Lɔwaay.
1 Ethi lɔwaay iiɽi lisayyiḏ-ŋwɔsi-nǝ leeŋen, mindaŋ mɔŋweere kweere mac kwinḏi ethi kegree yiriny yǝthi Allah, nǝ ṯa@liim ṯǝri tok. 2 Nǝ lɔwaay kila lǝthi lisǝyyiḏ-ŋwɔsi leeŋen lir lɔgrɔstiyan, laazim ǝrseere ǝrrǝlɔŋw mac, kaka nɔrɔr-gwɔ liyeŋgen leeŋen. Nǝr kǝniny ɔvthanni ethisi ǝkkici ŋothɽor ŋisaaw ŋithǝmthǝlɔ, kaka kila linḏi ethi inḏa faayitha kwǝthi ŋothɽor ŋeeŋen, nǝroro kila lǝthi ṯǝmminǝ kila lǝṯirsi amɽi.
Ṯa@liim ṯir ŋǝluŋ nǝ ŋɔrṯɔ ŋir rerrem.
Laazim aari @alliima nǝ aari bǝshirǝ tok ŋiɽaŋal-ŋi ŋɔ. 3 Mǝ kweere nyithak aari @allima ṯa@liim-thi ṯiti ṯaaɽinna ŋiɽaŋali ŋǝthi Kweeleny kwǝri kwǝni Yǝcu Kwɔrɔstɔ mac, nǝ etheere aaɽanni ṯa@liima ṯǝthi ḏiin ṯǝri mac tǝ, 4 nɔŋwɔni kwaaŋa ǝwiny-lǝ dok-dok ṯippiŋǝ-thi rogɽo, nǝ nɔŋwseere elŋe ŋeere ḏuṯ. Nɔŋwaṯhi sɔɔrɔma kwigii kwǝthi-gi ɔppɔpathalɔ, kwǝṯaava ŋurrǝthǝ ŋǝthi ŋwɔɽɔjɔ ŋweere-ŋweere, mindaŋ ǝṯi ŋiɽaŋal ŋɔ aava kee-ŋwɔ ŋiɽany, ṯundǝnnǝnǝ, yɔvɔɔlɔ, nǝ ṯurtunǝnǝ ṯigii, 5 nǝ lǝṯǝthi ṯɔppathalɔ dok-dok ṯǝthi lizi kila lǝthi ŋaɽinyi ŋeeŋen ŋiti ŋirllalɔ mac, liti lǝthisi-nǝ ŋeere ŋir rerrem kwokwony mac. Ǝṯiraarɔŋw, ḏiin ṯir ṯaay ṯǝthi-thi oro lɔrṯɔ. 6 Imba, ḏiin ṯǝṯi ruusi kwizi kwɔrṯɔ rac, mɔŋw aarɔŋw kwomne ŋgwa kwǝthi-nyii kwuuru-ṯǝŋw. 7 Aatha kwɔrɔ kweere kwɔmǝr ǝnyjǝ ki-ṯurmun-nǝ? Kwende kweere! Nǝ aatha kwɔrɔ kwǝr dimmǝ kithaay ki-ṯurmun-nǝ? Kwende kweere! 8 Ŋwɔṯaŋw, mǝrǝthi ethneya, nǝ yirethi tok tǝ, nɔŋw-ṯǝni kwuuruŋw. 9 Laakin kila lǝthi sɔɔrɔma ethoro lɔrṯɔ tǝ, ǝṯir ǝnḏi ki-ṯɔmɔmma-na, mindaŋ ǝṯisi kerlleny iithi kǝthi sɔɔrɔm kwigii beṯṯen, kwǝṯisi mɔltɔtatha kineŋge-kineŋge ethi kiirathalɔ. 10 Kaka nɔrɔ-gwɔ ṯimiidatha thi gwuruush ṯɔvɔɔ ṯǝthi ŋikiya tatap. Nǝ lokwo ǝthi sɔɔrɔma beṯṯen ethǝthi, mindaŋ nǝr ṯɔɔthi ki-ṯǝmminǝ-nǝ na nǝsi rɔgwor reeŋen kaṯṯɔ kwɔrop ṯɔrɔɔnyɔna-thi ṯittazir.
Ŋimiitha ŋǝthi ŋɔgrɔstiyan.
