Bɔṯrɔs-ŋǝ Karniiliiyuus-gi.
1 Nǝ kwɔr naani kwette Gaysariiyya kwǝni Karniiliiyuus, kwir ḏɔɔbiṯ ṯǝthi jesh kwǝṯir-ŋi aarɔŋw kwǝthi Iyṯaaliya-ŋw kwiri. 2 Nɔŋworo kwette kwǝṯi iiɽi Allah-na; ǝṯir kwocce Allah-lɔ dɔɔnɔ-gina kwuuŋwun tatap. Ǝṯɔŋwsi ǝrri ŋittǝzir ethi mǝcci lizi lir Yahuuḏ lir lɔwaay, nǝ ǝṯɔŋweere uɽǝthi ethaari kiyiiriny mac. 3 Mǝ saa@ oro ṯoɽol kwǝthi kirakalɔ-ŋw, nɔŋweese rɔ-ɔya, nǝ ki-rɔ-ɔya-na kɔrɔ, nɔŋweese meleka kwǝthi Allah por-por kwǝnḏǝthǝ kiininy nɔŋwɔccǝŋw, “Karniiliiyuus!”
4 Nɔŋw ɔnḏasi meleka yǝy naana kwɔrop kwithiinyanna tok, mindaŋ nɔŋwɔccǝŋw, “A kwaari-tha yaa Sǝyyiḏ?”
Nǝ meleka ǝŋnici nɔŋwɔccǝŋw “Allah waamina ṯaara-thi ṯɔɔŋwɔ kiyiiriny nǝ ŋothɽor-ŋi ŋǝṯisi ǝrri ŋisaaw-ŋisaaw, mindaŋ nɔŋw kittatha ethi ǝŋnici ŋaaŋwɔ. 5 Nǝ kire-kirem-ŋgwɔ tǝ, ɔɔsa lizi lokwo etheele Yaafa naanɔ-gwɔ kwɔr kwette kwǝni Sim@aan Bɔṯrɔs. 6 Ŋgwana kwɔdappathalɔ ŋiirinǝ ki-dɔɔnɔ kwǝthi Sim@aan kwǝṯi ǝnyji yirna, kwɔnannɔ bahara kǝni.” 7 E-ta mǝ meleka urli ŋwɔdɔŋw mɔŋweele-tǝ, nǝ Karniiliiyuus ɔrnɔṯi yaḏaama yiɽǝn yǝthi dɔɔnɔ kwuuŋwun, nǝ jesh kwette kwǝṯi mithǝ ŋiɽaŋali ŋǝthi Allah, ŋgwa kwuruusǝŋw kwǝthi rogɽo ruuŋwun. 8 Nɔŋwsi andaci ŋa ŋǝrrina mindaŋ nɔŋwsi ɔɔsi nǝreele Yaafa. 9 Nǝ ki-laamin lir ter a-naanir ki-thaay-la, mǝr iilici Yaafa-ŋwɔ keṯṯɔk, nǝ Bɔṯrɔs dallɔ kindala lǝthi dɔɔnɔ ethi-gwɔ aari kiyiiriny kaaŋwɔn wumǝ naani kelgeny-na tittir. 10 Nǝ yaaŋwɔ yee mindaŋ nɔŋw naŋni kwomne kweere kwǝthi yee, nǝ ki-lɔɔmɔr-la-ṯǝ kila limaanir-li ethneya, nɔŋweese rɔ-ɔya. 11 Nɔŋweese leereya lidiŋǝlnǝ kwɔrɔ, mindaŋ nǝ kwomne kwette ɔɽa kwurǝyu-lu kwir kaka milaaya kwɔppa kwukǝkkinnǝ ruunyu ruuŋwun rir kwaɽiŋan. 12 Nǝgwɔ kwomne naanina tatap kwɔmiithɔ kwirna ŋwɔɔla-ŋwɔɔla kwǝṯeele ŋwaaraŋalɔ, nǝ yaariyalɔ, nǝ ndǝw lǝthi leere tok. 13 Nǝ ṯogɽo ǝccǝŋw, “Diiɽu yaa Bɔṯrɔs; a ɽeenye mindaŋ mǝ yee!”
