Yǝcu mɔŋgwɔ sǝwi kwɔɔrɔ kwilŋithir ŋunduŋ-ŋǝnǝ.
1 Nǝ kinaŋw niirǝri Yǝcu-lɔ, nɔŋw ese kwɔɔrɔ kwette kwilŋithir ŋunduŋ-ŋǝŋǝ. 2 Nǝ ṯalaamiiz ṯuuŋwun uṯicǝlɔ nǝrǝccǝŋw, “Yaa Mɔ@allim, ǝyǝ kwǝrrǝ ŋikiyaŋi, kwɔr kwɔrɔ ŋgwii alla ṯǝrnyin-ŋǝ lǝnyin-gi, mindaŋ nɔŋw-mǝ ilŋinna kwir kwunduŋ?” 3 Nǝsi Yǝcu ǝŋnici nɔŋwsǝccǝŋw, “Kwɔr kwiti kwɔrɔ-ŋgwɔ kwǝrrǝ ŋikiyaŋi mac, wala ṯǝrnyin-ŋǝ, laakin ethi kǝniny ŋothɽor ŋǝthi ŋɔma ŋǝthi Allah ruwǝnnǝlɔ ŋunduŋw-ŋgi. 4 Kaka nɔrgwɔ tǝ kinnǝ kaaŋwɔn-na, laazim ǝri akkɔ ŋothɽor ŋǝthi ŋgwa kwɔɔsa-nyii, mǝ kilkalu oro tǝ ǝṯi kwizi ere ǝthi ŋɔma mac ethi akkɔ ŋothɽor. 5 A-naaniny-tǝ kinnǝ ki-ṯurmun-nǝ, nǝnytoro fɔɔri kwǝthi ṯurmun.” 6 Mɔŋwsi andasi ŋɔ, nɔŋw ɔnyathalɔ kwurǝyu-lu, mindaŋ nɔŋw lagizi ŋwony-na wurǝyu-yi nɔŋwsi mǝsici kwɔɔrɔ ki-yǝy-nǝ, 7 nɔŋwɔccǝŋw, “Nḏi, a ɔna kii ki-ṯill-la ṯǝthi Salwaam-ŋwɔ” (ṯǝniŋw ŋgwa kwǝṯir ɔɔsi). E-ta nɔŋweele nɔŋw ɔna mindaŋ nɔŋw aaɽa kwɔmǝ iisithi. 8 Nǝ jiiraan-ŋǝ lizi-li lithaathɔ lǝṯeese ŋunduŋw naṯɔ-ŋgwɔ kigittasi yerge-la aarɔŋw, “Kwɔr kwiti kwundǝr-ŋgwɔ kwǝṯi naanalɔ ǝṯɔŋw kigittasi yerge-la mac-a?”
9 Nǝraari lokwoŋw, “Kwundǝr-ṯǝ rac”, nǝ lithaathɔ aarɔŋw, “Bǝri-mǝ, laakin ŋgwɔ kwaaɽinna ŋunduŋw.” Nǝ kwɔr aarɔŋw, “Nyii kwirma-ṯǝ ŋgwǝ rac.” 10 Nǝrǝccǝŋw, “E-ta ycy yɔɔŋwa yimǝthi kiṯṯini aŋgwɔrɔ?” 11 Nɔŋwsi vccǝŋw, “Kwɔr-ŋgwa kwɔni Yǝcu kwundǝr kwɔlagza wurǝyuŋi-nǝ nɔŋw mǝsici nyuŋw ki-yǝy-nǝ nɔŋwɔccǝ nyuŋwɔŋw, ‘Nḏi Salwaam agwɔ ɔnǝ’; ṯaŋw ninyeele, nǝnyii ɔna mindaŋ nǝnyii avri yǝy-nǝ.” 12 Nǝrǝccǝŋw, “Nǝ kwende?” Nɔŋwsǝccǝŋw, “Kwende kwilŋica-nyii ǝzir.”
Lifirriisiiyyiin-ŋǝ kwɔr-ŋǝli ŋgwa kwɔmǝ avri yǝy-nǝ.
