Bɔɔlɔs ninḏi-ŋgwɔ etheele Rɔɔma mɔrkǝb-gi.
1 Nǝ kinaŋw mǝ ŋiɽaŋal oro ṯuunyu tɔtɔpɔt etheele nyiiŋǝ mɔrkǝb-gi Liiṯaaliya, nǝr inḏǝthǝ Bɔɔlɔs-ŋwɔsi misaajiin-gi kwɔthaathɔ ḏoobitha ṯǝni Yuulyuus, ṯǝthi jesh kwir Rɔɔmaani, kwanyjiccǝr yiriny yǝni, “Jesh kwǝthi Imbraaṯɔɔr.” 2 Nǝnyii dallɔ ki-mɔrkǝb-lɔ kǝzir wǝni Anḏraamiiṯ, kwɔgittathɔ etheele ki-muḏun kwɔnaanɔ ŋwɔthɔṯɔma kiyǝni ŋwɔthi muḏiiriiyyǝ kwǝthi Aasiiyya-ŋw. Nǝ Arasṯarkhus kwǝthi Mǝkḏuuniiyyǝ-ŋw naani nyii-ŋǝli kwɔnannɔ Ṯasaaluuniiki. 3 Mǝ ŋɔrpɔ-ŋgwa oro tǝ, nǝnyii ɔppathi Sayḏa. Nǝ Yuulyuus ǝthici Bɔɔlɔs-ŋwa ŋimiɽiyǝ-nǝ, mindaŋ nɔŋw duŋgwǝci etheele ethi iisa limethgen, mindaŋ ethi inḏǝthǝ kwomne kweere kwiiraca. 4 Nǝnyii ṯamthɔ kinaŋw ninyeele, nǝ kaka a kwɔɔmathi-nyji-gwɔ kɔrɔn-na, ninyeele lǝɽinyinǝ jǝziiŋǝ-gi kwǝthi Gɔbrɔs-ŋwɔ. 5 Nǝnyii uɽǝthǝ bahara-na kǝzir wǝni Kiiliikiiyyǝ, nǝ Bamfiiliiyyǝ, nǝnyii ɔppatha Miira kwɔnaanɔ Liikiiyyǝ. 6 Nǝ ḏoobiṯ kaṯṯasi mɔrkǝbǝ kwette kinaŋw kwinḏi Iskanḏǝriiyyǝ-ŋgi, kwinḏi etheele Iyṯaaliya, mindaŋ nɔŋgwɔ allasi nyuŋwsi-lǝ 7 Ninyeele ŋaaw-la mammak ŋwaamin ŋwittǝzir libii ṯurvǝ biɽǝ-biɽeṯ, mindaŋ nǝnyii ɔppatha kimaara ki-mǝḏiinǝ kwǝni Kaniiḏus. Nǝnyji kɔrɔn ere duŋgwǝci mac ethi dɔŋgwatha-lɔ kwokwony ǝzir-yi wiilathiny-gwɔ, mindaŋ ninyeele lǝɽinyinǝ ṯuɽumǝ-thi ṯǝthi jǝziirǝ kwǝthi Kiriiṯ-ŋwɔ, lidaarica mǝḏiinǝ kwǝni Salmuunǝ. 8 Nǝnyii daari nḏɔṯɔm-li linḏa ṯurvǝ tɔppa biɽe-biɽeṯ mindaŋ nǝnyii ɔppatha kǝzir wǝni “Mawaani Kwisaaw” kwɔnaanica mǝḏiinǝ keṯṯok kwǝni Lisaa-iiyya.