14 Laakin nǝ Bɔṯrɔs ǝccǝŋw, “Bǝri-mǝ, Kweeleny nyii kwende kwɔmǝ yee kwomne kweere kwigii kuruu-gi nǝ kwir ŋiɽigin tok mac.” 15 Nǝ ṯogɽo andica kwokwony nɔŋwɔccǝŋw, “Ǝṯeere ruusi kwomne kweere kwuruuŋwɔ mac kwǝṯi-gi Allah aarɔŋw kwɔsɔɔɽi.” 16 Nǝ ŋiɽaŋal ŋɔ ǝrrini nyaamin-na ṯoɽol, e-ta nǝ kwomne dimmǝnni ki-leere.
17 Nǝ kinaŋw naari-ṯa Bɔṯrɔs kinnǝni fǝkirǝ ŋiɽaŋal-ŋi ŋǝthi rɔ-ɔya rǝni-thi ǝyǝ, nǝ lɔr kila lɔɔsasi Karniiliiyuus ɔppatha, nǝr ɔṯalɔ dɔɔnɔ-ŋgi kwɔnaanɔ-gwɔ Sim@aan-na, mindaŋ nǝr iila nǝr rilli kǝgwɔr. 18 Nǝr ɔṯalɔ nǝraarɔŋw, “Kwiirin ŋgwɔ kweere kɔnɔŋw kwǝni Sim@aan Bɔṯrɔs-a?” 19 Bɔṯrɔs tǝ nɔŋw tǝ ṯaccici kinnǝni ethelŋe ŋiɽaŋal ŋǝthi rɔ-ɔya rǝni-thi ǝyǝ, mindaŋ nǝ Ṯigɽim Ṯirllinǝlɔ ter ǝccǝŋw, “Niŋna-ṯi! Lizi kila ṯoɽol linaŋna-ŋa. 20 Ŋwɔṯaŋw diiɽu aami naanɔŋw mindaŋ a dappi, ǝṯi ṯiinya mac ethileele, kaka nɔrɔny-gwɔ kwɔɔsasi.” 21 Ṯaŋw na Bɔṯrɔs dappi nɔŋwsǝccǝŋw, “Nyii kwirṯa-pa ŋgwa kwir kwɔr kwɔnaŋna-ŋa. Aatha kwɔrɔ kwiilathi-ŋa-gwɔ?”
22 Nǝr ǝŋnici nǝrǝccǝŋw, “Ḏoobiṯ ṯǝni Karniiliiyuus ṯindǝr ṯɔɔsa-nyji, ṯir kwɔr kwirllalɔ, kwǝṯi kwogwɔcce Allah-lɔ, ǝṯi lizi tatap lǝthi Yahuuḏ iiɽi ŋunduŋw-nǝ beṯṯen. Nǝ meleka kwǝthi Allah andaci ethi ɔrnɔṯa ŋaaŋwa ki-dɔɔnɔ kwuuŋwun, mindaŋ mɔŋwsi neŋne ŋa ŋinḏi-ŋǝsi ethisi andasi.” 23 Nǝ Bɔṯrɔs ǝnyji lɔɔrɔ kiininy mindaŋ nǝr nḏirni kinaŋw.
Mǝ ŋɔrpɔ-ŋgwa oro tǝ, mǝ Bɔṯrɔs aami nanɔ-ŋw tǝ nǝrleele, mindaŋ nǝ lizi lokwo lǝthi ṯǝmminǝ lǝthi Yaafa-ŋwɔ ele tok ŋundu-ŋǝli.