13 E-ta nǝr mɔlca Lifirriisiiyyiina kwɔɔrɔ-ŋgwa kwir kwunduŋ kerreny. 14 Nǝ laamin oro lǝthi Sǝbiṯ lilagza-li Yǝcu wurǝyuŋi-nǝ mindaŋ nɔŋw kiṯṯici kwɔɔrɔ yǝy. 15 Nǝ Lifirriisiiyyiin uṯicǝlɔ kwokwony ŋiɽaŋal-ŋi ŋimǝŋw-ŋi avri yǝy-nǝ. E-ta nɔŋwsǝccǝŋw, “Kwǝnyjiccǝ-nyii wirǝyuŋi ki-yǝy-nǝ, mindaŋ nǝnyii ɔna, e-ta nǝnyii ese ǝzir.” 16 Nǝ Lifirriisiiyyiin lokwo aarɔŋw, “Kwɔr-ŋgwɔ kwǝthi Allah kwiti kwɔrɔ ḏuṯ, kaka ǝṯɔŋgweere aŋraci Sǝbithǝ mac.” Laakin nǝ lithaathɔ aarɔŋw, “Kwizi kwigii ṯɔgwori kwǝthi ŋɔna ethi ǝrri ŋilimǝ ŋir kaka ŋɔ aŋgwɔrɔ?” Nǝrṯoroŋw mindaŋ nǝr uɽǝnninǝ.
17 E-ta nǝr uṯici kwɔɔrɔ-lɔ kwokwony nǝrǝccǝŋw, “Nǝ kwaari-ŋa-gi ŋa tha, kaka mɔŋgwɔ ǝllici ŋaaŋwɔ yǝy-nǝ?” Nɔŋwsǝccǝŋw, “Kwiɽii kwirpa.”
18 Nǝ Yǝhuuḏ ere ǝmmini mac ethaarɔŋw kwir kwunduŋ kerreny, mindaŋ kwɔmǝ alla yǝy-nǝ. Ŋwɔṯaŋw nǝr ɔrnɔṯa ṯǝrnyin-ŋwɔsi lǝnyin-gi lǝthi kwɔr-ŋa ŋgwa kwɔmǝ alla yǝy-nǝ, 19 nǝrsi uṯicǝlɔ nǝrsǝccǝŋw, “Tɔr taalɔ tirṯa kɔrɔ taariŋariŋw tilŋithi-nyii ŋunduŋ-ŋǝnǝ? Nǝ timǝthi ese ǝzir aŋgwɔrɔ?” 20 Nǝsi ṯǝrnyin-ŋǝ ǝŋnici nǝrsǝccǝŋw, “Nyiiŋǝ lilŋithi rac ethaarɔŋw tɔr tǝri ṯir kɔrɔ, nǝ tilŋinna ŋunduŋ-ŋǝnǝ; 21 laakin kwɔmǝ ese ǝzir kirem aŋgwɔrɔ tǝ, ŋiti ŋilŋithi-nyji mac, wala ethi elŋe ǝyǝ kwɔrɔ kwɔmǝ ǝllici yǝy-nǝ. Uṯicǝr-mbǝlɔ kwirpa ŋgwɔ kwɔmoro kwɔr, ethi ǝŋnici ŋaaŋwɔsi rogɽo-ri ruuŋwun.” 22 Ŋandisasi ṯǝrnyin-ŋǝ ŋɔ, kaka nithiinyar-gwɔ Yahuuḏǝ, kaka mǝr-gwɔ kette ŋiɽaŋali ṯuunyu tɔtɔpɔt, nǝraarɔŋw mǝ kweere aarɔŋw Yǝcu kwir Kwɔrɔstɔ, ǝri rutti kithaay ki-majma@-na. 23 Ŋwɔṯaŋw nǝmǝ ṯǝrnyin-ŋǝ aarɔŋw, “Kwɔmoro kwɔr, uṯicǝrlɔ.”
