Mätu ta Ŋgaopa rota
1 Äye OPI, ma driayo miri;
gaga'ba maro miri ko läzi maro eri ako!
tana ondro mirite titiro märi,
ma'dona ndi oso ànya se kabe oyi vuru 'bädri avo roya kai ronye.
2 Nyeri rulo'ba maro ondro mate driayo miri ta ŋgaopa rota,
ondro mate drìi maro eŋgana Yekalu alokado miro dri owo.
3 Miti ma ko tro takozi'bai be,
tro ànya se kabe taundi oye be,
se kayi takado ata oriazii ànyaro be,
oko se yaoso be ya ànyaro yasi.
4 Nyeza ànya a'do taoye ànyaro ro voro.
Ago ta taundi se ànya koyebe rota.
Nyeza ànya ta tase ànya koyebe ro voro;
nyozo päläti se sibe ozone ànyari.
5 Ànya tiyi ta ŋgase OPI koyebe ro ko
ca ŋgase nda ko'babe iyi,
ta'doro nda tufuna ànya 'da
ago eŋgana ànya ko tona.
6 Räṛu ka'do OPI ri,
tana nda eri rulo'ba maro te ta ŋgaopa rota.
7 OPI ni mbaravo maro ago gaga'ba maro;
ma taoyi nda ya ago nda kani ma opa.
Ma orivoya yai'dwesi;
ago ma nda räṛu loŋgoi oŋgosi.
8 OPI ni mbaravo lidri ndaro ro,
nda kani 'bädri'ba onjionji ndaro gagana ago opana.
9 Mipa lidri miro,
ago nyäṛu ànya se ni miro ono.
Nya'do lekye'ba ànyaro,
ago miti ta ànyaro äduako.