Samisona Gaza ya
1 Tu aza si Samisona oyite Gaza ya, ago nda ndre ronyi'ba aza te lau, ago cite u'dute anya re. 2 Lidri Gaza ro usuyivote ekye Samisona orivoya lau, ta'doro ànya muyidri ndaro te ago riyite nda kwotene ŋgäkyi ana si raa dereŋwa 'bakici ro kala. Ànya riyite titiitiro ŋgäkyi raa, atayite iyivoya ekye: “Mì'de mari madale vo kalayate oko, mà'de gwo nda ufune.” 3 Oko Samisona u'dute le o'bwaro. 'Dooko nda ŋgate, ru käläsi dereŋwa 'bakici ro rote ago eŋgyete ndrwi ice ritu osena robe ndi gbolo na be. Nda 'ba ànya te kufudri ndaro ya ago ŋgyi ànya te ugute le driku'du'du lutu se mile Eberona roya ana roya.
Samisona ndi Delila be
4 Ono vosi Samisona lu toko se äzibe Delila, koribe Vodelero Soreka ro ya ana te. 5 Dri'bai Felesete'bai ro ikyiyite Dehila re ago atayite anyari ekye: “Nyeleye Samisona ago nyusu ŋgase kabe mbara ozo ndra ndäri 'do vona, tana màtavo ndaro robe, mèmbe nda robe ago äru nda robe kamba'ba ro; 'dooko ama cini ba alo alo mòzona tonyo mo'di ro ndi miri kutu 'butealo (1,100).”
6 Ta'dota Delila atate Samisona ri ekye: “Rägu nyiti ŋgase kabe mbara ozo ndra miri 'do tana märi. Ondro ka'do 'diaza kolebe mi embene, mi o'bane mbaraako embena mi eŋwanyeya?”
7 Samisona zatadrite ekye: “Ondro ka'do ànya kembeyi ma te kidro owiako njidrieri kusu rosi, 'dooko ma'dona ndi mbaraako, ago ma'dona ndi oso lidri azi ronye.”
8 'Dooko dri'bai Felesete'bai ro eziyi kidro owiako kusu rote, ago Delila embe Samisona te sina. 9 'Dooko anya 'ba mànoago azaka da'dorute nja zo yasi, ago anya trete ekye: “Samisona! Felesete'bai esayite mi urune!” Oko nda kye kidro kusu rote, oso kodo opiopiro ko'dete asi ya oko kabe lekye 'do ronye. Ta'dota ànya niyi mbaravo ndaro kote.
10 Delila atate Samisona ri ekye: “Mindre, nya ma lo'da, tana nya kowe oga märi. Rägu nyiti ta märi embena mi eŋwanyeya?”
11 Nda zatadrite ekye: “Ondro ka'do embe mate roṛi to'diro se aye losi dri ko sina 'do si 'dooko ma'dona ndi mbaraako, ma'dona ndi oso lidri azi ronye.”
12 Ta'dota Delila ru roṛi to'diro te embe nda te sina. 'Dooko anya trete ekye: “Samisona! Felesete'bai esayite mi urune!” 'Dooko lidri se kai orivoya ruda'dovoya zo yasi. Oko nda kye roṛi te ätu ni kufu ndaro yasi oso kodo opiopiro ronye.
13 Ago Delila atate Samisona ri ekye: “Nya drigba ugu ma lo'da, tana nya kowe oga märi; nyiti ta märi embena mi eŋwanyeya?” Ago nda zatadrite ekye: “Ondro ka'do nyibiṛi korokya njidrieri drikyiri maro rote anda mberekye kodo ro lomvo ago nyembete ce lomvo, 'dooko ma'dona ndi mbaraako, ma'dona ndi oso lidri azi ronye.”
14 Ago ondro nda ku'dute oko, Delila ru korokya njidrieri drikyiri ndaro rote embete ago baṛite anda mberekye kodo ro lomvo. Ago embete anda ce lomvo, ago anya trete ekye: “Samisona Felesete'bai esate mi urune!” Oko nda pimite ni u'duvoya, ese ce te, ndi mberekye be drikyiri opaoparo be.
