Loŋgo Karama ro
1 Mìŋgo loŋgo riyä si Lu gaga'ba amaro ri;
mìtre kporo amba si Lu Yakoba ro ri!
2 Nyèto ŋga loŋgodrieparo o'bi ago mìsi araca;
mìŋgo loŋgo lekyembe o'bi ndi yeṛi ovo be si.
3 Mìvo cekuṛe tu karama amaro rosi,
ondro imba kozarute to'di ro
ago ka'dote diri owo.
4 Ono orivoya ota yi Yisaraele ya,
ota yi ni Lu Yakoba ro resi.
5 Nda ozo ota 'do te lidri Yisaraele ro ri
tuse nda koye kyila be wari Ezipeto robe si.
Meri 'diaza uniako te atavoya ekye:
6 “Mana ŋgaläŋgyi teni kembe amiro yasi;
ma'ba ami te ŋgaläŋgyi amiro o'bane vuru.
7 Tuse ami be rriti ya si, mìzi ma te, ago mapa ami te.
Ni kitoriya oligbiriṛi be ro yasi mazatadri amiro te.
Mojo ta amiro te koroi Meriba roya.
8 Ami lidri maro, migabi, ŋgaemba maro erine;
Yisaraele, male aba miri ta maro erine.
9 Ko miri a'done lu aza be;
Beṛo ko miri lu aza mätune alona.
10 Ma orivoya Lu amiro,
se lofo ami te tesi ni wari Ezipeto ro yasi owo.
Mìpi kala amiro, ago mecana ami 'da.
11 “Oko lidri maro leko ta maro erine;
Yisaraele leko ma orone.
12 Ta'doro ma'ba ànya te taoye taeriako ro ànyaro oyene
koyeyi tase ànya kolebe robe.
13 Aba male lidri maro ri ta maro erine;
aba male Yisaraele'bai ri ta maro orone!
14 Mapena kyila'baazii ànyaro 'da ṛe ndriŋwa
ago mezana kyila'baazii cini ànyaro 'da.
15 Ànya se yana osoro Ma OPI lomvo a'donayi 'da turi ro makandra;
taezaro ànyaro a'dona 'da äduako.
16 Oko mecana ami kifo 'boloto rosi
ago ma'bana epe vocowa ro 'da ami ojone.”