Mätu Agoambago ro
1 Äye OPI, ma ikyi rugaga mire;
mi'ba ape ma ko ṛe alona!
2 Ta taŋgye miro rosi mipa ma ago nyivu ma.
Nyeri ma ago mipa ma!
3 Nya'do vo ruda'do ro maro
ago tiṛi mbaraekye ro ma gagane;
tana mi orivoya ruda'dovo maro ago vo ma gagaro.
4 Äye Lu maro, nyivu ma ni takozi'bai rigyesi,
ni drì lidri siomba be ago koziro ro yasi.
5 Tana ma'ba mi maro midri OPI;
mayitate mi ya ṛoni agoanji maro si.
6 Mätirute midri ṛoni uti maro si;
nyagaga ma te ṛoni tuse äti ma be si.
Märäṛuna mi ndi ondoalo.
7 Ma'dote taka'daro ro 'di amba ri,
tana nya'dote ruda'dovo mbaraekye maro.
8 Ma mi räṛu,
ago ma 'desi miro tana ayona kituzwi.
9 Miga ma ko zo tana madebe yauono ro;
nye'be ma ko tana mabe mbaraako yauono ro.
10 Kyila'baazii maro kayi taäyi malomvo;
ànya kayi ata voaloyasi ma ufune.
11 Ànya kayi ata ekye: “Lu e'be nda te;
maso nda vo ago märu nda
'diaza i'do nda opane.”
12 Miri ko pere lozo, Äye Lu;
Lu maro, nyikyi ndriro ma opane!
13 Mi'ba ànya se kayibe ma kicu
ka'do opeopero ṛe ago tufutufu ro.
Mi'ba ànya se kayibe ojo ma oyene koziro
ka'do driupiro ago tusuro.
14 Ma'bana mi maro 'da ondoalo midri;
ago märäṛuna mi'da ndra ago ndra ro.
15 Mitina taoye kado miro tana 'da;
mapena ŋgaopa miro tana 'da kituzwi,
ka'do ca ndrani se mänibe drisi owo.
16 Mikyina mayona mbara miro tana 'da OPI Lu;
märäṛuna takado miro tana 'da, toto alo miro ayani.
17 Äye Lu, Nyemba ma te ṛoni agoanji maro si,
ago ma gi'du taoye liŋgyiekye miro tana itina.
18 Made ca ago drî maro konje ca,
nye'be ma ko, Äye Lu,
mayona mbara miro tana lutu
kovole'bai cini se kabe eso ri.
19 Lu taŋgye miro, ka osa vokuru ya.
Miye tà 'dèsiro te;
Äye Lu a'di ni mi ronye ya?
20 Nyezo rriti ndi rueza amba be te mädri,
oko migo nyotombana ma 'da kpa to'di;
nyätina ma 'da ni 'budri ri kpa to'di.
21 Migo nyilitina mbara maro 'da;
ago nyi'dwena ma 'da kpa to'di.
22 Märäṛuna mi kpa lekyembe si
a'do 'diri miro ta Lu maro.
Maŋgona loŋgo räṛu ro 'da miri kudi o'bi si,
mi se Alokado Yisaraele ro ono.
23 Matrena 'da riyä si, ondro mate loŋgo räṛu ro oŋgo miri owo;
maŋgona loŋgo ndi miri a'do cini maro si
tana mipa ma te.
24 Taŋgye ŋgaopa miro ro mitina tana 'da kituzwi,
tana ànya se kojoyibe ma oyene koziro iyi
apeteṛe ago te tusuro.