Ǝricǝr-nyji kiyiiriny.
1 Nǝ ŋirimthithɔ liyǝŋgǝri lǝri, ǝricǝr-nyji kiyiiriny, mindaŋ mǝ ŋiɽaŋal ŋǝthi Kweeleny illillatha keereny-gi tɔc fira-vra, ethisi aavi ṯiiɽǝthi-nǝ tok, kaka-ṯǝ kinaŋw nǝrrinǝr daŋgal-na. 2 Ǝricǝr-nyji kiyiiriny mindaŋ mǝnyii kilaaw kirii-na rǝthi kila lɔthɔɔthɔ nǝ ligii tok; kaka niti nǝthir-gwɔ tatap ṯǝmminǝ mac.
3 Laakin nǝ Kweeleny ǝni kwirllalɔ; kwɔŋǝsi firlli tetter nǝ kwɔŋǝsi aŋraci Ibliisǝ naana. 4 Nyiiŋǝ lallathi-ŋǝsi rɔgwori naana ethi Kweeleny-na ŋiɽaŋal-ŋi ŋǝni ŋaalɔ, nǝnyji elŋece rac rerrem ethaarɔŋw, ŋa ŋǝṯisi ǝrri, na nǝsi kittatha tok ethisi-tǝ ǝrrizǝsǝ ŋa ŋandicar-ŋǝsi. 5 Ethi Kweeleny mɔlotto rɔgwori raalɔ ethelŋe ṯamɽa ṯɔppa ṯǝthi Allah, nǝ ṯihdinyanna naana ṯǝthi Kwɔrɔstɔ.
6 Lǝyǝŋgǝri lǝri, nyiiŋǝ kila lǝllicǝ-ŋǝsi waamira yiriny-yi yǝthi Kweeleny kwǝri kwǝni Yǝcu, ethisi ruccinǝ kila tatap lir liyaŋgalɔ-ŋa, lir limoozo, liti leṯeele ki-ṯa@liim-la mac kitha ṯaavaŋa naaniny-gwɔ. 7 Kaka nilŋithi-ŋǝsi rogɽo-ri raalɔ laazim ethi ṯǝccini nyuŋwsi. Nyiiŋǝ lende lir limoozo kǝzir weere mac kinaŋw a-naaniny ŋaaŋa-li. 8 Nyiiŋǝ lende liyaathi kwizi kweere rǝghiivǝ domony riti rilliṯathi-nyji mac. Laakin ǝṯinyii akkɔ ŋothɽor tig-tig yulŋǝ yaaŋwɔnɔ, mindaŋ etheere uvuni kweere kwaalɔ ṯɔɔvi mac. 9 Ŋiti ŋǝniŋw nyiiŋǝ liti lɔvthanna mac, laakin ŋǝrrǝ-nyji ŋɔ mindaŋ ethi ilŋithini ŋaaŋwɔsi mǝthǝlǝ ethi-gwɔ elela. 10 Kinaŋw a-naani-nyii ŋaaŋa-li, nǝrŋǝsi ǝccǝŋw, “Mǝ kweere derne ethi akkɔ ŋothɽor tǝ, ŋweere ɔvthanni ethi ethne tok mac.” 11 Kaka niniŋna-nyii-ŋwɔ ethaarɔŋw kila lokwo daŋgal-nǝ linannɔ ŋimoozoŋ-ŋi, ǝṯireere akkɔ ŋothɽor ŋeere mac. 12 Nǝ lizi lir kaka ṯǝŋw, ǝnyji ǝllici waamira, nǝ ǝnyji ɔkkwazi tok ethi Kweeleny-na kwǝni Yǝcu Kwɔrɔstɔ ethi akkɔ ŋothɽor ŋeeŋen lithii jiɽeem ethi-ŋi ithni rogɽo reeŋen. 13 Laakin ŋaaŋa kila lir liyǝŋgǝri-tǝ, ǝṯi mɔɔlɔ mac ethisi ǝrri ŋisaaw.
14 Mɔŋw derne kweere ethisi iinyici naana ŋa ŋandicar-ŋǝsi ki-juwaab-na ŋgwɔ tǝ, aŋricar ŋunduŋw, mindaŋ meere ǝthi karatha keere ŋundu-ŋǝli mac, mindaŋ mǝ ṯɔrony mithǝ. 15 Laakin ere oro ṯuwǝn ṯuuŋwun mac. Laakin a kǝniny iirǝci ŋunduŋw kaka aŋgalɔ kwaalɔ.
Ŋiɽaŋal ŋirimthithɔ.
16 Ethi Kweeleny rogɽo-ri ruuŋwun kwir ṯuwǝ ṯǝthi ŋiiɽǝnnǝ, inḏǝthǝ ŋaaŋwɔsi ŋiiɽǝnnǝ ŋwɔɔmɔri tatap, nǝ ŋwaamin tatap tok. Ethi Kweeleny nanni ŋaaŋa-li tatap.
17 Nyii kwɔrɔ kwǝni Bɔɔlɔs kwɔlɔcca-ŋǝsi ṯaaginna kɔthɔ ṯii-thi ṯiinyi wɔɽe-wɔɽeny. Nizaam kwiinyi kwundǝr-ṯǝ ŋgwɔ kwǝṯi-nyii-ŋi lo lijuwaaba liinyi tatap. Imba nizaam kwundǝr-ṯǝ ŋgwɔ kwǝṯi-nyii-gi lo.
18 Ethi ne@ma kwǝthi Kweeleny kwǝri kwǝni Yǝcu nanni ŋaaŋa-li tatap.