Yesu ka Miomba Ozo ta Parusii ndi Miemba'bai Ota robe ta
(Marako 12:38-39Luka 11:43Luka 46Luka 20:45-46)1 'Dooko Yesu atate lowa ndi taeri'bai ndaro be ri ekye: 2 “Miemba'bai Ota ro ndi Parusii be ni drikaca'bai Ota Musa ro tazevona edre'banai. 3 Ka'do inye beṛo ämiri orone, ago osone tase cini ànya kayibe atana ämiri oyene 'do voro; caoko mìso ko taoye ànyaro voro, tana tase ànya kayibe opena yeyi ko. 4 Ànya 'bayi ŋgaläŋgyi se läŋgyiekye ago rritiro uŋgyine ono te lidri kyembe, caoko ànya orivoya oleako ca ŋgaläŋgyi se ànya kai be uŋgyina ana odone driŋgwa ànyaro si. 5 Ànya kayi ŋga cini oye ekye lidri kondre iyi robe, mìndre taegyi se ni taegyi yasi ànya koloseyibe gboloŋwà sisi koyiyibe militi ànyaro ndi kufu be yasi 'do, ago mindre a'do 'desi ànyaro! Ago mindre a'do kaca bindi boŋgo runduṛuro ànyaro ro! 6 Ànya luyi vo oriro se kadopara ayani karama ya ndi vo oriro se kado zoitaeriro yasi 'do be; 7 ànya leyi lidri ri mede oyene iyi ri taoro si vo ŋga logyero yasi, ago leyi iyi uzine ‘Miemba'ba.’ 8 Beṛo ko ami uzine ‘Miemba'ba’, tana ami cini orivoya ädrupii amivoya ago ami toto Miemba'ba alodi be. 9 Beṛo ko ämiri 'diaza uzine ‘Täpi’ noŋwa 'bädri ya, tana ami toto Täpi alodi be vo'buyakuru ya. 10 Mì'ba äzi ami ko ‘Dri'ba’, tana ami toto Dri'ba alodi be se ni Mesiya. 11 Nda se 'desi para ami lako ono beṛo a'done ruindu'ba amiro. 12 Nda se kabe andivo iro eŋgana kuru ologona 'da vuru, ago nda se kabe andivo ndaro logona vuru eŋgana 'da kuru.
Yesu ka Miomba Ànyaro Kozina
(Marako 12:40Luka 11:39-42Luka 44Luka 52Luka 20:47)13 “Rritiro ämiri ami miemba'bai Ota ro ndi Parusii be! Ami miomba'bai ono! Nyà käläsi Miri 'Bädri'ba vo'buyakuru ro osena lidri milesi, oko andivo amiro mìci ko kigye, ago ànya se koleyibe ocine kigye nyàlaga kpa zo!
15 “Rritiro ämiri ami miemba'bai Ota ro ndi Parusii be! Ami miomba'bai ono! Nyà udi toŋbo si gyi'desii drisi ago mìzate 'bädri cini yasi 'di alodi o'bane drietane, ago ondro ketadrite oko, mì'ba nda te oyine gehena ya perena ritu ndrani andivo amiro drisi!
16 “Rritiro ämiri ami lepe'bai miako ono! Nyà miemba mìkye: ‘Ondro ka'do 'diaza ka ruäṛu Yekalu si, embe nda ko ta ruäṛu ndaro si; oko ondro ka'do nda ka ruäṛu logo läguläguro Yekalu ya si embe nda te ta ruäṛu ro ndaro si.’ 17 Ami miako'bai amamaro ono! Se eŋwani ni parandra, logo läguläguro kode Yekalu se kani logo läguläguro o'ba alokado ono ya? 18 Nyà kpa miemba mìkye: ‘Ondro ka'do 'diaza ka ruäṛu vo tori oloro si, embe nda ko ta ruäṛu ndaro si; oko ondro ka'do nda ka ruäṛu ŋgapäṛi se vo tori oloro dri si, embe nda te.’ 19 Ami miako ono! Eŋwani ni parandra, ŋgapäṛi kode vo tori oloro se kani ŋgapäṛi o'ba alokado ono ya? 20 Ka'do inye, ondro lidri ka ruäṛu vo tori oloro si, nda ka ruäṛu sina ndi ŋgase cini driigye 'do be; 21 ago ondro nda ka ruäṛu Yekalu si, nda ka ruäṛu sina ndi Lu se kabe ori kigye 'do be, 22 ago ondro 'diaza ka ruäṛu vo'buyakuru si, nda ka ruäṛu giti Lu rosi ndi nda se kabe ori driigye 'do be.