9 Nǝnyii naani ŋwɔɔmɔri ŋwuuru kinanaŋw, mindaŋ nǝ ŋiɽaŋal oro khaṯar ethi aari isṯimir safar-gi, kaka mǝgwɔ laamin ṯamthɔ lǝni arminḏaan. Mindaŋ nǝsi Bɔɔlɔs icci ŋejmethi nɔŋwsǝccǝŋw, 10 “Lɔr laalɔ, nyii ŋgwɔ kwɔmeese safara kwǝri kwɔmoro khaṯar kɔnɔŋw tuk, nǝ kiirannalɔ kwinḏi ethi anḏi kwɔppa kwǝthi bɔḏaa@a, mɔrkǝb nǝ nyiiŋǝ tok ǝri kiirasi ŋimiitha-lɔ.” 11 Laakin nǝ ḏoobiṯ ǝmmini ŋiɽaŋali ŋandisasi kapṯin-ŋǝ kwɔr-gi kwǝthi mɔrkǝbǝ, nɔŋwseere kettice yǝy ŋa ŋandisasi Bɔɔlɔs mac. 12 Na miina ere ɔvthɔnni mac ethi-ŋwɔ nanni kinaŋw koo-ŋi; minḏaŋ nǝ luuru ǝmmini etheele bahar-gina mindaŋ aŋgiroro mǝmkin ethi ɔppathi Fiiniks mindaŋ ǝŋgir naani kinanaŋw koo-gi. Nǝ Fiiniks oro miinǝ kwǝthi Kiriiṯ-ŋwɔ kwɔnaanɔ jǝnuub gharbi, nǝ shamaal gharbi tok.
Kɔrɔn kɔppa ki-bahar-na.
13 Nǝ kɔrɔn aari ibṯǝḏi ethi ɔva jǝnuub-ŋgi kinḏǝlɔ mammak, mindaŋ nǝ lɔr aarɔŋw nyiiŋǝ limǝ kaṯṯasi karatha kǝri, mindaŋ nǝr alla marfa@iinǝ kithaay, e-ta nǝrmǝ iiḏǝthǝ kithaay nereele, linḏi nḏɔṯɔm-li lǝthi Kiriiṯ-ŋwɔ. 14 Laakin nǝ kɔrɔn ɔvanna-ṯǝ kinaŋw-lɔ ṯogdo-togdo kɔppa kǝni shamaal shergi, nɔŋw ɔppɔthina ŋɔmmaŋi-ŋɔmmaŋi jǝziirǝ-ŋgi. 15 Nɔŋw opɔppe mɔrkǝbǝ, nǝ kaka niti nɔrɔr-gwɔ mǝmkin mac ethi mɔrkǝb kwɔɔmathɔ kɔrɔn-na, nǝnyii aalaci kɔrɔni rii ethiili. 16 Nǝnyii ǝɽinyini kwokwo kinaŋw mǝnyiila nḏɔṯɔm-li lǝthi jǝziirǝ kwette kwokwɔɽony kwɔnaanathi jǝnuub-ŋgi kwǝni Kalɔɔḏǝ. Nǝnyii kaṯṯasi ṯurvǝ ṯokwo kinanaŋw, laakin nǝnyǝthi ŋɔma ethi kilǝthi timɔrkǝbǝ tokwɔɽony. 17 Mindaŋ mǝr allasi ki-mɔrkǝb-nǝ nǝr ippǝsi mɔrkǝbǝ ŋwar naana. Nǝr ṯeenye ethi mɔrkǝb ove ramla rǝṯiila ŋwɔthɔṯɔm-ŋi ŋwɔthi Liibiiyǝ-ŋwɔ, mindaŋ nǝr dsappasi yirethi-lɔ yǝṯi iili mɔrkǝbǝ, mindaŋ nǝr duŋgwǝci ethi kɔrɔn iili wɔɽeny. 18 Nǝtǝ kɔrɔn kɔppak aari isṯimir ethi ɔppa-lɔ, mindaŋ mǝ ŋɔrpɔ-ŋgwa oro, nǝraari ibṯǝḏi ethi kagiṯṯɔ bɔḏaa@ kwokwo ŋaaw-na, 19 nǝ ki-laamin lithaathɔ, nǝr kagiṯṯɔ kwomne kwokwo kwǝthi mɔrkǝb ki-bahar-na. 20 Nǝnyii naani ŋwaamin ŋwuuru liti liisa aaŋwɔna wala rɔɔrɔm mac, nǝtǝ kɔrɔn kɔppa aari isṯimir ethi ɔppa-lɔ tig-tig. Mindaŋ ninyeere kittatha kwokwony mac ethaarɔŋw nyiiŋǝ linaani limiithɔ.