15 'Dooko Delila atate ndäri ekye: “Nyatana eŋwanye mikye yulu ma, tenye ta ya miro ro itiako märi niya? Nyodo ma te le perena nätu, ago drigba nyiti ŋgase kozo mbara be ndra miri ono tana kote märi.” 16 Delila rite 'du ugu nda ejine inye u'duna amba. Madale nda a'dote rritiro tana anya laga lolivo ndaro tezo, 17 ta'doro äduro oko Samisona iti taŋgye te Delila ri nda atate anyari ekye: “Alo drikyiri maro kote alona. Tana adi mate to Kämäri'ba ro Lu ri ṛoni tuse äti mabe sina si. Ondro ka'do ävu drikyiri maro bete, 'dooko mbara maro okyena ndi, ago ma'dona ndi mbaraako oso lidri azi ronye.”
18 Ondro Delila kunite Samisona iti taŋgye te anyari oko, anya zo lazo te dri'bai Felesete'bai ro ri, ekye: “Nyikyi teri, kpa to'dina tana nda iti taŋgye ndaro te märi.” 'Dooko ànya ikyiyite ago ruyi parata te tro ànya be. 19 Delila leye Samisona te u'dune miṛi anyaro dri, ndi anya zi mano aza te, 'dooko vu drikyiri yola njidrieri drî ndaro rote. 'Dooko Delila eto nda eza te, tana mbara ndaro kyete. 20 'Dooko anya trete ekye: “Samisona! Felesete'bai esate mi urune!” Nda pimite ni u'duvoya, ago usutate ekye: “Maŋgana ndi dritairo ago mä'bina andivo maro ndi ähwiri oso se kyeno 'do ronye.” Oko nda ni kote anjioko OPI e'be nda te. 21 Ago Felesete'bai ruyi nda te ago eweyi mi keci ndaro te tesi. Ànya eziyi nda te Gaza ya, ago embeyi nda te nyori atala rosi; ago a'ba nda te inya uyine kamba ya. 22 Oko drikyiri ndaro go eto orote kpa to'di uvuna vosi.
Odra Samisona ro
23 Ago dri'bai Felesete'bai ro otoyikalate tori 'desi olone ago läri otone lu ànyaro Dagona ri. Ànya ŋgoyi loŋgo te ekye: “Lu amaro 'ba ama te kyila'baazi amaro Samisona opene ṛe.” 24 Ondro lidri kondre nda te oko, ànya ŋgoyi loŋgo räṛu rote lu ànyaro ri ekye: “Lu amaro 'ba ama te kyila'baazi amaro se kepere wari amaro be ago kutufu amba amaro be ono te opene ṛe!” 25 Ondro ànya kayite riyä oye oko, ànya atayite ekye: “Mizi Samisona, mi'ba nda kikyi oji oyene ama kandra!” Ago ondro ànya kolofoyi Samisona teni kamba yasi oko, ànya 'bayi nda te oji oyene ànyari ago 'bayi nda te edrene lakole ritu läŋgyiri roya. 26 Ago Samisona atate ŋgaga se kuru drì ndaro be ana ri ekye: “Mi'ba drì maro läŋgyiri se käti zo be ni iyi lomvo. Tana male ma ätine ànya lomvo.” 27 Lowa mànoago ndi 'ditoko be ro orivoya twi zo ana ya. Dri'bai Felesete'bai ro kpeye orivoya lau, ago mànoago ndi 'ditoko be cini orivoya oso kutu nätu (3,000) ronye drî zo ro ya lau, Samisona ondrevoya oji oyevoya.
28 'Dooko Samisona mätute Opi ri ekye: “OPI Mbarapara, rägu miyi ta maro, molo'baru miri Lu, nyotomba ma, toto pere alo ono si, tana mologo votaro robe Felesete'bai ri ta mi ritu maro se ànya kewebe ono rota.” 29 Ta'dota Samisona omvo läŋgyiri se ritu kitoriya zo roya se zo kätirube driigye iyi te. Drigwo ndaro alo aza lomvo ago drigaṛi ndaro azana lomvo, nda bi ànya te. 30 Ago Samisona trete ekye: “Mi'ba madra Felesete'bai kwoi be.” 'Dooko nda bite mbara cini ndaro si, ago zo 'dete dri'bai ndi lidri se cini kigye ana be dri. Ta'dota Samisona fu lidri amba te tu odra ndaro rosi ndrani se nda kufube 'dooko nda bedri orivoya lidriidriro ana drisi.
31 'Dooko ädrupii ndaro ndi katidri cini ndaro yibe ikyiyite ŋgyiyi avo ndaro te. Ànya oyi seyi nda te lakole Zora ndi Esetaola be roya 'budri täpi ndaro Manoa roya. Nda a'dote dri'ba Yisaraele ro ndroa na 'buteritu.