Ŋothɽor ŋǝthi Bɔɔlɔs Ṯasaaluuniiki
1 Liyǝŋgǝri, ŋilŋithi-ŋǝsi rac rogɽo-ri raalɔ ethaarɔŋw raaŋitha ŋgwa kwǝri kwɔraaŋathir-ŋǝsi-gi kwiti kwiira faayitha-na mac. 2 Ŋilŋithi-ŋǝsi rac ŋa ŋǝrrǝr nyjiŋǝ-lɔŋw, nǝ ŋulluthur-nyji-ŋi tok kinaŋw a-naani-nyii kerreny Fiilibbii niti nɔppathi-nyii kinnǝni kinaŋw naaniŋa-gwɔ mac, nǝnyji Allah wǝri inḏǝthǝ ŋuuguli ethi andaci ŋaaŋwɔsi Inyjiilǝ wǝthi Allah kiyǝnǝ yǝthi kila lir ṯuwǝn ṯǝri. 3 Kaka nǝṯi-nyji-gweere andasi ŋǝthi-ŋi ṯuusi ŋaaŋwɔsi mac, wala ethi-ŋi ruuŋwi ŋaaŋwɔsi tok mac, wala ethi-ŋi kǝɽinyji ŋaaŋwɔsi-lɔ. 4 Ki-lɔɔbi lǝthi ŋiɽaŋal ŋɔ tǝ, ǝṯinǝsi andasi nyaamin tatap ŋǝthi ṯɔgwor ṯǝthi Allah, kaka mɔŋgwɔ ruusi nyuŋwsi lɔvthanna, ethi inḏǝthǝ nyuŋwsi Inyjiilǝ, ŋwɔṯaŋw ǝṯinǝsi andasi ŋiti ŋir ŋǝthi-ŋi ǝmi lizi-nǝ mac, laakin ethǝmi Allah-na wǝṯi ṯǝccici rogwori rǝri. 5 Ŋaaaa lilŋithi rerrem kinaŋw mǝnyiila nǝrŋǝsi ere andindaci kandisa-gi ethi-gi biɽǝthǝ ŋaaŋwɔsi yiriny mac wala ethi andaci ŋaaŋwɔsi ṯaay-thi ṯǝthi lucci ṯigiiriŋi tok mac, aw Allah wirṯa wir shuhuuḏ kwǝri! 6 Wala ethi naŋninni ṯiiɽǝnǝ ṯǝthi lizi, naaniŋa-gwɔ alla naanir-gwɔ lir ter. Nǝthinyii-va kinnǝ sɔlṯa rac daŋgal-na kaka yaavɔr yǝthi Kwɔrɔstɔ. 7 Laakin nǝrŋǝsi ṯiici naana jiɽeem a-naani-nyii daŋgal-na, kaka ayyaŋwɔ kwǝṯi aŋraci nyɔɔrɔ nyuuŋwun. 8 Nǝ kaka namɽar-ŋǝsi-gwɔ beṯṯen, nǝnyii kittatha ethi inḏǝthǝ ŋaaŋwɔsi ŋimiitha ŋǝri tok, nǝ Inyjiil wǝthi Allah ere oro ṯɔɽɔk mac. Kaka ninaaniŋa-gwɔ rerrem ki-rɔŋwor-na rǝri.
9 Liyǝŋgǝri ŋaaŋa likithaayina rac rerrem ŋothɽor ŋakki-nyji nǝ ṯurvǝ ṯinḏa-nyii, ŋǝni ŋakki-nyji aŋgwɔrɔ, ŋakkinasi-pa yulŋǝ yaaŋwɔnɔ, mindaŋ etheere uvuni kweere kwaalɔ ṯɔɔvi mac, kinaŋw nǝccǝr-ŋǝsi bǝshirǝ Inyjiilǝ wǝthi Allah. 10 Ŋaaŋa lir shuhuuḏ kwǝri, nǝ Allah tok, ŋethre-ŋi ŋǝri ŋaaŋa-li kila lǝthi ṯǝmminǝ, ŋǝni ŋirllinǝlɔ ter, nǝ ŋirllalɔ ŋiti ŋǝthi lɔɔma-na leere mac. 11 Nǝsi elŋe tok, nuruuzǝr-ŋǝsi-gwɔ kaka ŋǝṯisi papa ǝrrici nyɔɔrɔ nyuuŋwun, nǝrŋǝsi ɔkkwazi tatap, nǝrŋǝsi firllasi-la tok, 12 ethi nanni ŋethre ŋɔvthanna ŋǝthi Allah, wa wɔrnaca-ŋǝsi Ŋeelenyi ŋuuŋun nǝ ŋinithi ŋuuŋun tok.
