1 Nyii kwǝni Yahuuthǝ, kwir khaḏaam kǝthi Yǝcu Kwɔrɔstɔ, nǝ kwir eŋgen kwǝthi Ya@guub-ŋǝ. Nyii kwɔlɔcca-ŋǝsi kila lɔrnɔṯɔsi Allah, kila linannɔ ki-ṯamɽa-na ṯǝthi Allah wir Papa, kila linannɔ ki-ṯaŋrica-na ṯǝthi Yǝcu Kwɔrɔstɔ.
2 Ethi ŋimɽi-ŋǝ ŋiiɽǝnnǝ-ŋi nǝ ṯamɽa ṯir min-min kikindǝthici ŋaaŋwɔsi.
Mɔ@allimiin kwir lǝluŋw.
3 Limǝthigǝri liinyi lamɽa-nyji, nyii kwǝthi sɔɔrɔma beṯṯen ethi lɔcca ŋaaŋwɔsi ŋiglǝthǝ ŋa ŋɔɽɔmaṯṯir-gwɔ-na, mǝnyii iccini ŋiɽaŋal-ŋi ŋir ḏɔrɔɔri nǝŋǝsi lɔcca tɔc, ethi firlli ŋaaŋwɔsi naana, ethi rocce ṯǝmminǝ kitha ṯinḏǝthǝ Allah lizi luuŋwun lirllinǝlɔ ter. 4 Kaka mǝgwɔ lizi lokwo liira Allah-na ǝnḏǝ dǝŋgǝr-nǝ nyettec, lǝṯi urlulli ŋiɽaŋal-lɔ ŋǝthi ne@ma kwǝthi Allah wǝri, ethisi ruusi ŋiɽaŋal ŋigii, lir lizi kila lǝṯi derne Yǝcu Kwɔrɔstɔ-ŋw, kwir Sǝyyiḏ kwǝri kwɔtɔpɔt kwir Kweeleny. Kerreny tuk nǝ Kiṯaab Kirllinǝlɔ ter andasi ŋiɽaŋali ŋir ŋiɽiiya ŋǝthi hɔkwɔm wa wɔmǝr aavi.
5 Nilŋithi-ŋǝsi-vǝ kinnǝni ŋɔ rac tatap kerreny tuk, nǝnyii-tǝ ǝthi sɔɔrɔma ethi kithǝyini ŋaaŋwɔsi ŋiɽaŋali ŋǝthi Kweeleny ŋiglǝthǝŋw-ŋi lizi lǝthi Israa-iil ki Mɔsir-na, laakin kwaathan kwokwo tǝ, nɔŋwsi kiirasalɔ kila liti lǝthi ṯǝmminǝ mac. 6 Kithaayinar limeleka kila lidirna ethi naani kǝzir-nǝ wǝthi ŋɔsɔlṯa ŋeeŋen, laakin nǝr ɔrlacca ǝzir-lɔ weeŋen ŋwɔdoŋw wa wɔnaanir-gwɔ-na. Nǝr kǝkkini ŋwɔɽɔŋw-ŋi ŋwɔṯi nannitha kirim-nǝ dok-dok kuṯṯǝlɔ, kǝzir wɔgittasi-gwɔ Allah lǝkkicǝ Laaminɔ lɔppa kizǝn, kila linḏirsi-li ethisi ǝccǝ haakima. 7 Kithaayinar Saḏɔɔm-ŋwɔsi @amɔɔra-gi, nǝ muḏun-ŋgwa kwirikathisi-lɔ kwǝthi lizi kila lǝrrǝ-si kaka limeleka, nǝr borgwonyne naana beṯṯen kadɔwa-gi kir ŋiijin kǝthi aŋna, mindaŋ nǝr kaṯṯasi jiizǝ kwǝthi iigǝ wǝṯi nannitha dok-dok, jiizǝ kwǝni ṯiirǝcǝ ṯir-lɔ por-por ṯeeŋen tatap.
