Kilyǝ kǝthi Kwɔrɔstɔ nǝ ŋgwa kwigii.
1 Nǝ ŋǝthi kilyǝ kǝthi Kweeleny kwǝri kwǝni Yǝcu nǝ ṯɔɽɔmaṯṯa ṯǝri dɔŋw ŋundu-ŋǝli, nyiiŋǝ lɔɔraca-ŋǝsi liyǝŋgǝri lǝri, 2 etheere fiɽigathi ethi ṯǝmbǝlni ki-ǝfkǝr-nǝ waalɔ mac, ya ethisi ere ṯeenye mac ŋa ŋǝniŋw Laamin lǝthi Kweeleny limiila. Kimanni-pa ŋimǝ-nyji kǝzinni andasi kinaŋw nandicar-ŋǝsi, ya kinaŋw nǝccǝr-ŋǝsi bǝshirǝ, ya ǝrŋǝsi lɔcca kǝzir weere ki-juwaab-na. 3 Ǝṯi duŋgwǝcǝ kweere mac ethi kǝɽinyji ŋaaŋwɔsi-lɔ; kaka niti ninḏi-gwɔ laamin kila ethiila mac, mindaŋ mǝ ṯuwǝn ṯɔppa ŋiɽaŋali iŋnanna keereny, mindaŋ a kwɔr kwǝthi ŋɔḏɔrllathɔ ruwǝnnǝlɔ, kwinḏi ethi kiirathalɔ. 4 Kwǝṯi ɔppɔthatha ŋiɽaŋal-lɔ, nǝ ǝṯɔŋw piŋi rogɽo ruuŋwun ethi ṯamthɔ-la ŋgwa kwǝṯir ǝccǝ ṯiiɽu, ya kwomne kweere nyithak kwǝṯir kwoccelɔ, mindaŋ ethi piŋi rogɽo ruuŋwun deŋgen-la tatap. Mindaŋ ŋwɔ kǝniny ǝnḏi ki Heikal-na wǝthi Allah, ŋwɔ ruusi rogɽo ruuŋwun Allah. 5 Ŋiti ŋimǝsi kithaayini kinaŋw mac-a, a-naaniny kinnǝni ŋaaŋǝ-li nǝŋǝsi andaci ŋiɽaŋali ŋa tatap-a? 6 Nǝ nǝsi elŋe ŋa rac ŋithiinyinǝ ŋunduŋw ethi ruwǝnnǝlɔ mindaŋ mǝ Lɔmɔr luuŋwun lɔvthanna iila. 7 Kaka mǝgwɔ ŋejmeth ŋǝthi ŋikiya akkɔ ŋothɽor kerreny tuk, laakin ŋa ŋinḏi ethi ǝrrini, ereere ǝrrini mac mindaŋ mǝr ǝvri ŋgwa kithaay kwɔmthisi. 8 E-ta ǝmǝ kwɔdɔrllathɔ ŋgwa ruwǝnnǝlɔ, mindaŋ a Kweeleny kwǝni Yǝcu ɽeenye wǝŋ-yi wǝthi kworo kwuuŋwun, nǝ ŋwɔ kiirasalɔ ṯurwǝnnǝ-thi-lɔ ṯuuŋwun mɔŋwiila. 9 Kwɔdɔrllathɔ ŋgwa kwinḏi ethilla ŋɔma-ŋi ŋǝthi Shiiṯaan, mindaŋ ŋwɔrri ŋilima ŋir ŋǝluŋw domony, nǝ ŋa ŋir ŋwundǝ-ŋwundǝ tok, 10 ŋwɔsi ǝrrici kila linḏi ethi kiirathalɔ ŋa tatap ŋigii ŋir ŋǝluŋw. Kaka nidirnar-gwɔ ethisi amɽi ŋir rerrem mindaŋ ethi kilaaw. 11 Ŋwɔṯaŋw mindaŋ ǝsi Allah ɔɔsicǝ ŋɔma ŋɔppa ŋǝthi ṯikǝɽinyjinǝ-lɔ deŋgen-na, mindaŋ mǝrsi ǝmmini ŋir ŋǝluŋw, 12 e-ta ǝrsi hakwɔmi kila tatap lidirna ethisi ǝmmini ŋa ŋir rerrem, laakin ǝṯir-ŋi aamina ŋa ŋir ŋikiya.
Lalli-ŋǝsi-nǝ ethoro lǝthi ŋiglǝthǝ.
13 Ŋɔvthanna liyǝŋgǝri, laazim ǝnyii ǝccǝ Allah shukran ŋwɔɔmɔri tatap ŋiɽaŋal-ŋi ŋaalɔ, ŋaaŋa kila lǝṯisi Kweeleny amɽi. Kaka nicca-ŋǝsi-gwɔ Allah-na kwon-kwon-lɔ tuk, ethi kilaaw ŋɔma-ŋi ŋǝthi Ṯigɽim, ethi ruusi ŋaaŋwɔsi lirllinǝlɔ ter lǝthi Allah, ethisi ǝmminici ŋir rerrem. 14 Ŋindǝr-ṯǝ ŋɔ mindaŋ nɔŋw ɔrnɔṯa ŋaaŋwɔsi Inyjiil-yi wǝri, ethim-ǝ aavi ŋinithi ŋǝthi Kweeleny kwǝri kwǝni Yǝcu. 15 Ŋwɔṯaŋw liyǝŋgǝri lǝri, ŋnyjǝr ŋwaara-lɔ tetter, mindaŋ ǝsi mithǝ ŋa tetter ŋir rerrem ŋǝccǝr-ŋǝsi-ŋi @allima ṯǝbshiir-thi ṯǝri nǝ juwaab-gi tok.
16 Ethi Kweeleny kwǝri kwǝni Yǝcu rogɽo-ri ruuŋwun, nǝ Allah wir Papa kwǝri, wamɽa-nyji mindaŋ nɔŋw inḏǝthǝ nyuŋwsi ṯigandizalɔ ṯǝṯi nannatha dok-dok, nǝ ṯǝkkizǝ kizǝn-ŋǝ ne@ma-gi. 17 Ethiŋw firlli rɔgwori naana raalɔ ethisi ǝrri nyaamin tatap ŋisaaw, nǝ ethisi andasi ŋɔvthanna.