Loŋgo Räṛu ro
1 Nyäräṛu OPI!
Miŋgo loŋgo to'di OPI ri;
nyäräṛu nda kalaombi lidri 'diri ndaro roya!
2 Mi'ba Yisaraele ka'do yai'dwesi, ta O'ba'ba ndaro rota;
mi'ba lidri Zaiona ro koye riyä, ta 'bädri'ba ànyaro rota!
3 Mi'ba ànya käräṛu ävuru ndaro läri oto si;
ànya ko'bi läri ndi lekyembe be nda räṛuvoya.
4 OPI orivoya yai'dwesi ta lidri ndaro rota;
nda ka driuŋgyiako'bai oro ŋgaopeṛe si.
5 Mi'ba lidri Lu ro koyeyi riyä ŋgaopeṛe anyaro ya
ago koŋgoyi loŋgo riyä si u'duvoi ànyaro drisi.
6 Mi'ba ànya kotreyi amba ugu Lu räṛuvoya,
bandoi sidri ritu be drìi ànyaro yasi
7 votaro logoza tu'dei ri;
ago lidri ezaza;
8 'bädri'bai ànyaro embene nyori si,
ago dri'bai ànyaro embene nyori logoro si;
9 ugu tu'dei ezane oso Lu kozo ota na be ronye.
Ono ni ŋgaopeṛe lidri cini Lu ro ro owo.
Nyä̀räṛu OPI!