13 Nǝ sǝbǝb naani kwette tok kwǝṯiny-gi ǝccǝ Allah shukran. Kinaŋw mǝrŋǝsi ǝvicǝ ŋiɽaŋali ŋǝthi Allah, nǝsi neŋne mindaŋ nǝsi mithǝ, ŋiti ŋir kaka ŋǝthi kwizigwunǝŋ mac, laakin ŋir kaka ŋiɽaŋal ŋir rerrem ŋǝthi Allah, kaka nakkir-gwɔ ŋɔthɽor daŋgal-na kila lǝthi ṯǝmminǝ. 14 Noro ŋaaŋa liyǝŋgǝri kaka mǝthǝl kwǝthi yǝniisǝ yǝthi Allah ethi Kwɔrɔstɔ-na kwǝni Yǝcu, kiya yinaanɔ Yahuuḏiiyyǝ, kaka ninḏaŋa-gwɔ ṯurvǝ ki-rii-na rǝthi lizi laalɔ, kaka-ṯǝ kitha ṯindǝthǝsi Yahuuḏ. 15 Kila-ṯǝ kila limǝ ɽeenye Kweelenyi kwǝni Yǝcu-ŋwsi liɽii-li, mindaŋ nǝrnyji ǝwɽi yǝy-lɔ. Ǝṯireere ǝmi Allah-na mac! Ǝṯiroro ṯuwǝn ṯǝthi lizi tatap! 16 Nǝ ǝṯir kǝniny ṯǝccici ethi ṯiinyini nyuŋwsi etheere ǝccǝ Umama bǝshirǝ mac, ŋiɽaŋali ŋinḏisi ethisi ǝvicǝ ŋiglǝthǝ. Nǝ ŋiɽaŋal-ŋi-ṯǝ ŋɔ ǝṯir urǝzi ŋikiyaŋi ŋeeŋen kworo deddep. Laakin lǝzi-vǝ-tǝ hɔkwɔm wǝthi Allah ɔɽatha-na rac!
Sɔɔrɔm kwǝthi Bɔɔlɔs ethisi raŋitha kwokwony.
17 Laakin liyǝŋgǝri, kinaŋw nurucǝr-ŋǝsi-nǝ kinnǝni tok, ki-bɔmɔr-la-ṯǝ kɔlɔ lokwo yaŋna-yi domony, rɔgwor-tǝ bǝri. Nǝnyii ṯǝccici tig-tig, sɔɔrɔm-gana kwɔppa kwimni ethi isithi ŋaaŋa-li kiyǝnǝ kwokwony. 18 Nyiiŋǝ linaŋna ethi aaɽitha naaniŋa-gwɔ-Nǝnyii ṯǝcci rogɽo-ri riinyi nyaamin-na nyeere nyiɽǝn ethaaɽa, laakin nǝnyji Shiiṯaan ere kettice ṯaay mac. 19 Ǝyǝ-ŋǝ lir linḏi ethoro ṯǝkkizǝ kizǝn ṯǝri, ṯinyiŋlana ṯǝri, nǝ taŋgi tǝri ethi ǝllini ki-rogɽo kiyǝnǝ yǝthi Kweeieny kwǝri kwǝni Yǝcu mɔŋw aaɽa? Ŋaaŋa liti lir-ṯa mac-a? 20 Ŋaaŋa lir rerrem ṯǝllinǝ ki-rogɽo ṯǝri, nǝ ṯinyiŋlana ṯǝri tok!