Ozionya Asaria'bai ro Yerusalema Lomvo
(2 'Bädri'bai 18:13-272 Ambâ 32:1-19)1 Ndroa 'butealo fosu ori Ezekia ro 'bädri'ba ro Yuda dri si oko, Senakeriba, 'bädri'ba Asaria ro, gota 'bakicii se cini obeobero Yuda rote ago ru ànya te. 2 'Dooko 'bädri'ba Asaria ro zo dri'ba 'desi dri'ba kyila'bai ndaro rote oyine ni Lakisa yasi le Yerusalema ya kyila'bai amba be 'Bädri'ba Ezekia dri. Dri'ba 'desi kyila'bai ro ana sate le vose boŋgo ojoro, loto 'bwo'bwo se gyi kabe idi kigyesi ni cece kurulesi yasi ana ya. 3 Ndi lidri nätu Yudai ro efoyite drî ndaro utune; Eliakima ŋgwa Ilekia ro dri'ba 'desi se ni dri'bai losi ro zo miriro ro, egyi'ba vure ro, Sebena, ndi Joa ŋgwa Asafa se ni dri'ba 'desi dri'bai losi ro taegyi'bai ro robe. 4 Dri'ba kyila'bai ro Asaria ro ana atate ànyari ekye: 'Bädri'ba Asana ro ekye, 'Bädri'ba Ezekia ka taoyi e'di ya ya? 5 Nda ejitate ekye: “Inye'do nyùsu amiro be ata orivoya liti ago mbara yi kyila oyeza ya? Mi'debe ogbone Asaria be inye'do yauono nyàte mio'ba a'di dri ya? 6 Nyà mio'ba Ezipeto se laba oso dofo okyiro se kalaŋgo te ronye, se ondro 'diaza kätirute driigye oko osona drì na ndi 'do. 'Bädri'ba Ezipeto ro orivoya oso 'do ronye, ondro 'diaza kätirute nda dri owo.”
7 Dri'ba kyila'bai ro Asaria ro ana ugu atate ekye: “Ondro ka'do nyàta gwo märi mikye yà ruäti OPI Lu amiro dri ayani, inye'do votoŋgoi ndi vo tori oloro se Ezekia keperebe, tuse nda ko'de gwo atane lidri Yuda ro ndi Yerusalema robe ri toto mätune vo tori oloro alodi ya ayani ana roko OPI ro ya? 8 Ka'do inye màle tadri ami yibe ävuru 'desi maro 'bädri'ba Asaria rosi. Mozona farasii ämiri kutu ritu ondro ka'do lidri amiro ka'do gindi amba lämune ànya si owo. 9 Inye'do mìpena ca dri'ba kyila'bai ro Asaria'bai ro se tipari 'do eŋwanye, ondro ka'do nyà mio'ba Ezipeto'bai ri ni arabia cini kyila ro ndi kyila oye'bai farasi si be ezone ämiri ya? 10 Inye'do ma'debe ikyine 'bädri amiro gotane ago perene ono teinye ta OPI ro ako ya? OPI andivona atani märi ikyine 'bädri ono gotane ago perene.”
11 'Dooko Eliakima, Sebena, ndi Joa be atayite dri'ba kyila'bai ro ana ri ekye: “Nyata ämäri kala Arama rosi. Tana mänina ndi takacina unine. Nyata ko ama ruindu'bai miro ri kala Ebere rosi; tana lidri se cini tiṛi drisi iyi kayi ta 'do erina.”
12 'Dri'ba kyila'bai ro logotate ekye: “Nyùsu amiro be 'bädri'ba amaro ezo ma tase cini ono atane toto ämiri 'bädri'ba amiro yibe, ago ko lidri se koriyibe tiṛi drisi, se onyanayi ze ànyaro 'da ago umvunayi kudrä ànyaro 'da kpa oso nyà oyebe oyene ronye ri ya?”
13 'Dooko dri'ba kyila'bai ro se ana ŋgate kurusi ago trete amba kala Ebere rosi ekye: “Nyèri tase 'bädri'ba 'desi, 'bädri'ba Asaria ro kabe atana ämiri ono. 14 'Bädri'ba ekye mi'ba Ezekia kodo ami ko. Ezekia unina ko ami opane. 15 Mì'ba Ezekia ko'ba ami ko ruätine OPI dri, atasi ekye OPI opana iyi 'da ago nda lagana kyila'bai amaro Asaria'bai ro 'da ni 'bakici ono uruvoya. 16 Nyèri ta Ezekia ro ko! 'Bädri'ba Asaria ro ekye nyèfo ni 'bakici yasi ago mì'ba taliatokpe mabe. 'Dooko o'bana ami 'da doŋgo kono ro onyane ni ice kono ro modo amiro ro yasi ago doŋgo kyi'du ro onyane ni ice na se modo amiro ro 'do yasi, ago gyi umvune ni koro modo amiro ro yasi, 17 madale 'bädri'ba ogo o'bana ami gwo 'bädri aza ya se orivoya oso 'bädri modo amiro ro ronye, 'bädri se orivoya inya ago vino be, 'bädri se orivoya ŋgaonya be ago ämvu kono robe. 18 Mimba amidri mì'ba Ezekia kodo ami ko tausune ekye OPI opana ami 'da. Inye'do lui tu'dei azaka ro payi 'bädrii ànyaro gi'da ni 'bädri'ba Asaria ro riya? 19 Lui Amata ro ndi Arepada robe, yauono gaŋwaroya? Lui Sefarevaima ro gaŋwaroya? Inye'do ànya pa Samaria gindi ni nda rigyesi ya? 20 Inye'do lui 'bädri gi cini kwoi ro payi 'bädri ànyaro gindi ni 'bädri'ba amaro rigyesi ya? 'Dooko e'di 'ba ami ni tausune ekye OPI unina ndi Yerusalema opane ni nda rigyesi ya?”
21 Lidri a'dote titiro, ago zayi tadri alodi aza kote oso 'bädri'ba Ezekia katabe ànyari ronye ekye: “Mìzatadri ndaro ko.” 22 'Dooko Eliakima, Sebena, ndi Joa be wayi boŋgo ànyaro te ni tusu ri ago oyiyi itiyi tase dri'ba losi ro Asaria'bai ro katabe ana tana te 'bädri'ba Ezekia ri.