Lazo OPI ro Yisaraele'bai ri Ezipeto ya
1 OPI atate ma Yeremaya ri ta Yisaraele'bai se kayibe ori Ezipeto ya, 'bakicii Migedola, Tafanesa, ndi Memefisa be yasi, ago wari Paterosa roya yasi ana rota. 2 OPI Mbaraekye, Lu Yisaraele ro, atate ekye: “Ami andivo mìndre taezaro se mezibe Yerusalema ndi 'bakicii cini Yuda robe dri ana te. Ca le ondro ono ànya drigba orivoya tandro ro, ago 'diaza ri kote ànya yasi 3 tana lidri ànyaro yeyitate koziro ago 'bayi mate a'done kyilaro. Tana ànya loyi tori te lui azaka ri ago induruyite lui se ca ànya ca ami ca zutui amiro kämätuyi kote ana ri. 4 Mugu ruindu'bai maro nebii ezona te amire, se itiyitate ämiri ko amiri ŋgase koziro para ya maro osoro lomvoigye ono oyene. 5 Caoko nyèri tana kote ago mìga bi kote tana ya. Nyè'be taloye koziro amiro tori oloro lui azaka ri ono kote. 6 Ta'dota meda kyila maro ndi yaoso maro be te ago maso asi te 'ba'desii Yuda ro ndi litiŋwai Yerusalema robe drisi. E'be ànya te awi ago tandro ro madale tu ondro ono si.
7 “Ka'do inye, ma, OPI Lu Mbaraekye, Lu Yisaraele ro, yauono ma ami eji makye; Tana e'di nyà ŋgase koziro ono oyena, mile taezaro eziza manoàgo ndi 'ditoko be, ŋgàga ndi ŋgwà luruŋwà be dri, tana lidri amiro kokye robe kpeye ni Yuda ya ya? 8 Tana e'di nyà ma o'ba a'done kyilaro lui edeedero mätuna si ago tori olo si lui se Ezipeto ya, vose nyìkyibe orine kigye ono ya ri niya? Nyà tase ono oyena toto andivo amiro tufuzana, tana tu'de cini se 'bädri ya ono kamawoyi ago kotriyi latri robe ävuru amiro siya? 9 Inye'do nyìjeta ŋga kozi cini se zutui amiro, 'bädri'bai Yuda ro ndi 'ditoko ànyaro yibe, ami ndi 'ditoko amiro be, mìyebe wari Yuda ro yasi ago litiŋwai Yerusalema ro drisi ono tana teya? 10 Caoko ca tu ondro ono si ono nyòlogo andivo amiro kote vuru. Mìro ma kote ago mìri kote ota se cini mozobe ämiri ndi zutui amiro be iyi voro.
11 “Ka'do inye, Ma, OPI Mbaraekye, Lu Yisaraele ro, mago ma'dona 'da kyilaro ami yibe ago mutufuna lidri Yuda ro cini 'da. 12 Mandrena ta lidri Yuda ro se e'bebe oko koleyibe oyine orine Ezipeto ya iyi tana 'da, anjioko mutufuna ànya cini 'da. Vo ànyaro ṛo ci, 'desiro ndi giṛiŋwà ro be, todranayi 'da Ezipeto ya, kyila ya kode ni mä'bu ri. Ànya landrena 'da ŋga kozi ro; lidri mawona ànya 'da ago otrinayi latri 'da ävuru ànyaro si. 13 Mezana ànya se koriyibe Ezipeto ya kai 'da, kpa oso meza Yerusalema be, kyila, mä'bu ndi adravo kozi be si ana ronye. 14 Alo aza lidri Yuda ro se e'bebe ago kikyiyibe orine Ezipeto ya ono ro ri voopane kode orine lidriidriro kode ogone Yuda ya, vose ànya kayi vouṛi ogo orine kigye ana ya te i'do. Ànyari ogone i'do e'be gialo se fere ka oye be umune iyi ayani.”
