Ruede Karama Lävu Odra ro rota
1 Lidri ye Karama Lävu Odra ro ro kote tu ŋgye na ya, imba käti ya, tana kohanii se wäṛiro i'do amba ago lidri mbikala kote amba Yerusalema ya. 2 Ta'dota 'Bädri'ba Ezekia, dri'bai losi ro ndaro, ndi lidri Yerusalema robe leyitadrite karama ono oyene imba ṛiri ya, ago 'bädri'ba zo lazo te lidri cini Yisaraele ro ndi Yuda robe ri. 3 Nda zo waraga te kadoro 'bakalai Eperaima ndi Manase robe ri, eji ànya te ikyine Yekalu ya Yerusalema ya karama Lävu Odra ro ro oyene OPI, Lu Yisaraele ro oroza. 4 'Bädri'ba ndi lidri be a'doyite yai'dwesi tase ànya korabe ana tana ro, 5 ta'doro ànya ejiyi Yisaraele'bai cini te, etoni Dana ya mä'dudrisi le Beraseba ya ŋgäṛiŋwadrisi, ikyine troalo Yerusalema ya ago karama Lävu Odra ro ro oyene a'do ota ro voro, ṛo lidri ri ikyine amba ndrani se käti kai drisi. 6 Ago lazo'bai oyiyite Yuda ndi Yisaraele be yasi waraga ono be ota 'bädri'ba ndi dri'bai losi ro ndaro be rosi ekye:
“Ami lidri Yisaraele ro mipavote lidriidriro ni ŋgaopeṛe Asaria'ba ro wari ono ya risi. Ka'do inye nyego OPI, Lu Abarayama ro, Yisika ro, ndi Yakoba robe re, ago nda egona ndi amire. 7 Nyà'do ko oso zutui amiro ndi Yisaraele'ba azi amiro se ka'doyibe ta'diriako OPI Lu ànyaro ri kai ronye. Oso mindrebe ronye nda eza ànya te kozipara. 8 Nyà'do ko taeriako oso ànya ronye, oko miro OPI. Nyikyi Yekalu ya Yerusalema ya, vose OPI Lu 'bate a'done alokado äduako ono ya, ago nyämätu nda tana kyila ndaro ami be ono kokye robe. 9 Tana ondro ka'do nyegote OPI re, 'dooko ànya se kuruyi 'didiri amiro be kamba'bai ro iyi a'donayi ndi yauni be ànyari ago o'banayi ànya ndi egone 'bäru. Tana OPI Lu amiro orivoya kado ago yauni amba be, ago nda uruna ami ndi, ondro ka'do nyegote ndare owo.”
10 Ago lazo'bai oyiyite 'bakicii cini wari 'bakalai Eperaima ro ro ndi Manase robe yasi, ago sayite le 'bakala Zebuluna roya; oko lidri guyi ànya te ago mawoyi ànya te. 11 Caoko lidri azaka ni 'bakala Asera, Manase, ndi Zebuluna robe yasi a'doyite ole be ikyine Yerusalema ya. 12 Lu ye losi kpate Yuda ya ago dro'be lidri te tadriole be ole ndaro orone ota 'bädri'ba ndi dri'bai losi ro ndaro robe orona si.
Aye Karama Lävu Odra ro rote
13 Ago lidri amba otokalate Yerusalema ya imba ṛiri si Karama Ambata Loŋgaako ro oyene. 14 Ànya anayi vo tori oloro se Yerusalema ya se abe tori olo ago abe ŋga tägyi tagyiriro oza driigye ana te ago voyite vodelero Kidrona roya. 15 Ago ànya tufuyi timelegogoi karama Lävu Odra ro rote u'du 'butealo fosu imba ṛiri rosi. Ago kohanii ndi Lewe'bai se ko wäṛiro kai a'doyite driupiro, ta'dota ànya wäṛiyi andivo ànyaro te OPI ri ago ànya loyi ŋgapäṛi ozaro te Yekalu ya. 16 Ànya riyite Yekalu ya vo ànyaro yasi oso ŋgaemba ota Musa mano Lu ro ro ronye. Lewe'bai ozoyi kari tori se alobe rote kohanii rigye se luvuyite vo tori oloro dri. 17 Lewe'bai tufuyi timelegogoi karama Lävu Odra ro ro teni, ago äṛuyi timelegogoi teni OPI ro, tana amba lidri ro a'doyi kote wäṛiro ago niyi kote ni tufune. 18 Ago oso amba ànya se kikyiyibe ni 'bakalai Eperaima, Manase, Yisakara, ndi Zebuluna robe yasi kai ro edeyi andivo ànyaro kote wäṛiro ana ronye, ta'doro ànya yeyi karama Lävu Odra ro ro kote oso se ara tana be ronye. 'Dooko 'Bädri'ba Ezekia ye mätu te ta ànyaro ta ekye: 19 “Äye OPI, Lu zutui amaro ro, takado miro si nye'be 'dise cini kabe mi mätu ya cini ànyaro si ono ta takozi rota, ondro ànya ka'doyi ca ko wäṛiro owo.” 20 Ago OPI zatari mätu Ezekia ro rote; nda e'be lidri te ta takozi rota ago ye ànya kote koziro. 21 Lidri se cini kotokalabe Yerusalema ya ana yeyi Karama Ambata Loŋgaako rote u'duna njidrieri yai'dwe amba si ago Lewe'bai ndi kohanii be räṛuyi OPI te mbara cini ànyaro si tuna amba. 22 Ezekia räṛu Lewe'bai te ta tauni se ànya koyeyi mätu be sina OPI ri ana rota.
Karama Ṛiri
U'du njidrieri se ànya koloyi tori be OPI, Lu zutui ànyaro ro räṛuzana ana vosi oko, 23 ànya usuyitate karama aza oyene u'duna kpa njidrieri. 'Dooko ànya yeyite riyä si. 24 'Bädri'ba Ezekia ozo 'daŋgoi kutu alo (1,000) ndi timele kutu njidrieri (7,000) be te ufune lidri ri onyane, ago dri'bai losi ro ozoyi 'daŋgo kutu alo (1,000) ndi timele kutu 'butealo (10,000) be kpate ànyari. Ago kohanii amba edeyi andivo ànyaro te wäṛiro. 25 Ta'dota 'dicini a'dote yai'dwesi, lidri Yuda ro, kohanii, Lewe'bai, lidri se kikyiyibe ni mä'dudrisi, ndi atrai se koriyibe 'du Yisaraele ndi Yuda be ya kai be. 26 Ago riyä amba a'dote 'bakici Yerusalema ya, tana ṛo kyeno ni tu 'Bädri'ba Solomo ŋgwa Dawidi ro rosi ŋga aza kätina a'do kote oso ana ronye. 27 'Dooko kohanii ndi Lewe'bai be ejiyi OPI te lidri äṛune. OPI eri mätu ànyaro te ni 'ba ndaro vo'buyakuru ya yasi, ago letadri ànyaro te.