24 Mǝ ŋɔrpɔ-ŋgwa oro nɔŋw ɔppathi Gaysariiyya, kǝzir wǝkkicǝ-yi Karniiliiyuus kizǝn, ŋundu-ŋǝ lizi-li luuŋwun nǝ limethgen luuŋwun tok lɔrnɔṯɔŋwsi. 25 Nǝ kinaŋw mǝ Bɔṯrɔs ǝnḏi, nǝ Karniiliiyuus kwɔɔmathana, nɔŋw iidǝccǝlɔ ŋwɔrŋwɔ-ŋalɔ kwɔgwɔcca-ŋwlɔ. 26 Laakin nǝ Bɔṯrɔs diiɽǝzilǝ nɔŋwɔccǝŋw, “Ḏiiɽu nǝ nyii kwir-mǝ kwizigwunǝŋ domony.” 27 Nǝ Bɔṯrɔs aari isṯimir ethi andaci Karniiliiyuus-ŋwɔ nǝndiŋw kǝzir waaɽathi-gwɔ lizi dɔŋw-lɔ littǝzir. 28 Nɔŋwsi ǝccǝŋw, “Ŋaaŋa lilŋithi-pǝ rac rogɽo-ri raalɔ erhaarɔŋw, Yahuuḏ yiti yeere mac yǝṯirsi ǝmminici ethi ɔɽɔmaṯṯi dɔŋw Umam-yi weere, wala ethi ǝndi kiininy duŋgwun. Laakin nǝnyii Allah baaŋaci ehaarɔŋw laazim ǝṯeere ruusi kwizigwunaŋi kweere kwigii mac, wala eṯhi ruusi kwiɽigin. 29 Nǝ mǝnyii uzuthicǝ nǝnyii iila kwiti kwummunǝnǝ mac. Ṯaŋw ŋǝ uṯicǝlɔ, a kwotho kwɔɔsɔthɔ naaniny-gwɔ?”
30 Nǝ Karniiliiyuus ǝccǝŋw, “Ki-ŋwaamin-la ŋwir ṯoɽol ŋwɔmǝ ṯamthɔ, ki-tɔɔmɔr-la ṯǝ tɔrɔŋw, nǝnyii aari kiyiiriny ki-dɔɔnɔ kwiinyi ki-saa@-la kwir ṯoɽol kwǝthi kirakalɔ-ŋw, nǝ kwɔr kwette ǝnḏinǝlɔ pugwuṯ, nɔŋw rilli kiyǝnǝ yiinyi, kwɔginna yireṯhi yaari kap-kap, 31 nɔŋwaarɔŋw, ‘Karniiliiyuus! Allah wɔmǝ neŋne ṯaara ṯɔɔŋwa kiyiiriny, mindaŋ nɔŋw kithaayini ŋothpor ŋɔɔŋa ŋɔvthanna. 32 Ɔɔsa kwette Yaafa naanɔ-gwɔ kwɔr kwette kwǝni Sim@aan Bɔṯrɔs, ŋgwana kwir kwiirin ki-dɔɔnɔ kwǝthi Sim@aan kwǝṯi ǝnyji yirna, kwɔnaanɔ bahara kǝni’. 33 Ŋwɔṯaŋw nǝnyii-mǝ ɔɔsɔthisa fittǝk, mindaŋ nǝ ŋiɽaŋal ŋaaŋa ǝni ŋisaaw beṯṯen mǝgwɔ iila. Nǝ kire-kirem-ŋgwɔ tǝ, nǝnyii naani tatap kiyǝnǝ yǝthi Allah, lakkɔ kizǝn ethi neŋne kwomne kweere nyithak kwandica-ŋa-gi Kweeleny.”
Ŋiɽaŋal ŋandisasi Bɔṯrɔs.
