Ogbo Atalia be
(2 'Bädri'bai 11:4-16)1 Oko ndroa njidrieri vosi oko Jehoiada usutate anjioko tu losi oyero esate. Nda letadrite dri'bai nji kyila'bai ro Azaria ŋgwa Yorama ro, Isamaele ŋgwa Jehonana ro, Azaria ŋgwa Obede ro, Maseya ŋgwa Adaya ro, ndi Elisafata ŋgwa Zikeri ro yibe. 2 Ànya abayite 'bakicii cini Yuda ro yasi ago eziyi Lewe'bai ndi dri'bai cini käläsikalai robe te Yerusalema ya.
3 Ànya otoyikalate cini Yekalu ya, ago ànya 'bayi tao'baro te Yoasa ŋgwa 'bädri'ba robe lau. Jehoiada atate ànyari ekye: Ŋgwa 'bädri'ba se kodrabe ono ro begi ono! Yauono te ndäri a'done 'bädri'ba ro, oso se OPI ko'ba tao'ba na be a'done zelevoi 'Bädri'ba Dawidi ro ri ronye. 4 Ono ni tase ämiri oyene owo. Ondro kohanii ndi Lewe'bai be kikyiyite kama ya Sabata si oko, telesi alo nina ànyaro ri dereŋwa Yekalu ro gagane, 5 ago telesi alo aza nina na ro ri zo'desi miri ro gagane. Ago anjokona o'bane orine Dereŋwa Kotopa roya. 'Dooko lidri cini ri kalaombine goro yekalu roya. 6 Ko 'diaza ri ocine Yekalu ya e'be gialo kohanii ago Lewe'bai se kama ya iyi ayani. Ànya ocinayi ni tana äṛu ànya te, oko beṛo lidri cini ri ŋgaemba OPI ro orone ago orine tesi. 7 Lewe'bai ri edrene vo gagane ŋgulu 'bädri'ba lomvosi, nja bando ànyaro be ànya rigyesi, ago orine 'bädri'ba be vose cini nda kabe aba kigyesi yasi. 'Diaza se kabe ojo ocine Yekalu ya beṛo ufune.
8 Lewe'bai ndi lidri Yuda robe yeyi tase cini Jehoiada kembabe ono te. E'be ànya se ko a'done kama ya Sabata si iyi kote oyine, ta'dota otaozo'bai a'doyite lidri be amba ànya se kama ya ndi ànya se ko kama ya iyi yibe. 9 Jehoiada ozo äzui ndi ŋga 'digagaro se 'Bädri'ba Dawidi ro ambabe driigye Yekalu ya ana te dri'bai rigyesi. 10 Nda raa lidri se bando be iyi te ŋgulu Yekalu milesi 'bädri'ba gagane. 11 'Dooko Jehoiada lofo Yoasa te tesi, so tagia te nda dri, ago ozo gyere buku ota ŋgamiri 'bädri'ba robe kigye ana rote ndäri. 'Dooko a'ba nda te 'bädri'ba ro. Kohani Jehoiada ndi ŋgwàagoro ndaro be äṛuyi Yoasa te, 'dooko 'dicini treyite ekye: “'Bädri'ba miri ndi madaro.”
12 Ondro Atalia keri kporo 'bädri'ba räṛu rote oko, anya mute ndrindri Yekalu ya, vose lowa kotokalabe kigye ana ya. 13 Ago anya ndre 'bädri'ba te ocivo yekalu roya, edrevoya läŋgyiri se apebe 'bädri'bai ri ana lomvo, ago dri'bai kyila'bai ro ndi cekuṛe ovo'bai be orivoya ŋgulu 'bädri'ba lomvosi. Lidri cini kayi ugu totre riyä si ago kayi cekuṛe ovo, ago loŋgo oŋgo'bai yekalu ro kayi ugu karama ana lepe ni ŋga loŋgo oŋgoro ànyaro si. 'Dooko Atalia wa boŋgo anyaro te ni rriti ri ago trete ekye: Driozo! Driozo!
14 Jehoiada le ko Atalia ufune yekalu ya, ta'dota nda zi dri'bai kyila'bai rote ago atate ànyari ekye: “Nyolofo anya tesi lakole gaga'bai ro yasi, ago 'dise kabe ojo anya opane mifu dori ufu.”
15 Ago ànya ruyi anya te ago uguyi anya te zo'desi miri roya, ndi ànya fuyi anya te Dereŋwa Farasi roya lau.
Ŋgao'ba Jehoiada ro To'diro
(2 'Bädri'bai 11:17-20)16 Kohani Jehoiada ezi 'Bädri'ba Yoasa ndi lidri cini be te rudro'bene nda be tao'baro o'bane anjioko ànyari a'done lidri OPI ro. 17 'Dooko lidri cini oyite yekalu Bala roya, ago pereyite riya vuru. Ànya tufuyi vo tori oloro anyaro ndi lu edeedero se lau ana be te jinyijinyi ago fuyi Matana kohani Bala rote vo tori oloro mile. 18 Jehoiada 'ba kohanii ndi Lewe'bai be te dri'bai ro losi Yekalu roya. Ànyari kama se 'Bädri'ba Dawidi kozobe ànyari ana oyene, ŋgapäṛi se ozobe OPI ri 'do ozane ota Musa ro voro. Ànya kpani dri'bai loŋgo oŋgoro tu lämu'du azaka ro. 19 Jehoiada 'ba gaga'bai kpate kama ya dereŋwa yekalu roya 'dise undiro lagane ni ocivoya.
20 Dri'bai kyila'bai ro ndi lidri cini be dro'beruyite Jehoiada be 'bädri'ba ezivoya ni Yekalu yasi le zo'desi miri roya. Anya ciyite dereŋwa 'desi yasi, ago 'bädri'ba rite giti ndaro dri. 21 Ago lidri cini a'dote riyä ro, ago 'bakici a'dote njuru, tana yauono äfu Atalia te.