21 Mǝ lɔr nɔani ŋwaamin ŋwittǝzir yaaŋwɔ-yi, mindaŋ nǝ Bɔɔlɔs diiɽi nɔŋwsǝccǝŋw, “Lɔr laalɔ, ŋɔvthanna ǝŋgir-nyii niŋnaca mindaŋ ǝŋgireere diiiɽǝ mɔrkǝb-gi min Kiriiṯ mac; mindaŋ ǝŋgireere ṯuusi, wala ethi kiirasi kwomne-lɔ kweere tok mac. 22 Laakin kire-kirem-ŋgwɔ tǝ, ŋǝsi tuurǝccǝlɔ etheere ṯeenye mac! Kwiti kweere daŋgal-na mac kwɔgiirasi ŋimiitha-lɔ ŋuuŋun, mɔrkǝb kwir-ṯa dak kwinḏi ethi kiirannalɔ. 23 Kaka ninḏi-gwɔ meleka naaniny-gwɔ kilgin kilkǝlu, kwǝthi Allah wiinyi wǝṯi-nyii kwogwɔccelɔ, 24 nɔŋwɔccǝ nyuŋwɔ-ŋw, ‘Ǝṯi ṯiinya mac Bɔɔlɔs! Laazim a rilli kiyǝnǝ yǝthi Imbraaṯɔɔr. Allah wɔmǝŋǝ inḏǝthǝ ŋimiitha ŋǝthi kila tatap laariŋa-li Saafirɔ’. 25 Ŋwɔṯaŋw lɔr laalɔ ǝṯi ṯiinya mac! Kaka nallathiny-gwɔ Allah ṯɔgwori naana, ethi ŋiɽaŋal ǝrrini ŋa tatap ŋir-ga ŋandicar-nyji. 26 Laakin a kwǝr ele rac nḏɔṯɔma kǝni lǝthi jǝziirǝ kwette.”
27 Mǝ kulŋǝ kir wrii-kwaɽiŋan oro-tǝ, nǝnyji kɔrɔn kɔppa ṯiŋaṯṯa mɔrkǝb-gi ki-ŋwɔthɔṯṯɔm ŋwɔthi bahar kwǝni Bahar Al-abiyaḏ Almɔṯɔwosiṯ, mindaŋ mǝ kulŋǝ-nǝ oro, nǝ lɔr lǝṯiili mɔrkǝbǝ aarɔŋw, a kwɔmǝri accasi wurǝyuŋi wɔnḏɔ keṯṯok. 28 Mǝr ɔɽasi lar mǝr-li ṯǝcci ŋaaw, nǝrsi kaṯṯasi ŋɔɔlɔna ŋir yaaga ruɽi-nyirlil, nǝ kwaathan kwokwok nǝrsi-ṯǝ ǝrriŋw kwokwony mindaŋ nǝrsi kaṯṯasi yaaga ruɽi-kwaɽiŋan-la wrii. 29 Nǝr ṯeenye ethi mɔrkǝb erme ŋwiiɽiya ŋweere, mindaŋ nǝr ɔɽasi limǝrfǝ@iinǝ kwaɽiŋan mɔrkǝbǝ yuṯṯuyǝ-nǝ mindaŋ nǝr naŋni beṯ-beṯṯen ethi ǝzir sɔɔɽi fittak. 30 E-ta nǝ lɔr lǝṯi iili mɔrkǝbǝ naŋni ethi avri ŋejmeth-ŋi; mindaŋ nǝr ɔɽasi timɔrkǝbǝ tokwɔɽony ŋaaw-na, nǝr ruusi rogɽo reeŋen kaka linḏi ethi ɔɽasi limǝrfa@iinǝ mɔrkǝbǝ kinda. 31 Laakin nǝ Bɔɔlɔs ǝccǝ ḏoobitha-ŋwɔsi jesh-giŋw, “Mǝ lɔr lǝthi mɔrkǝb ere naani kɔnɔŋw ki-mɔrkǝb-lǝ mac, ere kittatha ethi kilaaw kwokwony mac.” 32 E-ta nǝ jesh undu ŋwar kithaay ŋwɔkǝkkǝr-ŋi timɔrkǝbǝ tokwɔɽony, mindaŋ nǝr duŋgwǝci nɔŋw iidǝthǝ ŋaaw-na.
