Mǝjlǝs kwǝthi Urshaliim-ŋwɔ.
1 Nǝ lizi lokwo iila min Yahuuḏiiyyǝ nǝreele Anṯaakiya, nǝr ǝccǝ lizi kila limǝ ǝmmini @allima nǝrsǝccǝŋw, “Ŋaaŋa liti lǝthi ŋɔma mac ethi kilaaw, meere uɽunni ŋwɔthrɔnya mac, kaka nandisasi-ŋwɔ Sherii@a kwǝthi Muusǝ.” 2 Nǝ Bɔɔlɔs-ŋǝ Barnaaba-gi ɔppathalɔ lizi-li ŋɔmmaŋi ŋiɽaŋal-ŋi ŋɔ, mindaŋ nǝ Bɔɔlɔs-ŋǝ Barnaaba-gi nǝ lizi lokwo lǝthi Anṯaakiya-ŋw, kette ŋiɽaŋali dɔŋw ethi dimmǝ ŋiɽaŋali ŋɔ ethiŋeele Urshaliim ethisi inḏǝthǝ Lishiyuukhǝ yaavɔr-yi ethisi ese. 3 Nǝsi kǝniisǝ keeŋen ɔɔsi, mindaŋ nǝr iiḏǝthǝ kithaay ṯeeŋen nǝreele, mǝreele Fiiniiŋiiyyǝ-ŋgi nǝ Saamira tok, nǝrsi andisasalɔ ŋǝthi Umam wɔmǝ ɔrllatha Allah naana; nǝ khabar ŋgɔ ǝvicǝ lizi lǝthi ṯǝmminǝ tatap ṯinyiŋlana tɔppa beṯṯen. 4 Mǝr ɔppathi Urshaliim, nǝsi kǝniisǝ aalanni, nǝ yaavɔr-ŋǝ lishiyuukh-li tok, mindaŋ nǝrsi andaci-ŋa tatap ŋǝrrǝsi Allah ŋunduŋwsi-li. 5 Laakin nǝ kila lokwo lǝthi ṯǝmminǝ lǝthi dɔŋw lǝthi Lifirriisiiyyiin, nǝr diiɽi nǝraarɔŋw, “Laazim a Umam unduni ŋwɔthrɔnya nǝ ǝrisi andaci ethi iinyici Sherii@a naanǝ kwǝthi Muusǝ.”
6 Nǝ yaavɔr-ŋǝ lishiyuukh-li aaɽathi dɔŋw etheese ŋiɽaŋali ŋɔ. 7 Mǝr ɔppathalɔ lǝlu-ttuk tǝ, nǝ Bɔṯrɔs diiɽi nɔŋwsǝccǝŋw, “Liyǝŋgǝri liinyi, ŋaaŋa lilŋithi rac kinaŋw ki-nyaamin-la kinya nyiŋna nǝlliny-gwɔ Allah daŋgal-na ethǝccǝ Umama bǝshirǝ ŋiɽaŋali ŋǝthi Inyjiil, mindaŋ mǝrǝthi ŋɔma ethisi neŋne tǝ, ǝrsi-mǝ ǝmmini. 8 Nǝ Allah wilŋithi-pǝ rɔgwori rac rǝthi lizi, e-ta nɔŋw kette shahaaḏa ki Umam-na, mɔŋwsi-gwɔ inḏǝthǝ Ṯigɽimǝ Ṯirllinǝlɔ ter, kaka-ṯǝ kinaŋw ninḏǝthǝ-ŋgwɔ nyuŋwsi. 9 Nɔŋweere kette ṯiɽanyɔ ṯeere kelgeny-na kǝri ŋunduŋǝ-li mac; nɔŋwsi suuɽuci rɔgwori reeŋen kaka mǝr-gwɔ ǝmmini. 10 Nǝ ŋaaŋa lotho linaŋna ethi mɔmmi Allah ṯɔɔvi-thi kitha ṯinaŋna-ŋa ethi uvuni ṯalaamiiza ki-rɔɔɽɔ-la reeŋen, ṯiti ṯǝthicǝ luŋwurnǝ lǝri ŋɔma-na mac, wala nyiiŋǝ eahǝthici ŋɔma-na ethi dimmǝ? 11 Bǝri-mǝ! A kwǝmminǝr-pǝ nǝrmǝ kilaaw ne@ma-gi kwǝthi Kweeleny kwǝni Yǝcu, kaka-ṯǝ ŋunduŋwsi.” 12 Nǝ dɔŋw naani tatap pǝt nakkicar-gwɔ Barnaaba-ŋwɔsi Bɔɔlɔs-gi kizǝn nandisar-gwɔ ŋiɽaŋali tatap ŋa ŋir ŋilim nǝ ŋir ŋwundǝ-ŋwundǝ ŋǝrrǝsi Allah ŋunduŋwsi-li ki Umam-na. 13 Mǝr ṯimmasi kandisa-tǝ, nǝ Ya@guub andasi nɔŋwaarɔŋw, “Liyǝŋgǝri liinyi niŋnacar-nyii-ṯi! 14 Sim@aan kwɔmǝ-nyji ilŋthini kire-kirem-ŋgwɔ ṯǝ, naarɔ-ŋgwɔŋw, Allah wɔmǝ baaŋaci Umama ṯaŋrica ṯuuŋwun kerreny, kaka nǝlli-ŋgwɔ lizi-nǝ deŋgen-na nɔŋwsi ruusi lǝthi yiriny yuuŋwun. 15 Nǝ ŋiɽaŋal ŋǝthi liɽii biɽithina dap-dap ŋiɽaŋal-ŋi ŋɔ. Kaka nɔlɔɔthɔnar-gwɔ ŋaarɔŋw,
16 ‘Kweeleny kwaarɔŋw, Nyii kwaaɽa kwaathan-gi,
mindaŋ nyaaɽasi dɔɔnɔ-ŋwa-lɔ kwǝthi Ḏaawḏ kwɔmǝ iidi.
