Moaba
1 OPI ekye: “Lidri Moaba ro yeyi takozi te kpe kpe, ta'doro mänina ko ànya e'bene eza ako, tana ànya zayi kowa 'bädri'ba Edoma ro ro te foda torofo ro. 2 Ta'doro masona asi 'da wari Moaba ro dri ago ujena tiṛi mbaraekye Keriota ro 'da riya. Lidri Moaba ro todrana 'da kporo kyila roya, ondro kyila'bai kayite ugu totre ndi cekuṛe ovo be owo. 3 Mäfuna 'dimiri'ba Moaba ro 'da ndi dri'bai cini wari ana robe.”
Yuda
4 OPI ekye: “Lidri Yuda ro yeyi takozi te kpe kpe, ta'doro mänina ko ànya e'bene eza ako, tana ànya gayi taŋgaembaro ma OPI ro tezo ago ätiyi ota maro kote. Ànya soyite lui awi se zutui ànyaro kindurube rigye kai vo. 5 Ta'dota masona asi 'da Yuda dri ago ujena tiṛi mbaraekye Yerusalema ro 'da riya.”
Vure Lu ro Yisaraele lomvo
6 OPI ekye: “Lidri Yisaraele ro yeyi takozi te kpe kpe, ta'doro mänina ko ànya e'bene eza ako, tana ànya gyeyi lidri se ta'diri be te mo'di dri ago gyeyi lemeri'bai te mvokai akpaakparo ro dri. 7 Ànya toyi 'dise mbaraako te durufu ro ago lagayi taŋgye 'dimäyuro ro tezo. Mano alo ndi täpi ndaro be ciyi u'duyi ndi ŋguti alo 'do be, tana ta'doro enji ävuru alokado maro te. 8 Vo cini mätu ro yasi lidri ka u'du boŋgo se ànya kurube yuŋgu dri iyi drisi. Ànya kayi vino se ozobe vo vure ro yasi 'do umvuna Yekalu Lu ànyaro roya.
9 “Ago caoko, mutufu Amora'bai te ànya milesi, lidri se ombana oso omba ice wiri ro ronye, ago ṛatara ro oso ice vudi ro ronye kai. Mutufu gwoṛi ndi pajii anyaro be te. 10 Molofo ami te ni Ezipeto yasi, ago melepe ami te ndroa na 'butesu vocowa yasi, ago mozo wari Amora'bai rote ämiri. 11 Manji rukä ŋgwai amiro rote a'done nebii ro, ago rukä manoto'di amiro ro ma'bate kämäri'bai ro. Inye'do a'do ko endaro inye ya ami lidri Yisaraele ro? Ma, OPI, matani. 12 Oko mì'ba kämäri'bai te vino umvune, ago mì'bidri nebii rote ko lazo maro opene. 13 Ago yauono mikyiyina ami 'da gyinidri, ago mìyena 'da tritri oso arabia se twi inya be ŋgaläŋgyi kabe terina vuru 'do ronye. 14 Ca umu'ba se umuekye opana vo ko; 'dise mbaraekye mbarana okyena 'da, ago kyila'bai uninayi ko andivo ànyaro opane, 15 Lidri se kusu be unina ko edrene vo ànyaro yasi, lidri se umuekye unina ko andivo ànyaro opane, ago lidri se kabe umu farasi si unina ko adri ànyaro opane. 16 Tu gi ana si kyila'bà se turiako lovona lakazà ànyaro kyila ro 'da vuru, ago umunayi 'da.” OPI atani inye.