8 Nǝrṯoroŋw tok, nǝ lizi kɔlɔ ǝthi riŋlitha rǝṯisi duŋgwǝci ethi ǝrrizǝsǝ yaŋna yeeŋen ŋikiyaŋi naana; ǝṯir ruusi sɔlṯa-lɔŋw kwǝthi Allah, mindaŋ ǝṯir ollollo ŋinithi ŋǝthi limeleka lǝthi ki-leere-nɔŋw. 9 Nǝ nǝsi meleka kwir rǝ-iis kwǝni Miikhaa-iil ere ǝrri ŋɔ mac, kinaŋw mǝr urrǝthi Ibliis-yi, niŋaŋlathir-gwɔ kaŋna-la wǝthi Muusǝ ǝyǝ kwɔrɔ kwǝŋgi aavi, nǝ Miikhaa-iil ere bonye ethi kette Ibliisǝ kaṯṯi mac ŋiɽaŋal-ŋi ŋeere ŋir yɔvɔɔlɔ, laakin nɔŋwɔccǝŋw, “Ethi-ŋǝ Kweeleny ǝrmici”. 10 Laakin lizi kɔlɔ tǝ ǝṯir andisasa kwomne naana tatap ŋiɽaŋali ŋigii-ŋigii, ŋgwa kwiti kwilŋithir mac, nǝ ŋa ŋǝṯirsi elŋeṯṯe-na kaka ŋǝṯisi-ṯǝ haywaanaaṯ elŋeṯṯe-na ṯobii@a-thi, nǝrṯoro ŋɔ ŋette-ŋette ŋǝṯisi kiirasalɔ. 11 Ǝnnǝ ṯurvǝ ṯeeŋǝn ṯir-mi! Kaka mǝr-gwɔ kwakithatha ṯaay ṯǝthi Gaayiin. Ŋiɽaŋal-ŋi rǝthi gwuruush nǝr inḏǝthǝ rogɽo reeŋen ṯɔɔthɔŋw kwǝthi Bal@aam kwɔthɔɔthɔ-ŋgi. Nǝr diiɽi ŋǝryǝ-ŋi, kaka ŋǝrrǝsi Guureh mindaŋ nǝr kiirathalɔ tok kaka ŋunduŋw. 12 Laaɽinna lɔrdɔwa lir fǝthiyǝ ki-yǝzuumǝ-nǝ yaalɔ yǝṯisi amɽi yǝthi ŋiyaŋga. Nǝṯirsi-gwɔ kettice yǝy ŋǝthi rogɽo reeŋen dak. Lǝni laaɽinna rweblethi ŋwɔṯisi kɔrɔn iili, ŋwiira kawwa-na. Nǝr aaɽanni yaaɽi yiti yǝṯi riiɽi nyɔɔrɔ mac kaw-gi. Lir kaka yaaɽi kiya yimǝrsi allathalɔ rɔvɔɔ-ri-na, mindaŋ nǝr ayitha keereny-gi tɔc. 13 Nǝri aaɽanni ŋaaw ŋǝthi bahar ŋǝṯi ɔppɔpɔthina nǝṯir-gwɔ kagiṯṯa kitho kǝthi fǝthiyǝ kweeŋen. Nǝr aaɽanni rɔɔrɔmi rǝṯi tiilǝli-lǝ, kira rigitticasi Allah ǝzir-lɔ weeŋen wɔnannathi lur kirim-nǝ lac-lac.
14 Ŋindǝr-ṯǝ ŋɔ mindaŋ nǝ Akh-nuukh kwɔkwaathathi Aḏam-ŋwɔ kwir kwugwurnǝ, kwir nimrǝ dɔvokwɔɽony, nɔŋwsi andasi ŋiɽiiya-ŋi kerreny tuk, ŋǝni ŋeeŋen nɔŋwaarɔŋw, “Kweeleny kwinḏi ethiila limeleka-li luuŋwun lir aalaaf lirllinǝlɔ ter, 15 ethisi ǝvicǝ tatap hɔkwɔma, nǝ ethisi kette tatap kaṯṯi ŋiɽaŋal-ŋi ŋeeŋen ŋigii ŋiti ŋir ŋǝthi Allah mac, nǝ ŋiɽaŋal-ŋi ŋa tatap ŋifirlli-ŋifirlli ŋǝṯisi kila ligii liira Allah-na andisasa ŋunduŋw naana!” 16 Nǝṯǝ lizi oro kɔlɔ lǝṯi ǝrmiṯhǝthǝnǝ nyaamin tatap, nǝ ǝṯirsi kette lithaathɔ kaṯṯi; lǝṯi kwakithatha sɔɔrɔmalɔ kweeŋen kwigii; ǝṯir iiɽi rogɽo-na reeŋen, ǝṯir ɔrtatha lizi naana ŋidiny ŋiɽaŋal-ŋi ŋaami-ŋaami ethi ǝginici rogɽo reeŋen kwomne kweere.
