Ṯaaginna-ŋǝ ṯɔrtatha-thi.
1 Nyii kwɔrɔ kwǝni Bɔɔlɔs, kwir kaavɔr kǝthi Kwɔrɔstɔ kwǝni Yǝcu, waamir-yi wǝthi Allah wir Kwiglǝthǝ kwǝri, nǝ wǝthi Kwɔrɔstɔ kwǝni Yǝcu kwir ṯǝkkizǝ kizǝn ṯǝri.
2 Nyii kwɔlɔcca-ŋa ŋaaŋwɔ kwǝni Ṯiimɔɔthaaws, kwir tɔr tiinyi rerrem ki-ṯǝmminǝ-nǝ:
Ǝthi-ŋǝ Allah wir Papa nǝ Kwɔrɔstɔ kwǝni Yǝcu kwir Kweeleny kwǝri inḏǝthǝ ŋaaŋwɔ ne@ma-ŋwɔsi ŋimɽi-ŋi nǝ ŋiiɽǝnnǝ tok.
3 Nyii kwɔɔracca-ŋa kinaŋw ninḏinyii etheele Makḏuuniiyyǝ, ethi naani ŋa Afasuus, mindaŋ ethi ṯiinyini lizi kila lǝṯaari @allima ṯa@liima ṯir ŋǝluŋw. 4 Andicasi ethisi duŋgwǝci ŋa ŋir ŋiŋeeroŋw-lɔ domony, nǝ ŋǝṯirsi mimiɽi-na ŋǝthi lugwurnǝ lǝthi kerreny-ŋwɔ tuk, ŋǝṯi aava ɔppathi-ŋwlɔ domony, nǝ aṯireere ǝrrici Allah karatha keere kuuŋun mac ŋa ŋilŋithina ṯǝmminǝ-thi. 5 Nǝ karath kǝthi waamir wɔ oro ṯamɽa kitha ṯǝṯi ruuthǝ ki-rɔgwor-na rɔsɔɔɽɔ cɔr-cɔɽic, nǝ rɔgwor-ri risaaw, nǝ ṯǝmminǝ ṯir rerrem. 6 Lizi lokwo lǝni limǝ ɔrlacci ŋiɽaŋali ŋɔ ŋwɔdoŋw, mindaŋ nǝr ṯuusi ṯaay ṯeeŋen ŋiɽaŋal-ŋi ŋɔ ŋǝthi ɔppathalɔ kwir ŋǝɽiyǝŋ domony. 7 Nǝr naŋni ethoro mɔ@allimiin kwǝthi Sherii@a kwǝthi Allah, laakin ǝṯirseere elŋe ŋaṯa-ŋa ŋette-ŋette ŋǝṯirsi andasi mac, wala ethelŋe kwomne ŋgwa kwǝṯir-gi aarɔŋw kwilŋiṯṯiny-nǝ.
8 A kwilŋithir-pǝ rac ethaarɔŋw Sherii@a kwisaawi mǝgi kweere aami akki ŋothɽor-ŋw. 9 Laakin ilŋithirsi ŋɔ ethaarɔŋw, Sherii@a kwiti kwɔgitticar lizi lɔvthanna mac, laakin nǝr kettice kila ligii, lir lɔdɔrllathɔ kila liti lǝṯi ṯeenye Allah mac, ligii rɔgwori, nǝ kila liti lǝṯi iiɽi Allah-na mac, wala kwomne kweere kwirllinǝlɔ, kila lǝṯi endinye rǝrnyin-ŋwɔsi lǝnyin-ŋǝli, kila lǝṯi kegitte dimmiya, 10 nǝ nɔŋworo kwǝthi kila lir liijin, lǝṯi inḏinḏiri lɔɔrɔ, kila lǝṯi nyiimi lizi ethisi illilla, lǝluŋw, nǝ kila lǝṯi kette shahaaḏa kwir ŋǝluŋw, nǝ kweere nyithak kwir ḏiḏ ṯa@liim ṯir rerrem. 11 Nǝ ṯa@liim kitha naani ki Inyjiil-nǝ ṯǝccicǝr-nyii wǝkilǝ ethi ruwǝzǝlɔ, ṯir ŋiɽaŋal ŋisaaw ŋinḏi naani-gwɔ Allah Wɔrtanna wir Kwinith.