33 Na mǝ ǝzir aadithi ethi avralɔ, nǝsi Bɔɔlɔs tuurǝccǝlɔ tatap ethi yee kwomne kweere, nɔŋwsǝccǝŋw, “Ŋaaŋa limǝthi ŋwaamin wrii-kwaɽiŋan ŋwakkiŋa-ŋi kizǝn, nǝ ki-ŋwɔɔmɔr-la ŋwɔ tatap, neere yee kwomne kweere mac. 34 Ŋwɔṯaŋw ŋǝsi tuurǝccǝlɔ ethi yee ethneya wokwo ethi firllasi ŋaaŋwɔsila; kaka niti ninḏi-gwɔ ǝwɽu weere wǝthi ŋwɔɽa ŋwaalɔ ethi kiirannalɔ mac.” 35 Mɔŋw andasi ŋiɽaŋali ŋɔ tǝ, nɔŋw dimmi rǝghiivǝ nɔŋw-ri ǝccǝ Allah shukran kiyǝnǝ yeeŋen tatap, mindaŋ nɔŋwsi undǝnǝ nɔŋwaari ibṯǝḏi ethisi yee. 36 Ŋwɔṯaŋw nǝr bonye tatap, mindaŋ nǝr yee ethneya wokwo rogɽo-ri reeŋen. 37 Nǝ nyiiŋǝ linaanɔ ki-mɔrkǝb-nǝ ninyoro tatap ruɽi-wrii nǝ ruɽi-ṯoɽol-la wrii-nyirlil. 38 Mǝr ethne tatap mindaŋ mǝr bee tǝ, nǝr ɔṯi gemeh-ya tatap nǝr kagiṯṯɔ ki-bahar-nǝ ethi-mǝ mɔrkǝb ǝwri.
Mɔrkǝb mɔŋgwɔ kee ki-bahar-na.
39 Mǝ ǝzir sɔɔɽi-tǝ, nǝ lɔr lǝṯiili mɔrkǝbǝ ere elŋe nḏɔṯɔma mac, laakin nǝr ǝthici ǝzir yǝy wette wǝthi ŋaaw ŋǝnḏǝthi wurǝyu-yǝnǝ, mindaŋ nǝr kittatha ǝŋgir oro mǝmkin ethiili mɔrkǝbǝ kinǝŋgwu-ŋgi. 40 Nǝr undu limǝrfǝ@iinǝ kithaay nǝr irdǝthǝ bahar-gina, nǝ ki-lɔɔmɔr-la ṯǝ kila, nǝr kǝdu ŋwar ŋwuuɽi naana ŋwɔṯir-ŋi iili mɔrkǝbǝ, e-ta nǝr allasi kirethi-la ethi kɔrɔn iili mɔrkǝbǝ, e-ta nǝr iilatha nḏɔṯɔma naana. 41 Laakin nǝ mɔrkǝb erme luuthǝ lǝthi ramla ŋaaw-na, mindaŋ nɔŋgwɔ dirnaṯṯi kidir, nɔŋweere ǝthi ŋɔma ethi dɔŋgwatha-lɔ mac, laakin ŋgwa kwir yuṯṯu tǝ, nǝ ŋaaw ŋilakkathina kii nǝr fǝthǝlɔ faṯ-faṯ.
42 Nǝ jesh kette araaya ethi ɽeenye mahbuusa tatap, mindaŋ etheere ippi kweere kiiruwǝ ethisi arṯithalɔ mac; 43 laakin kaka naŋnagwɔ ḏoobiṯ ethi kilǝthi Bɔɔlɔs-ŋwɔ, nɔŋwsi ṯiinyini ethiseere ǝrri ŋɔ mac. Nǝ ki-lɔɔbi lǝthi ŋiɽaŋal ŋɔ, nɔŋwsi ǝllici waamira tatap kila lǝthi ŋɔma ethi ippi kiiruwǝ ker-kerreny etheele nḏɔṯɔma kǝni; 44 mindaŋ ethisi-mǝ kwaathitha lithaathɔ lǝllithi ki-yuvɽur-lǝ ya kwomne-la kwǝthi mɔrkǝb ŋgwa kwɔmǝ kee. E-ta nǝṯǝ ṯǝrṯiib oro kɔthɔ ṯimǝny-thi ɔppathi tatap nḏɔṯɔma kǝni liglathɔ.