34 Na Bɔṯrɔs aari ibṯǝḏi ethi andasi nɔŋwaarɔŋw, “Nyii kwilŋica rac rerrem ethaarɔŋw, Allah witi wǝṯi ɔṯi lizi-nǝ mac. 35 Kweere nyithak kwǝṯiiɽi Allah-na, mindaŋ mɔŋwsi ǝrri ŋɔvthanna, ǝṯɔŋw ǝmmini ŋundu-ŋw, mɔŋw-tǝ kinnǝni oro jinisǝ kwette nyithak. 36 Ŋaaŋa lilŋica rac ethaarɔŋw kwuusucǝ lizi lǝthi Israa-iil ŋiɽaŋali ŋaarɔŋw-ŋi bǝshirǝ ŋǝthi ṯibɽǝthǝlɔ pǝt Yǝcu-ŋgi kwir Kwɔrɔstɔ kwir Kweeleny kwǝthi lizi tatap. 37 Ŋaaŋa lilŋithi ŋiɽaŋali ŋa ŋɔppa ŋǝrrinǝ ǝzir naana tatap wǝthi Israa-iil, ŋaari ibṯǝḏi Jǝliil kwaathan kinaŋw mǝ Yuhanna aari bǝshirǝ rac ṯa@liima ṯǝthi ma@muuḏiiyya. 38 Ŋaaŋa lilŋithi rac ŋiɽaŋali ŋǝthi Yǝcu kwǝthi Naasira-ŋw, kwɔmǝ Allah ɔratha Ṯigɽim-thi Ṯirllinǝlɔ ter, nǝ ŋɔma tok. Ǝṯɔŋw iirǝri ǝzir naana tatap, ǝṯɔŋwsi ǝrri-ri ŋisaaw mindaŋ ǝṯɔŋwsi sǝwi tatap kila limthisi Ibliis kaka a-naanisa-gwɔ Allah. 39 Nyii-ŋǝ lir shuhuuḏ kwǝthi kwomne-ŋgwa tatap kwǝrrǝŋwɔ ki-bǝlǝḏ kwǝthi Israa-iil nǝ Urshaliim tok. Mindaŋ mǝr ɽeenye ṯippǝccǝ-thi relme ki-ŋwuuɽi-la ŋwɔɽɔmathalɔ. 40 Laakin mǝ ŋwaamin ṯoɽol ere tǝ, nǝ Allah diiɽǝ ki-ŋiɽany-na mindaŋ nɔŋw iijini, 41 ŋiti ŋir ŋǝthi lizi tatap mac, laakin illi nǝ shuhuuḏ oro dak ŋgwa kwǝlli Allah-na, nǝ nǝnyii-ṯǝ oro nyiiŋǝ lithnar-li nǝ liithir-li tok kinaŋw mɔŋw diiɽǝ rac ki-ŋiɽany-na. 42 Nɔŋw ǝllici nyuŋwsi waamira ethi ǝccǝ lizi bǝshirǝ Inyjiilǝ, ethoro shuhuuḏ kwǝni ŋundu. Nǝ Allah allana ethi kettice lizi hɔkwɔma limiithɔ nǝ laayɔ tok. 43 Nɔŋwṯoro kwǝṯi-gi liɽii ɔnḏi kii naarir-ŋwɔ, kweere nyithak kwǝmminici ŋunduŋw a ŋikiya ŋuuŋun fivrinnici ŋɔma-ŋi ŋǝthi yiriny yuuŋwun.”
Umam mɔŋgwɔ aavi Ṯigɽimǝ Ṯirllinǝlɔ ter.
44 Nǝ kinaŋw nandisa tǝ kinnǝ Bɔṯrɔs ŋiɽaŋali, nǝ Ṯigɽim Ṯirllinǝlɔ ter dappitha ki-lizi-lǝ kila tatap ligittica ŋiɽaŋali ŋuuŋun yǝni. 45 Nǝ Yahuuḏ kiya yǝmminicǝ Kwɔrɔstɔ-ŋw yinḏir Bɔṯrɔs-ŋǝli min Yaafa liŋɽalɔ buruc kaka mǝr-gweese Allah wɔmǝ balsa haḏiiyyǝ wuuŋwun, wir Ṯigɽim Ṯirllinǝlɔ ter lizi naana tok lir Umam. 46 Kaka niŋnacarsi-gwɔ landisa kandisa kir riŋla-na ter-ter, mindaŋ nǝr nii Allah-na tok; e-ta nǝ Bɔṯrɔs aarɔŋw, 47 “Lizi kala limaavi Ṯigɽimǝ Ṯirllinǝlɔ ter, kaka-tǝ kinaŋw naava-nyii nyii-ŋǝ tok. Ǝyǝ kwɔrɔ kweere kwǝthi ŋɔma ethisi rii ma@muuḏiiyya naana kwǝthi ŋaaw?” 48 Ŋwɔṯaŋw nɔŋwsi ǝllici waamira ethi aari @ammiḏa yiriny-yi yǝthi Yǝcu Kwɔrɔstɔ. E-ta nǝr uṯicǝlɔ ethi-li naani kinnǝ ŋwaamin ŋwokwo.