlǝḏ-ŋgi kwuuŋwun kwɔɔlɔna dɔddɔl ethi neŋne ṯa@liima ṯǝthi yǝnǝ, ṯǝthi mǝlik kwǝni Sulemaan; ṯaŋw ŋǝsi andaci rerrem, lwomne ŋgwɔ kwette kɔnɔŋw kwuthǝmthi Sulemaan-ŋwɔla!
Aaɽi kwǝthi ṯigɽim ṯigii kwizigwunǝŋ-nǝ.
(Luuga 11:24-26)43 “Mǝ ṯigɽim ṯeere ṯigii ruu kwizi-nǝ kweere, mindaŋ mɔŋweele tuk, ǝṯɔŋw iirǝrǝlɔ kǝzir wɔnḏalɔ ethi kaṯṯasi ǝzir wǝthi-gwɔ kaṯṯɔ Wǝŋ, mindaŋ mɔŋweere inḏa weere mac tǝ 44 ǝṯɔŋwaarɔŋw, ‘Nyii kwaaɽitha ki-yiŋna-na yiinyi kiya yuruhthiny-gwunǝ’. Mindaŋ mɔŋw aaɽi, ŋwɔ kaṯṯasi yiŋna yinaanɔ domony, yifirṯinǝlɔ tuc, yidaɽiminnalɔ dar. 45 Ṯaŋw, ŋwaaɽi pɔdɔk mindaŋ ŋwɔ mɔlthanna rigɽimǝ dɔvokwɔɽony rigii beṯten ethi duŋgwun-lǝ. Ǝriila ǝrnanni kinaŋw. Mindaŋ mǝr raiiathi ŋɔ tatap, a kwizi ŋgwa kiyathalɔ cil-cil ethi kerreny-ŋwɔla. Ŋindǝr ṯǝ ŋinḏi ethi ǝrrinici lizi ligii rɔgwori lǝthi lɔɔmɔr kɔlɔ.”
Lǝnyin kwǝthi Yǝcu-ŋǝ liyeŋgen-li.
(Mɔrgus 3:31-35Luuga 8:19-21)46 Nǝ kinaŋw nandica-ŋwtǝ kinnǝni lizi, nǝ lǝnyin-ŋǝ iila liyeŋgen-li nǝr rilli parŋgila, nǝr naŋni ŋunduŋw ethi-li andasi. 47 Nǝ kwette kwɔnaanɔ kinaŋw andṯṯci nɔŋwɔccǝŋw, “Laanyalɔ-ŋǝ liyaŋgalɔ-li kilala par linaŋna-ŋa ethi-li andasi.” 48 Nǝ Yǝcu ǝŋnici nɔŋwɔccǝŋw, “Lǝnyǝri kwundǝr kwǝndu? Nǝ liyǝŋgǝri lindǝr lǝndu?” 49 Ŋwɔṯaŋw nɔŋw kittasi ṯii ṯalaamiiza ṯuuŋwun naana, nɔŋwaarɔŋw, “Lindǝr-ṯǝ kɔlɔ lir lǝnyǝr-ŋǝ nǝ liyǝŋgǝri tok! 50 Kaka mǝ kwette nyithak ǝrri ŋiɽaŋali ṯɔgwor-thi ṯǝthi Papa kwiinyi kwǝṯi nanni ki-leere-na, kwundǝr-ṯǝ kwir ǝŋgǝri, nǝ ǝŋgǝri kwir kwaaw, nǝ lǝnyǝri tok.”