Nyacci ǝzir wuuŋwun kwokwony wirdidu,
mindaŋ ŋwɔ ferlle kwokwony tetter.
17 Mindaŋ a lizi lirna ter-ter iila ǝri naŋninni Kweeleny-lɔ,
nǝ kila tatap lir Umam lɔrnɔṯɔ-nyji ethoro liinyi.
18 Nǝ Kweeleny oro kwandisa ŋiɽaŋali ŋɔ, ŋilŋithina kerreny tuk’.”
19 Nǝ Ya@guub aari isṯimir kwandisa nɔŋwaarɔŋw, “Fikir kwiinyi kwǝni-ŋwɔ, etheere inḏini Umama ṯurvǝ mac, kila limǝ ɔrllatha Allah naana. 20 Nǝ ki-lɔɔbi lǝthi ŋiɽaŋal ŋɔ, ǝrsi locce juwaaba ethisi andaci etheere yee ethneya weere witi wisaaw mac kuruu-gi wa wǝṯir rillici riiɽuwǝ-lɔ; ethi rucci ŋiijinǝ-nǝ; etheere yee haywaana weere mac wimthinǝ kworo, nǝ ŋin tok mac. 21 Kaka nǝṯi-gwɔ Sherii@a kwǝthi Muusǝ ɔrtuni ki-lɔmɔr-la kila tuk, ki-limajma@-na ŋwaamin tatap ŋwɔthi Sǝbiṯ, nǝ ǝṯi ŋiɽaŋal ŋuuŋun ǝrinni bǝshirǝ ki-muḏun-nǝ tatap.”
Juwaab kwɔlɔccar lizi lǝthi ṯǝmminǝ lir Umam.
22 E-ta nǝ yaavɔr-ŋǝ lishiyuukh-li nǝ kǝniisǝ tatap kette ŋiɽaŋali dɔŋw ethi alla lɔɔrɔ lokwo deŋgen-na, mindaŋ ethisi ɔɔsi Anṯaakiya Bɔɔlɔs-ŋǝli nǝ Barnaaba tok. Nǝr alla lɔɔrɔ ndǝn lǝṯirsi iiɽinǝ beṯṯen ki-liyeŋgen-na, kwette kwǝni Yahuuthǝ kwǝṯir ǝccǝ Barsaaba nǝ Siila tok. 23 Nǝrsi ɔɔsi juwaab-gi ŋgwɔ kwaniŋw,
“Nyiiŋǝ lir yaavɔr-ŋǝ lishiyuukh-li lir liyaŋgalɔ laalɔ, nyiiŋǝ laaginna-ŋǝsi lir liyǝŋgǝri-ŋǝ tatap lir Umam lǝṯi nanni Anṯaakiya, Suuriiyya, Kiiliikiiyyǝ. 24 Nyiiŋǝ limǝ neŋne ŋiɽaŋali ŋǝthi lizi lokwo limǝ ruuthǝ ki-lɔdɔŋw-na lǝri mindaŋ nǝrŋǝsi tǝmbǝl-nǝ, nǝrŋǝsi ere ǝminǝ mac ŋiɽaŋal-ŋi ŋa ŋandisarsi; lende lɔɔsa-nyji ŋiɽaŋal-ŋi ŋeere ŋǝri mac. 25 Ŋwɔṯaŋw nǝnyii aaɽathi dɔŋw, mindaŋ nǝnyii ǝmmini tatap ethisi allana lokwo ethisi usicǝ ŋaaŋwɔsi. Nǝ kila linḏi liyǝŋgǝr-li lǝni Barnaaba-ŋǝ Bɔɔlɔs-gi, 26 lindǝr-ṯa limǝ kette rogɽo reeŋen khaṯar-na sǝbǝb-gi kwǝthi Kweeleny kwǝri kwǝni Yǝcu Kwɔrɔstɔ, ethi ǝkkici ŋunduŋw ŋothɽor. 27 Nǝrṯoroŋw nǝnyii-mǝ usicǝ ŋaaŋwɔsi Yahuuthǝ-ŋwɔsi Siila-gi ethi andaci ŋaaŋwɔsi ruunyu-ri ŋiɽaŋali ŋa ŋɔlɔccar-ŋǝsi. 28 Nyii-ŋǝ limǝ ruusi ŋiɽaŋali ṯuunyu ṯɔtɔpɔt Ṯigɽim-ŋǝli Ṯirllinǝlɔ ter etheere uvuni ŋaaŋwɔsi ṯɔɔvi ṯir ter mac, illi ŋa ŋir mɔhim: 29 ǝṯi iithi ethneya weere mac wǝṯir rillici riiɽuwǝ-lɔ; ere yee ŋiinǝ ŋeere mac; ere yee haywaana weere mac wumthinǝ kworo; nǝ a rucci ŋiijinǝ-nǝ tuk. Mǝseere ǝrri ŋeere ŋɔrɔŋw mac tǝ, nǝni limǝsi ǝrri ŋisaaw beṯṯen. Ethi-ŋǝsi Kweeleny naanasi.”