24 Nǝr ɔrnɔṯa kwɔɔrɔ kwir kwunduŋ kwokwony nǝrǝccǝŋw, “Aari haalifa Allah-yi ethi andasi rerrem; nyiiŋǝ lilŋiṯhi rac ethaarɔŋw kwɔr ŋgwɔ kwusǝwǝ-ŋǝ kwǝni kwigii ṯɔgwori.” 25 Nɔŋwsi ǝŋnici nɔŋwsǝccǝŋw, “Kwende kwilŋica-nyii-pa ethaarɔŋw kwigii ṯɔgwori alla bǝri, ŋilŋithi-nyji ŋɔtɔpɔt, ŋǝni-ŋwɔ, kerreny ninyoro kwunduŋ, nǝ kire-kirem-ŋgwɔ tǝ, nyi-mǝ ese ǝzir.” 26 Nǝrǝccǝŋw, “Aatha kwǝrricǝŋw ŋaaŋwɔ? Kwǝllicǝ-ŋǝ yǝy-nǝ aŋgwɔrɔ?” 27 Nɔŋwsi ǝŋnici nɔŋwsǝccǝŋw, “Nyii kwɔmǝ-ŋǝsi andaci rac kerreny tuk, nǝ neere naŋni ethi kette yǝni mac nǝ ŋotho ŋinaŋna-ŋǝsi ethisi neŋne kwokwony? Ŋaaŋa linaŋna ethoro ṯalaamiiz ṯuuŋwun tok-a?” 28 Nǝr ollo nǝrǝccǝŋw, “Ŋa kwɔrɔ kwir ṯilmiiz ṯuuŋwun, laakin nyiiŋǝ-tǝ, ninyoro ṯalaamiiz ṯǝthi Muusǝ. 29 Nyiiŋǝ lilŋithi rac ethaarɔŋw Allah wir wandica Muusǝ-ŋwɔ, laakin nǝ kwizi-ŋgwɔ tǝ, ninyeere elŋece ǝzir winḏiŋw-yi mac.” 30 Nǝsi kwɔr ǝŋnici nɔŋwsǝccǝŋw, “Ŋiɽaŋal ŋɔ ŋir @ajiib, neere elŋece ǝzir winḏiŋw-yi mac, laakin tǝ nɔŋw tǝ ǝllici nyuŋwɔ yǝy-nǝ. 31 A kwilŋithir-pǝ rac ethaarɔŋw Allah witi wǝṯi niŋnaci lizi ligii rɔgwori mac, laakin mɔŋw kwogwɔcce kweere Allah-lɔ mindaŋ mɔŋw-sǝrrici ŋǝthi ṯɔgwor ṯuuŋwun, ǝṯi Allah niŋnaci ŋunduŋw. 32 A kittina-gwɔ ṯurmun-lɔ tuk kwon-kwon nǝreere niŋnaci kweere ḏuṯ kwɔmǝ ǝllici kweere yǝy-nǝ kwilŋithir ŋunduŋ-ŋǝnǝ. 33 Ǝŋgi kwɔr-ŋgwɔ ere oro kwǝthi Allah mac, ǝŋgiŋweere ǝthi ŋɔma ethisǝrri ŋeere ḏuṯ” 34 Nǝr ǝŋnici nǝrǝccǝŋw, “Lilŋithiŋǝ-mǝ ŋikiyaŋi-na min-min, e-ta nyjǝccǝ ŋa @allima.” Ŋwɔṯaŋw nǝr rutti kithaay ki-majma@-na.
Ṯiriimǝ-gii ki-ŋiɽaŋal-na ŋǝthi Allah.
35 Mǝ Yǝcu neŋne ethaarɔŋw kwɔmǝri rutti kithaay, mindaŋ mɔŋw kaṯṯasi nɔŋw uṯicǝlɔ nɔŋwɔccǝŋw, “A kwǝmminicǝ Tɔɔrɔ tǝthi Kwizigwunǝŋǝ?” 36 Nɔŋwɔŋnici nɔŋwɔccǝŋw, “Yaa Sǝyyiḏ andicany-ṯi tindǝr tǝndu mindaŋ ethimǝ ǝmminici?” 37 Nǝ Yǝcu ǝŋnici nɔŋwɔccǝŋw, “Timǝ ese rac, nǝ tindǝr-ṯǝ kira tandica-ŋa.” 38 Nɔŋwɔccǝŋw, “Kweeleny nyii kwǝmminǝ.” E-ta nɔŋw kwocce ŋunduŋw-lɔ. 39 Nǝ Yǝcu aarɔŋw, “Nyii kwinḏi ki-ṯurmun-nǝ kɔthɔ ethaari haakima mindaŋ mǝ kila liti lǝṯi iisithi mac ǝri iisithi, nǝ kila lǝṯi iisithi ǝroro lunduŋw.” 40 Nǝ Lifirriisiiyyiin lokwo linanyja keṯṯok, mǝrsi neŋne ŋɔ, nǝrǝccǝŋw, “Nyiiŋǝ lir lunduŋw nyiiŋǝ tok-a?” 41 Nǝsi Yǝcu ǝccǝŋw, “Ǝŋgoro lunduŋw, ǝŋgeere oro kǝṯṯi mac; laakin ŋaaŋǝ kɔlɔ limaari-ŋwa, ‘Nyiiŋǝ lǝṯi iisithi’, ŋwɔṯaŋw ǝŋǝsi kaṯṯi kaalɔ dirnaṯṯi naana.