Tavoata Ṛiri
Taata Elipaza ro: 'Dise Kozi Unina ko Ruopane
1 Elipaza Temana'ba zatadrite ekye:
2 Inye'do mano se tavouni'ba ro ozona tadri ndi ata awi.
Si, ago yana a'dona ndi twi ata awi be ya?
3 Inye'do nda dilina kala ndi ata anya takaciako 'do si
ata anya ye takado ko 'do si ya?
4 Nya taoro oye Lu ri ondrena ŋgaawi ro, ago 'ba 'di kote Lu mätune.
5 Tana ata miro 'do ka'da taenji miro ṛo ni ago ko ma owo;
ago mile da'done ata tauni ro si.
6 Ata andivo miro ro luku mi gyini ago ko ma;
kala miro edretazevo gyini milomvo.
7 Inye'do mi ni 'dise ätibe käti owo ya?
Kode Lu kabe 'bereŋwai o'bana äti mi teṛo ya?
8 Inye'do nyeri taora se Lu korabe te ya?
Inye'do mi toto ni tavouni be ya?
9 Tase mini be oko mäniko ni e'di ya?
ŋgase minibe oko a'doko ŋbelero ämäri ni e'diya?
10 Lidri se drina konjete ago kodete iyi orivoya ama lako,
se ätite käti ni täpi miro risi iyi.
11 Lu ka mi i'dwe oko nyalamana etaya?
Ca ata ndaro se liyaro, mìti be miri ono si ono.
12 Nya ya miro eŋga ago nya voondre kyila si etaya?
13 Ya miro orivoya osoro Lu lomvo ago nya nda kozina.
14 Inye'do mano aza unina gindi a'done wäṛiro ya?
Kode 'dise 'ditoko kabe utina ni ono a'dona ndi ŋgye ya?
15 Mindre, Lu yi ta kote ca malaikai ndaro ya;
ago ca vo'buyakuru a'do kpa ko wäṛiro mile ndaro ya.
16 Oko lidri se ka taundiro oye enjirute ago a'dona te ti pari,
lidri se ka takozi umvu gyi ronye 'do.
17 Ka'do inye, Nyeri Eyobo, ma oye ka'dane miri,
ŋgase mandrebe ono oye itine miri.
18 Lidri se tavouni be iyi itiyi tase
täpii ànyaro itiyibe ànyari te,
ago da'doyi kote.
19 Tana Lu ozo wari te ànyari
ago atrai riyite ànya lako.
20 Mano se takozi'ba ro 'do orina alo lomvoluwu si.
Tu cini ori ndaro rosi, ndroa se cini adite 'dise siomba'ba ri 'do si.
21 Kporo turi ro ri uwine alo bi ndaro ya,
tuse ndate londroro si, ŋgatopa'bai gotana nda 'da.
22 Nda orivoya mio'ba ako voopaza ni vouni yasi,
tana oye nda ufune,
23 ago koyii kayi avo ndaro kotena onyane.
Nda ni ndi tu ndaro mile ya orivoya odra yi.
24 Kandrakozi, ndi rriti be ka turi oso nda ya,
nja nda gotane.
25 Tana nda ka mi Lu ro ka'da
ago ka mäwu ojo
Lu Mbarapara be.
26 Nda ka voosi biako si ukyine kyila oyene Lu be,
ŋgaruotaro be drì ndaro ya.
27 Militi ndaro te bili, ago ya ndaro esote totro.
28 'Do ni mano se kuru 'bakicii te se 'diaza rikote kigye,
ago se kaoyete a'done tandroro 'do owo.
29 Nda unina ko orine ŋgaamba be.
Ago ŋgaamba ndaro orina ko madaro.
Ca ŋga cini ndaro okyena 'da ni 'bädri yasi,
30 ago nda unina ko voopane ni ŋgätini ri.
Nda labana 'da oso ce se
gwoṛina asi kujete iyi ronye,
ago lawa Lu ro onjana nda 'da lozo.
31 Miba nda kodo andivo iro ko taoyine ŋgase awi ro ya.
Tana 'dooko päläti ndaro a'dona teni ŋgase awi 'do.
32 Nda lunyina 'da teinye tu ndaro ri osaako,
ago gwoṛi ndaro ogo a'done luru ro te i'do alona.
33 Nda a'dona 'da oso kono se doŋgo na kabe layi teinye okaako 'do ronye;
oso ce ice ido ro ro fo nai kabe layi 'do ronye.
34 Tana luako'bai a'donayi teinye zelevoi ako,
ago asi ujena 'bai 'dise kayibe miogye iyi ro 'da.
35 Ànya kayi ta rriti ro orana ago kayi ta undiro oye;
ya ànyaro ondoalo orivoya twi ŋgaodo be.