30 Nǝ kila lɔɔsarsi nǝreele Anṯaakiya, nǝr-gwɔ raayisi lizi dɔŋw kila lǝthi ṯǝmminǝ, mindaŋ nǝrsi inḏǝthǝ juwaaba. 31 Na mǝ lizi ɔrti juwaaba tǝ nǝr nyeŋlena beṯṯen ŋiɽaŋal-ŋi ŋa ŋimǝsi firllasi-la. 32 Nǝ Yahuuthǝ-ŋǝ Siila-gi, kaka nɔrɔr-gwɔ liɽii, nǝrsi andaci lǝlu-ttuk, ṯɔkkwaza-thi nǝ ṯifirllǝ-thi tok liyeŋgen naana. 33 Mǝr naani kwokwo kinaŋw, nǝsi liyeŋgen kila lǝthi ṯǝmminǝ kette kithaay etheele laami naana, mindaŋ nǝr aaɽitha naanɔ-gwɔ kila lɔɔsasi. [ 34 Laakin nǝr aamatha Siila-ŋwɔ ethi naani kinnǝni kwokwo kinaŋw.] 35 Nǝ Bɔɔlɔs-ŋǝ Barnaaba-gi naani ŋwɔɔmari ŋwokwo kinnǝni Anṯaakiya, nǝrǝccǝ lizi @allima luuru, nǝ nǝraari bǝshirǝ ŋiɽaŋali ŋǝthi Kweeleny.
Bɔɔlɔs-ŋǝ Barnaaba-gi mǝr-gwɔ faathalɔ.
36 Kwaathan kwokwo tǝ nǝ Bɔɔlɔs ǝccǝ Barnaaba-ŋwɔ, “Ndeele ndaaɽi ndi raaŋitha liyǝŋgǝri-ŋwɔsi ki-muḏun-nǝ tatap kǝzir waarir-gwɔ bǝshirǝ ŋiɽaŋaii ŋǝthi Kweeleny mindaŋ ndisiisa kilana laami fǝtǝ naanɔŋw-a.” 37 Nǝ Barnaaba-tǝ nɔŋw naŋni ethi mɔlthanni Yuhanna-ŋwɔ kwǝni Mɔrgus etheele ŋundu-ŋeli, 38 laakin Bɔɔlɔs-tǝ, nɔŋweere ǝmmini mac ethi-li ele, kaka mɔŋgweere naana ŋundu-ŋǝli mindaŋ ethi ṯimmasa ŋothɽor ŋeeŋen kworo mac, laakin nɔŋwsi ɔrlacca ŋwɔdoŋw Bamfiiliiyyǝ mindaŋ nɔŋweele nɔŋwaaɽi 39 Nǝr kiyǝthi mindaŋ nǝr faathalɔ. Nǝ Barnaaba mɔlo Mɔrgus-ŋwɔ nǝrŋeele mɔrkǝb-gi Gɔbrɔs, 40 nǝ Bɔɔlɔs-tǝ nɔŋw alla Siila-ŋwɔ, nǝsi lizi kila lǝthi ṯǝmminǝ kette kithaay ṯimǝccǝ-thi ṯǝthi ne@ma kwǝthi Kweeleny. 41 Nɔŋweele Suuriiyyǝ-ŋgi nǝ Kiiliikiiyyǝ-ŋgi tok ethi firllasi yǝniisǝ-lǝ.