23 “Rritiro ämiri, ami miemba'bai Ota ro ndi Parusii be! Ami miomba'bai ono! Nyà telesi alo 'butealo ŋga oso kwoi ronye ro ozona Lu ri äṛuku, nduṛu ndi lawi be, oko mìti ta ŋgaembaro se endaro ndra Ota oro ro ono kote, oso taŋgye yauni ndi ta'diri be ro ronye 'do. Beṛo ämiri se kwoi oyene, ko azakana e'bene tana otiako. 24 Ami lepe'bai miako ono! Nyà kumu ona ni ŋgaumvuro amiro yasi, oko nyà gamele ote!
25 “Rritiro ämiri, ami miemba'bai Ota ro ndi Parusii be! Ami miomba'bai ono! Nyà lomvo tesisi kofo amiro ro ndi deŋbele amiro robe ojona, oko ya yasi na twi ŋgase miru be kyila si ndi ta andivo o'baro käti be. 26 Ami Parusii miako ono! Mijo ya kofo ndi deŋbele be ro käti, 'dooko lomvo tesisi na a'dona kpa wäṛi!
27 “Rritiro ämiri, ami miemba'bai Ota ro ndi Parusii be! Ami miomba'bai ono! Nyàlandre oso 'budri se ändrube onjero ronye, se ondrena tesisi liŋgyi tawi oko orivoya twi kowa be ago avo oŋgwaoŋgwaro be yana ya. 28 Kpa oso inye, tesisi nyàlandre ndi kado 'dicini mile, oko ya yasi amiro orivoya twi miomba be ago takozi be.
Yesu ka Taezaro Ànyaro Tana Ata
(Luka 11:47-51)29 “Rritiro ämiri, ami miemba'bai Ota ro ndi Parusii be! Ami miomba'bai ono! Nyà 'budri nebii ro obe liŋgyiekye ago nyà lusi ànya se kori ori kado be ro tirana; 30 ago nyà ata mìkye, ondro aba ka'do yiri gwo ni tu zutui iro rosi, yìle ko tase ànya koyeyibe ago kutufuyi nebii be 'do oyene. 31 Ka'do inye mìnite endaro anjioko ami ṛoni zelevoi ànya se kutufuyi nebii be kai ro! 32 Ka'do inye, nyà ugu tase zutui amiro ketoyibe ana ondena! 33 Ami inii ago ŋgwai ini ro ono! Nyà mio'ba ruopane ni rueza gehena ro yasi ono eŋwanye ya? 34 Ago mata ämiri ono mezona nebii ndi lidri tavouni'bai ndi miemba'bai be 'da amire, nyùtufuna azaka ànyaro 'da, nyòtona azakana 'da ago mìkyuna azaka ànyaro 'da zoitaeriro yasi ago mìjana ànya 'da ni 'ba'desi yasi le 'ba'desi kinjona ya. 35 Taezaro ta lidri taŋgye'bai tufuro ikyina 'da ämidri, etona ṛoni ufu taŋgye'ba Abele roya le ufu Zakaria ŋgwa Berekia ro roya, se mìfute lakole vo tori oloro ndi vo Alokado robe ya ana. 36 Endaro mata ämiri ono, taezaro ta 'dise cini äfube kwoi ro ikyina 'da lidri tu ono ro dri.
Ŋgalu Yesu ro Yerusalema ta
(Luka 13:34-35)37 “Yerusalema, Yerusalema! Mifu nebii ni ago mivo lazo'bai se Lu kezobe mire iyi ni kuni si! Perena te moda se male ndi lidri miro otone voaloya oso täu kabe ŋgwai anyaro otona kufui anyaro zele ronye, oko migazo! 38 Ka'do inye e'bena Yekalu miro 'da ago a'dona 'da awi. 39 Mata miri ono, etoni yauono, miri ma ondrene to'di te i'do alona, madale nyatana lutu mikye: ‘Lu käṛu nda se kabe ikyi ävuru Opi roya ana.’ ”