Niizaam kwǝthi ṯɔgwɔccalɔ kǝniisǝ-nǝ.
1 Nyii kwutuurǝccǝ-ŋǝsi-lǝ tur ker-kerreny, ethǝrici lizi tataɔ ki-yiiriny, kwomne-gi ŋgwa kwǝṯir naŋni, ṯaara kiyiiriny, nǝ ethi ǝccǝ Allah shukran kwǝthi lizi tatap, 2 ethǝrici muluuk-gǝ kiyiiriny, nǝ kila limthi sɔlṯa tok, mindaŋ mǝr aami nannɔŋw nethre ŋisaaw, lithiinya Allah nǝ wiiɽǝrnǝ tok. 3 Ŋiɽaŋal ŋɔrɔŋ ŋisaaw beṯṯen, nǝ ǝṯir ǝmi Allah-na wir Kwiglǝthǝ kwǝri, 4 wǝṯi naŋni lizi tatap ethi kilaaw, mindaŋ ethisi elŋe ŋa ŋir rerrem. 5 Kaka ninaani-gwɔ Allah wɔtɔpɔt, nɔŋw naani kwette kwɔtɔpɔt kwǝṯi ǝmmithi lizi-nǝ Allah-yi, kwindǝr-ṯǝ kwǝni Kwɔrɔstɔ kwǝni Yǝcu kwir kwizigwunǝŋ, 6 kwithiŋacca lizi tatap rogɽo-lɔ ruuŋwun ethisi ǝyici. Nǝroro ŋɔ ŋir shahaaḏa kwɔmǝ rattathi ki-lɔɔmɔr-la lɔvthanna. 7 Nǝ nǝrṯoro ŋɔ mindaŋ nǝr-nyii alla ethoro mɔbǝshir nǝ kaavɔr tok. Ŋandisa-nyji ŋɔ ŋir rerrem, nyii kwiti kwukǝkkǝ ŋǝluŋi mac. Ninyoro mɔ@allim kwǝthi Umam ki-ṯǝmminǝ-nǝ, nǝ ŋa ŋir rerrem tok.
8 Ninyǝthi sɔɔrɔma ethi lɔr aari kiyiiriny ǝzir naana tatap, lallilliza rii-la rirllinǝlɔ ter, liira ŋǝriyǝ ki-rɔgwor, ŋuwǝzǝ tok, 9 na nǝnyii naŋni layɔ tok ethi kenne yirethi yisaaw ethisaami kenneŋw ŋǝmmǝŋ, liti lǝṯi ɔgɽatha ŋaamali ŋir surṯǝnnǝ yǝwɽu naana mac, ya ŋir ḏahab, ya ŋir lu-u-lu-u, ya yirethi yir ghaali, 10 laakin kaka nɔrɔr-gwɔ laaw lǝthi Allah tǝ, ethirsi ǝrri-ri ŋisaaw. 11 Ethi kwaaw aari @allima ŋundu-tǝ kwɔnaanɔ pǝt, kwǝjlinnǝ ki-rogɽo. 12 Nyii kwiti kwǝmminǝ mac ethi kwaaw kweere aari @allima wala ethǝthi sɔlṯa ki-lɔr-la, ŋɔvthanna ethi naani pǝt 13 Kaka nigittinǝ-gwɔ Aḏam ker-kerreny, nǝ Hǝwǝ tǝ kwaathan. 14 Nǝ Aḏam ere oro mac kwɔgǝɽinyjǝr-lɔ, laakin nǝ kwaaw oro kwugǝɽinyjǝr-lɔ mindaŋ nɔŋw kiici Allah Sherii@a-na. 15 Laakin kwaaw kwinḏi ethi kilaaw ŋelŋe-ŋi, mɔŋw elŋe nyɔɔrɔ, nǝ mɔŋw tǝ nannitha ki-ṯǝmminǝ-nǝ nǝ ṯamɽa-ŋa ṯirllinǝ-thi-lɔ ter, nǝ ṯǝjlinnǝ ki-rogɽo.