Ṯuuluca ṯǝthi kila linḏi ethi ɔrti.
17 Laakin laazim ǝsi kithaayini ŋɔ liyǝŋgǝri liinyi lǝṯi-nyji amɽi ŋa ŋandica-ŋǝsi kerreny tuk yaavɔr yǝthi Kweeleny kwǝri kwǝni Yǝcu Kwɔrɔstɔ. 18 Nǝrŋǝsi ǝccǝŋw, “Mǝ ŋwaamin ŋwɔthi kwaathan-ŋwɔ iila tǝ, a lizi ruwǝnnǝlɔ linḏi-ŋǝsi ethi ǝrri kathri, lir lizi lǝṯi kwakithatha sɔɔrɔmalɔ kweeŋen kwiti kwir kwǝthi Allah mac.” 19 Lindǝr-ṯǝ kɔlɔ lir lizi lǝṯi aava ṯundǝnnǝnǝ, lǝṯisi kadɔwa keeŋen kǝthi ṯurmun-nǝ kǝkki, liti lǝthi Ṯigɽimǝ-nǝ mac. 20 Laakin ŋaaŋa tǝ liyǝŋgǝri liinyi lǝṯi-nyji amɽi aarir kǝniny isṯimir laccica rɔgɽɔ raalɔ ṯǝmmine-thi ṯaalɔ ṯirllinǝlɔ ter beṯṯen. Ǝṯaari kiyiiriny ŋɔma-ŋi ŋǝthi Ṯigɽim Ṯirllinǝlɔ ter, 21 naanir ki-ṯamɽa-na ṯǝthi Allah, lǝkkicǝ ŋimɽiyǝ kizǝn ŋǝthi Kweeleny kwǝri kwǝni Yǝcu Kwɔrɔstɔ eṯhi inḏǝthǝ ŋaaŋwɔsi ŋimiithǝ ŋǝṯi nannitha dok-dok. 22 Rɔɔthɔr limɽi ki-lizi kila lir rɔgwor-na riɽǝ-riɽǝn ki-ṯǝmminǝ; 23 kilǝthǝrsi lithaathɔ, ethisi alla kiigǝ-nǝ; nǝ lithaathɔ ǝsi baaŋaci ŋimɽiyǝ ṯiiɽǝ-thi-nǝ, laakin a wǝzi yirethi yeeŋen yǝṯi ruuŋwi naana sɔɔrɔm-gi kweeŋen kwigii.
Ṯaara kiyiiriny ṯǝthi ṯiniyǝnǝ.
24 Ethi Allah wǝthi ŋɔma ethi aŋraci ŋaaŋwɔsi, mindaŋ etheere iidi mac, nǝ ethi mɔltha ŋaaŋwɔsi liira lɔɔma-na, linyiŋlana kiyǝnǝ yǝthi ŋinith ŋuuŋun, 25 ethi ŋinith nanni naanɔ-gwɔ Allah wɔtɔpɔt wir Kwiglǝthǝ kwǝri, Yǝcu Kwɔrɔstɔ-ŋgi kwir Kweeleny kwǝri, ethɔŋw ɔrtanni ŋinith-ŋi, ŋeeleny-ŋi nǝ sɔlṯa-gi tok, kiyithlǝ tatap yimǝ ṯamthɔṯṯɔ, nǝ yǝthi kirem-ŋwɔ mindaŋ nǝ yinḏi ethi nannitha dok-dok! Amiin.