11 Laakin ŋa kwir kwɔr kwǝthi Allah tǝ, ǝsi ɔrlacci ŋwɔdoŋw ŋɔ tatap. A ǝllici ŋirllalɔ ŋɔma tig-tig, ethi ṯeenye Allah, ethǝthi ṯǝmminǝ, nǝ ṯamɽa, ǝnyji ŋwaaralɔ tetter, nǝ iiɽǝnni tok. 12 Ǝṯi ṯɔgthi ṯɔthɔgtha-thi ṯisaaw ṯǝthi ṯǝmminǝ; ǝginicǝ rogɽo rɔɔŋwa ŋimiitha ŋǝṯi nannatha dok-dok, ŋa ŋɔrnacar-ŋǝsi kinaŋw nɔrwǝzǝ-ŋǝsilɔ ŋisaaw ŋǝthi ṯǝmminǝ ṯɔɔŋwa kiyǝnǝ yǝthi shuhuuḏ kwittǝzir. 13 Kiyǝnǝ yǝthi Allah wǝṯi miithi kwomne tatap, nǝ kiyǝnǝ yǝthi Kwɔrɔstɔ kwǝni Yǝcu, kwɔgitta shahaaḏa kwiccaw kiyǝnǝ yǝthi Biilaaṯɔs Albɔnṯii. 14 Nyii ŋgwa kwɔɔracca-ŋa ethi mithǝ waamira wɔ wɔsɔɔɽɔ, ethi iinyici naana kwiira fǝthiyǝ-nǝ kweere mac, mindaŋ mǝ Laamin iila kila linḏi-li ethi Kweeleny kwǝri kwǝni Yǝcu Kwɔrɔstɔ ethi ruwǝnnǝlɔ. 15 Nǝ ṯurwǝnnǝlɔ ṯuuŋwun ṯinḏi ethi ruuthǝ ki-lɔɔmɔr-la kila lɔvthanna lǝlli Allah wir Mǝlik, wɔrtanna wumthi ŋeelenyi wɔtɔpɔt, wir Mǝlik kwǝthi limǝlik, nǝ Kweeleny kwǝthi leeleny-ŋa. 16 Wundǝr-ṯǝ wɔtɔpɔt wǝṯi nannatha dok-dok, wǝṯi nanni ki-fɔɔri-na kwiithɔ beṯṯen kwiti kwǝthicǝ kweere ŋɔma mac ethi dɔŋgwatha naana keṯṯok. Wala ethi kwizi kweere ǝthi ŋɔma ethi ese ŋunduŋw. Ethi ṯiiɽǝnǝ oro ṯuuŋwun, nǝ ŋɔma ŋǝṯi nannitha lur tok. Amiin.
17 Ɔracca lɔrṯɔwa lǝthi kwomne-ŋgwɔ kwǝthi ṯurmunnǝŋw etheere piŋi ṯogɽo reeŋen mac, etheere kittatha ki-ŋɔrṯɔ ŋa ŋǝṯernene mac, laakin ethi kittatha naanɔ-gwɔ Allah, wǝṯi-nyji inḏǝthǝ kwɔmne ṯaṯap eṯhi-gi ami rɔgpɔ-na rari. 18 Ɔaccasi ethoro lizi lisaaw, ethoro lɔrṯɔ ki-ŋothɽor-na ŋisaaw, ethoro lizi lǝṯi iṯithǝ-lɔ, nǝ ethi ǝmmini ethisi duŋgwǝci lithaathɔ ethi ɔɽɔmaṯṯi kwomne-na kweeŋen. 19 Nǝ ṯaay-thi ṯǝ kɔthɔ, ǝri awanni ŋɔrṯɔwa ŋinḏi ethoro ṯɔgwagiza ṯifirlli tetter ṯǝthi kwaathan-ŋwɔ. E-ta ǝri-mǝ ǝthi ŋɔma ethi ǝgini ŋimiitha, ŋir ŋimiitha ŋir rerrem.
20 Yaa Ṯiimɔɔthaaws, aŋricasi ŋa ŋǝccǝr-ŋǝ-ŋi wǝkilǝ-lǝ ethisi aŋraci. Tuccǝ kenyjera-na ŋga tuk kir-talɔŋw, nǝ ṯɔppathalɔ kitha ṯir ŋeeɽer domony ṯǝṯi lizi lokwo ǝnyjici yiriny ŋǝluŋi yǝni “Ṯilŋiṯṯana.” 21 Kaka naarir-gwɔ lokwoŋw ṯǝthi-nyii. Mindaŋ nǝr ṯuusi ṯaay ṯǝthi ṯǝmminǝ.
Ethi ne@ma kwǝthi Allah naani ŋaaŋa-li tatap.