15 'Dooko vo lidri cini ro se kuniyite 'ditoko ànyaro loyi tori te lui azaka ri, ndi 'ditoko se cini kedreyibe lau ana be, tro Yisaraele'bai se koriyibe telesi Ezipeto ro Paterosa ya ana be, lowa se amba ana vona cini, atayite märi ekye: 16 “Màgazo tase nyitibe ämäri ävuru OPI rosi ono tana erine. 17 Màyena amaro ndi tase cini mà'ba tana be oyene 'do ayani. Màlona tori ndi lu tokoro, 'Bädri'ba Tokoro Vo'buyakuru ro ri, ago màsona vino 'da anya ri, kpa oso ama ndi zutui amaro be, 'bädri'ba amaro ndi dri'bai losi ro amaro yibe, màyebe 'ba'desii Yuda ro yasi ago litiŋwai Yerusalema ro drisi ana ronye. Se 'dooko mà'dote ŋgaonya be nyalakpa, mà'dote ŋgadriamba be, ago mà'dote rriti aza ako. 18 Oko mèdrebe teinye tori oloako 'Bädri'ba Tokoro Vo'buyakuru ro ri ago màso vino beko anya ri ono, mà'dote teinye ŋga aza ako, ago lidri amaro todrate kyila ya ago ni mä'bu ri.”
19 Ago 'ditoko se kai atayite ekye: “Tuse màbe tori olo lu 'bädri'ba tokoro Vo'buyakuru ro ri, ago màso vino be anya ri si, agoi amaro leyitadri ni ämari ambata ndiriŋwa beti lu 'bädri'ba tokoro vo'buyakuru ronye 'do o'bene.”
20 'Dooko matate lidri cini manoàgo ndi 'ditoko se kozayitadri maro be oso inye iyi ri makye: 21 “Tori se mìlobe ami ndi zutui amiro be, 'bädri'bai ndi dri'bai losiro amiro be, ndi lidri wari ana robe 'ba'desii Yuda ro yasi ago litiŋwai Yerusalema ro drisi ana; inye'do mìkye OPI ni tana ko kode nda ije tana teya? 22 OPI ni kote takozi amiro ndi taoye kozi amiro be tana iŋgyine ndra, ta'dota wari amiro te tandro ro ago awi. Ondrena landrete koziro para, ago lidri kate latri otri ävuruna si oso ondro ono ronye. 23 Kandrakozi se yauono ko'debe ikyine ämidri tana mìlo tori te lui azaka ri ago mìye takozi te OPI ri ota cini ndaro oroakona si.”
24 Mititate lidri cini ri, ndi 'ditoko be makye: Nyèri tase OPI kabe atana ono ami lidri Yuda ro se kabe ori Ezipeto ya ono; 25 OPI Mbaraekye Lu Yisaraele ro ka ata ekye: “Ami ndi 'ditoko amiro yibe mi'ba tao'ba lämu'duro te ago nyätite se mikye: ‘Mätina tao'ba se màba be ndi tori olone 'bädri'ba tokoro vo'buyakuru ro ri, ago màsona vino ndi ŋgapäṛi ro ana ndi.’ Ka'do inye nyäti tao'ba amiro ago mìye ri! 26 Oko yauono nyeri tao'ba se ma, OPI, ma'babe ävuru mbaraekye maro si Yudai se cini kabe ori Ezipeto ya ono ri ono makye: Alo aza amiro ri ogone tao'bane ävuru maro si atane ekye: ‘Ma ruäṛu ävuru OPI Lu lidriidriro rosi te i'do alona!’ 27 Mandrena tana 'da anjioko ämiri a'done kandrakozi be ago ko kandrakado, nyotodrana 'da kyila ya kode ni mä'bu ri, madale mìkyena go. 28 Caoko fere amiro se kabe voopa ni odra yasi ogona 'da ni Ezipeto yasi le Yuda ya. 'Dooko 'dise kopavobe iyi uninayi 'da kode ata a'di ro a'do ni taŋgyero, maro kode ànyaro. 29 Ono a'dona 'da taka'daro ro ämiri ma OPI matani anjioko mezana ami 'da vo ono ya, tana mini robe anjioko tao'ba maro se taezaro eziro ämidri ono a'dona 'da taŋgyero. 30 Mozona Ofera 'Bädri'ba Ezipeto ro 'da kyila'baazii ndaro rigye ago ànya se koleyibe nda ufune iyi rigye, kpa oso mozo Zedekia 'Bädri'ba Yuda ro be Nebukadenezara 'Bädri'ba Babelona ro, kyila'baazi ndaro se kolebe nda ufune ana rigye ana ronye.”