Musa ka 'Bakalai Yisaraele ro Äṛuna
1 Kwoi ni äṛu se Musa mano Lu ro käṛu lidri Yisaraele robe sina teinye dri ndäri odra ako owo.
2 Nda ekye:
“OPI ikyite ni 'Bereŋwa Sinai ya;
nda itute oso kitu ronye ni Edoma dri
ago eyivote lidri ndaro dri ni 'Bereŋwa Parana yasi.
Nda ikyite malaikai kutu 'butealo be,
asilele be drigwo ndaro ya.
3 OPI lu lidri ndaro te
ago gaga ànya se ndaro kai te.
Ta'dota màso kaya te nda pa nda emba ama te,
ago màro ota ndaro te.
4 Musa ozo ota te ämäri,
se ni drimbi fopara yi tu'dei amaro ri.
5 Ago OPI a'dote 'bädri'ba ro lidri ndaro Yisaraele ro ri
tuse 'bakalai ànyaro ndi dri'bai ànyaro be kotokalabe voaloya ana si.”
6 Musa atate ta 'bakala Rubena ro rota ekye:
“Lidri Rubena ro kodra ko kpeye alona,
lidri na ka'do ca fereŋwa owo.”
7 Ago ta 'bakala Yuda ro rota nda atate ekye:
“OPI nyeri liyi ànyaro se ta ŋgaopa rota 'do;
Migo nyodro'be ànya kpa to'di 'bakalai azi be.
OPI, miye kyila ta ànyaro ta.
Ago nyagaga ànya ni kyila'baazii ànyaro ri.”
8 Ago ta 'bakala Lewe ro rota nda atate ekye:
“Mi, OPI, nyaka'da ole miro
Urima ndi Tumima be si
Ruindu'bai 'diri miro Lewe'bai si;
Nyojo ta ànyaro te Masa ya
ago nyusu ànya te ŋgye gyi Meriba ro kala.
9 Ànya ka'dayi taoro 'desi para te miri
ndrani uti'bai, ädrupii, kode ŋgàga ànyaro ri drisi.
Ànya royi ota miro te
ago a'doyite 'diriro tao'baro miro ri.
10 Ànya embanayi ota miro 'da lidri miro ri; ago ozonayi ŋgaemba miro 'da lidri Yisaraele ro ri.
Ago ozanayi ŋgapäṛi cu 'da vo tori oloro miro dri.
Ànya ozanayi ŋgaŋgutruro 'da miri.
11 OPI; nyäṛu 'bakala ànyaro a'done mbararo;
ago mi'ba losi ànya kayibe oyena tana kusi mi.
Nyotoga kyila'baazii cini ànyaro; se koga ànya zo 'do,
mi'ba ànya kogo koŋga ko alona.”
12 Ta 'bakala Benjamina rota nda atate ekye:
“Ono ni 'bakala se OPI lu tawi ago kabe ni ätina ono owo;
nda kani ànya gaga tu cini si,
ago nda ka ori kitoriya ànyaro ya.”
13 Ta 'bakala Yosepa ro rota nda atate ekye:
“OPI nyäṛu wari ànyaro 'bu si ni vokuru yasi;
ago gyi se ni gyini zelesi ono si.
14 Nyäṛu wari ànyaro doŋgo se kitu kabe ni o'bana okane ono si,
ago mi'ba doŋgo se kadopara iyi kowa imba owana rosi.
15 Mi'ba lutui ànyaro se ukuro iyi drina kowa doŋgo ago ka'do kpeye doŋgo kado be.
16 Mi'ba wari ànyaro ka'do twi ŋgase cini kadoro 'do be,
ka'do äṛu be ni nda,
se katabe ni asi se ce kumvuŋwa ya yasi ana resi.
Mi'ba äṛu kwoi ka'do 'bakala Yosepa ro dri,
Ka'do nda se ni dri'ba yi ädrupii ndaro lako ono dri.
17 Yosepa orivoya mbara be oso 'daŋgo se ätibe käti ronye,
Koyii ndaro oso koyii 'daŋgo vo cowaro ronye.
Koyii ndaro ni kutu du Manase ro
ago kutu 'bute Eperaima ro owo.
Nda ka tu'dei oga sina
ago ka ànya ubi sina le ädu 'bädri roya.”
18 Ta 'bakala Zebuluna ndi Yisakara ro rota nda atate ekye:
“Zebuluna ka'do kandrakado be ŋgalogyevoya gyi'desi drisi,
ago ŋgadriamba Yisakara ro kiliti ndra 'bäru.
19 Ànya ejinayi atrai 'da ikyine 'bereŋwa ànyaro ya;
ago olonayi tori ŋgye 'da lau.
Ànya usunayi ŋgadriamba ànyaro ni gyi'desi ya
ago ni siŋgwa kototi ro yasi.”
20 Ta 'bakala Gada ro rota nda atate ekye:
“Nyäräṛu Lu, se ko'ba wari ànyaro be 'desi ono.
Gada ka u'du oso ibi ronye
kufu ndi kyini drî robe towane.
21 Ànya nji wari se kadopara 'do te andivo ànyaro ri;
ozo ŋgase ozone dri'ba ri 'do te ànyari.
Tuse dri'bai Yisaraele ro kombikalabe voaloya ana si.”
Lidri Gada ro royi ota ndi taoro Opi ro be te.
22 Ta 'bakala Dana ro rota nda atate ekye:
“Dana orivoya ibi omba to'diro yi;
ka eŋga ni Basana yasi.”
23 Ta 'bakala Nafatali ro rota nda atate ekye:
“Äṛu Nafatali te amba
yauni OPI rosi;
wari ànyaro etote ni Fofo Galilaya ro yasi ago sate le ŋgäṛiŋwadri.”
24 Ta 'bakala Asera ro rota nda atate ekye:
“Äṛu Asera te ndrani 'bakalai azi ri.
Ka'do inye ta ndaro kusi ädrupii ndaro ndra,
ago wari ndaro ka'do ido ice ido ro robe amba
25 'Ba'desii ndaro ka'do gagagagaro dereŋwai logo ro ago atala ro si,
ago nda ka'do mbara be ori ndaro ya.”
26 Ami lidri Yisaraele ro, lu aza i'do oso Lu amiro ronye,
se kabe umu 'desi para ndaro si vokuru yasi,
ka vo osi 'dikolo yasi ikyine ami opane.
27 Lu äduako a'dote gaga'ba amiro;
nda kani ami äti kufu mbaraekye ndaro si miro.
Ago nda nja kyila'baazii amiro te ni ami milesi,
ago atate ämiri ànya tufune kpeye.
28 Ta'dota lidri Yisaraele ro ka ori liatokpero
zelevoi Yakoba ro ka ori iṛe,
liyaro wari se twi inya be ago vino be ana ya,
wari se nduruṛi ka loti ni vokuru yasi driigye ana.
29 Yisaraele, mi orivoya yai'dwesi!
'Diaza i'do oso mi ronye,
tu'de se OPI pa ni.
OPI modo ni ŋga 'digagaro ago bando ŋgaopeṛe miro owo.
Kyila'baazii miro ikyina 'da drì lämine miri ta yauni rota,
ago mitona ànya 'da pa si vuru.