OPI ndi 'Bädri'ba Onjionjiro ndaro be
1 OPI atate opi, maro ri ekye:
“Miri noŋwa drigwo maro ya
madale ma'bana kyila'baazii miro lutu pa miro zele.”
2 OPI afona drikaca 'bädri'ba miro ro 'da ni Zaiona yasi.
Nda ekye nyimiri kyila'baazii miro 'da.
3 Tuse nyabe kyila oye kyila'baazii miro be si,
lidri miro ozona iyi 'da ole ànyaro ronye.
Lidri agoànjiro miro ikyinayi 'da mire
oso nduruṛi kyenoŋboci ro ronye lutui alokado miro dri.
4 OPI 'ba tao'baro lämu'duro te ago ogo läpina ko, se ekye:
“Nya'dona 'da kohani ro äduako
a'do eso Melekizedeka vosi ro voro.”
5 Opi orivoya drigwo miro yasi,
tu ndaro a'doro kyilaro si, nda opena 'bädri'bai 'da ṛe.
6 Nda opena vure tu'dei ro 'da,
ago o'bana vo ànyaro 'da twi avo be,
nda opena 'dimiri'bai 'da ṛe 'bädri cini yasi.
7 'Bädri'ba umvuna gyi 'da ni goloŋwa se liti biṛi ya yasi,
'dooko tombana nda 'da, nda edrena 'da 'diope'ba ro ṛe.