Bɔɔlɔs nǝccǝ-ŋgwɔ Allah shukran kwǝthi ŋimɽi ŋuugun.
12 Nyii kwǝccǝ Kwɔrɔstɔ-ŋw shukran kwǝni Yǝcu kwir Kweeleny kwǝri kwinḏǝthǝ-nyii ŋɔma ŋǝthi ŋothɽor ŋiinyi. Na nǝmminǝ-ŋgwɔ tok ethi ruusi nyuŋwɔ kwirllalɔ kwǝthi ŋothɽor ŋuuŋun, 13 nǝṯiny-vǝ kinnǝni andindasa ŋiɽaŋali naana ŋigii kerreny tok, nǝ nǝṯiny-gwɔ ǝwɽi yǝy-lɔ, nǝ nǝṯiny-gwɔ ollollo ŋunduŋw; laakin nǝnyii Allah ǝthici ŋimɽiyǝ-nǝ, kaka niti nǝthi-nyii ṯǝmminǝ kinaŋw kinnǝni mac, ŋwɔṯaŋw nǝnyji-mǝ ere elŋe ŋa mac ŋǝṯi-nyji ǝrri. 14 Ŋwɔṯaŋw nǝnyii Kweeleny kwǝri balsa ne@ma naana kwuuŋwun kwuuru, mindaŋ nɔŋw inḏǝthǝ nyuŋw ṯǝmminǝ-ŋwɔsi ṯamɽa-thi ŋiɽaŋal-ŋi ŋǝthi ṯɔɽɔmaṯṯa ethi Kwɔrɔstɔ-na kwǝni Yǝcu. 15 Ŋiɽaŋal ŋɔ ŋir rerrem ethisi ǝmmini min-min ŋǝniŋw: Kwɔrɔstɔ kwǝni Yǝcu kwɔmǝ iila ki-ṯurmun-nǝ ethisi kilǝthi ligii. Nǝ ninyoro nyii rerrec kwigiyathalɔ beṯṯen ethi deŋgen-la atap; 16 laakin nǝnyii Allah ǝthici ŋimɽiyǝ-nǝ, mindaŋ ethi Yǝcu Kwɔrɔstɔ ǝthi ŋɔma ethi baaŋaci nyuŋw ṯindinyanna naana ṯir min-min ṯuuŋwun duŋgwiny-ŋgi, kwɔthǝmthisi-lǝ tatap ŋikiya-ŋi. Mindaŋ ethoro mǝthǝl kwǝthi kila tatap linḏi ethi ǝmminici ŋunduŋw, mindaŋ ethaaavi ŋimiitha ŋiyaŋ ŋǝṯi nannatha dok-dok. 17 Ethi ṯiniyǝnǝ-ŋǝ ŋinith-ŋi oro ŋǝthi Mǝlik kwǝṯi nannatha lur, kwǝṯi miithatha dok-dok, kwiti kwǝṯiijini mac, kwir Allah wɔtɔpɔt, ethi nannatha dok-dok. Amiin.
18 Ṯlimɔɔthaaws tɔr ṯiinyi, nyii kwɔŋa ǝccici ŋothɽor ŋɔ wǝkilǝ naaniŋa-gwɔ, ŋa ŋandinna ŋǝni ŋɔɔŋa ŋiɽiiya-ŋi ker-kerreny, ŋwɔṯaŋw ǝsi aavi mindaŋ ǝŋi ṯɔgthi ṯɔthɔgtha-thi ṯisaaw, 19 a duŋgwǝci ṯǝmminǝ ṯɔɔŋwa nǝ ṯɔgwor ṯɔɔŋwa ethi naani ṯisaaw. Nǝ lizi lokwo ere kettice ŋiɽaŋali yǝni ŋǝthi rɔgwor reeŋen mac, mindaŋ nǝr kii ṯǝmminǝ ṯeeŋen. 20 Nǝ deŋgen-na nǝ Hiimiinaayus oro ŋundu-ŋǝ Iskanḏǝr-gi, kila limǝ-nyji ṯiŋacci Shiiṯaana-lɔ, mindaŋ mǝraari @allima etheere andisasa Allah ŋiɽaŋali naana ŋigii mac.