Ethi aŋraci yaaŋali yǝthi Allah.
1 Nyii kwɔrɔ kwette kwɔrɔ shekh kaka-ṯǝ ŋaaŋwɔsi, nyii kwutuurǝccǝ lishiyuukha-lɔ tur, kila linaanɔ daŋgalna. Nyii kwɔrɔ shuhuhḏ kwǝthi ṯirǝrinnǝ ṯǝthii Kwɔrɔstɔ, mindaŋ mǝnyii aavi lɔɔɽɔŋi liinyi lǝthi ŋinith ŋinḏi ethi ruwǝnnǝlɔ. 2 Ǝmminǝr ethi aŋraci yaaŋali yǝthi Allah kiya yindǝṯhǝr-ŋǝsi, kaka-ṯǝ ŋa ŋinaŋnathi-ŋǝsi Allah, liti lidii rɔgwor-na mac. Akkir ŋothɽor ŋaalɔ, ŋiti ŋir ethi-ŋi aavi ɔjra domony mac, laakin ethǝthi sɔɔrɔma kwǝthisi-gi ǝrri. 3 Ǝṯeere ṯǝcci ethisi mithǝ kila likitticar-ŋǝsi ki-rii-na ethisi annisalɔ tetter mac, laakin oro kǝniny mǝthǝl kwisaaw kwǝthi yaaŋal. 4 Na mǝ Kweeleny kwǝthi nyaaɽa ruwǝnnǝlɔ tǝ, aavi ɔjra wǝthi ŋinith, winḏi ethi nannitha dok-dok. 5 Ŋwɔṯɔŋw tok, ŋaaŋa kila lir lɔr lokwɔɽony kinnǝni laazim ǝsi iinyici naana kila lɔppa daŋgal-la. Kinnar ŋaaŋa tok ṯǝjlinnǝ ki-rogɽo, ethi mǝccǝthisi-nǝ wɔɽe-wɔɽeny; kaka naarɔ-gwɔ Kiṯaab Kirllinǝlɔ ter ŋwɔ:
“Allah wǝṯoro ṯuwǝn ki-lizi lǝṯi piŋi rogɽo,
nǝ ǝṯɔŋwsi inḏǝthǝ kila ne@ma lǝṯi ǝjlinni ki-rogɽo.”
6 Ŋwɔṯɔŋw, ǝjlinnǝr ki-rogɽo, ki-thii-na ṯǝthi Allah ṯǝthi ŋɔma, mindaŋ mɔŋw dimmǝthǝ ŋaaŋwɔsi-la teṯ, ki-lɔɔmɔr-la luuŋwun linḏi ethiila. 7 Ŋa tatap ŋǝṯi-ŋǝsi urrǝthǝ, ǝsi kettice ki-rii-na ruuŋwun, kaka nǝṯɔ-ŋgwɔ aŋraci ŋaaŋwɔsi 8 Aŋrinnar naana, kiɽiṯir! Nǝ ṯuwǝn ṯaalɔ ṯǝni Ibliis kitha ṯǝṯi irǝri-lǝ jilǝk-jilǝk, kaka sɔndaŋa ǝṯɔ-ŋgwɔ naŋnalɔ kweere ethi yee ethi demne! 9 Ǝnyjǝr ŋwaaralɔ tetter ki-ṯǝmminǝ-nǝ ǝli bɔbli, kaka nilŋithi-ŋǝ gwɔ rac ethaarɔŋw liyaŋgalɔ laalɔ kila linaanɔ ṯurmunǝ naana tatap, kilala-ṯǝ linḏa ṯurvǝ ṯǝŋw tok 10 Laakin mǝ inḏa ṯurvǝ ṯokwo cuk ṯǝ, ǝŋǝsi Allah wǝthi ne@ma, wa wɔrnɔṯɔ-ŋǝsi ethi Kwɔrɔstɔ-na, kwɔŋǝsi ruusi min-min nǝ kwɔŋǝsi ǝnyjǝlɔ kidi-kidir, ŋwɔ firlli ŋaaŋwɔsi. 11 Ethi ŋɔma ŋuuŋun nannatha dok-dok! Amiin.
Ṯaaginna ṯirimthithɔ.
12 Nyii ŋgwa hwɔlɔcca-ŋǝsi juwaaba ŋgwɔ kwɔbla keṯṯok, ṯimǝccǝ-thi ṯǝthi Silwaanus kwuruusǝ-nyii ǝŋgǝri kwette kwir kwɔgrɔstiyan kwir amiin. Nyii kwɔnaŋna-ŋǝsi ethi firllasi ŋaaŋwɔsi-la nǝ ethi ǝccǝ ŋaaŋwɔsi-ŋw, ne@ma kwir-ṯa ŋgwa kwir rerrem kwǝthi Allah. Ǝnyjǝr-gwɔ ŋwaara-na tetter. 13 Kǝniisǝ kir aŋgalɔ kwaalɔ kinaanɔ Baabil, kǝlli Allah-na ŋga kithiŋaca-ŋǝsi ṯaaginna, nǝ Mɔrgus kwir tɔr tiinyi tok. 14 Aginnithisar-na ṯaaginna-thi ṯǝthi ruunyu ṯǝthi ṯamɽa ṯǝthi lɔgrɔstiyan.
Ethi ŋiiɽǝnnǝ naani ŋaaŋa-li tatap lir lǝthi Kwɔrɔstɔ.