Rulewe ni Atrai resi
1 Tu ana si ànya zi tate ni Buku Musa ro yasi ṛeṛe lidri ri ago ànya usuyi vose egyibe ekye; ko Amona'bai kode Moaba'bai ri rudro'bene lidri Lu ro robe ana te. 2 Tana Amona'bai ndi Moaba'bai be ozoyi ŋgaonya ndi gyi be kote Yisaraele'bai ri tuse ànya kefoyibe ni Ezipeto yasi 'do si, oko gyeyi mi Balama rote Yisaraele otrine, caoko Lu amaro za latri te ŋga äṛu ro. 3 Ondro lidri Yisaraele ro keriyi ota ono te oko, ànya leweyi 'dise cini atraro teni Yisaraele lakosi.
Nemaya go 'ba Ŋgate To'diro
4 Oko dri käti kohani Eliasiba, se anjibe dri'ba vo ŋgaodroro Yekalu ro dri ana, a'dote bereazi ro Tobia be ṛo kyeno. 5 Nda letadrite Tobia ri orine zoya 'desi se kyeno ànya ko'bayi ŋgapäṛi inya ro, ŋga ŋgutruro ro, lakazà cini losi oyero Yekalu ya, ndi ŋgapäṛi telesi alo 'bute inya ro, vino ro, ido ice ido ro ro se a'ba tana te Lewe'bai, loŋgo oŋgo'bai ndi dereŋwa okwa'bai ri ndi ŋgaosa ro Kohanii ri be kigye ana ya. 6 Tase ono ka a'do oko ma i'do Yerusalema ya, tana ndroa 'butenätu foritu 'dimiri Aretakerekesa 'bädri'ba Babelona rosi, 'dooko magote nda re. Ago tu aza si oko, meji 'bädri'ba te märi ogone kovele, 7 ago megote Yerusalema ya. Lau musu tase koziro Eliasiba koyebe vo ozo si Tobia ri zoya goko Yekalu roya ana tana te. 8 Ago ma'dote kyilaro amba, ago molovo ŋga cini Tobia ro zo ya te cini tesi ni zo yasi. 9 'Dooko mozotate ago ànya wäṛiyi zoya te; ago mologo lakazà cini Yekalu ro, ŋgapäṛi inya ro ndi ŋga ŋgutruro robe te vona ya.
10 Musu ta kpate anjioko lidri ozo ŋga kote Lewe'bai ri. Ta'dota Lewe'bai ndi loŋgo oŋgo'bai yibe se kayibe ruindu ana, vonai cini goyite ämvu ànyaro yasi. 11 Ago maŋgate kyilaro dri'bai be ago matate ànyari makye “Tana e'di mitita Yekalu ro ko ni ya?” Ago motokala Lewe'bai ndi loŋgo oŋgo'bai be rote, ago mologo ànya te vo losi ànyaro ro yasi. 12 'Dooko lidri cini Yuda ro go etoyi ŋgapäṛi telesi alo 'bute ro ànyaro inya ro, vino ro, ndi ido ice ido ro robe ezina te zo ŋgaodroro ya. 13 Ago ma'ba dri'bai kwoi te zo ŋgaodroro ro dri, kohani Selemaya, Zadoka, egyi'ba Ota ro ndi Pedaya Lewe'ba be. Kundu eŋga'ba ànyaro ni Anana ŋgwa Zakura ro, kwozo Matania ro, tana usu ànyate 'diri ro ago losi ànyaro ni ŋga lanjine losi'bai azi ànyaro ri.
14 Miyi ta maro, ta ono ta Äye Lu maro ago nyije takado se mayebe ta Yekalu rota ndi ta mätuna robe ono ko.
15 Tuse kai si mandre lidri Yuda ya te vino ozwavoya ni doŋgo na yasi Sabata si. Ago kayi inya amba ezi ago odrona doŋgyii ànyaro drisi. Ànya kayi kpa vino, kono, kyi'du ndi ŋga azaka be ezina Yerusalema ya Sabata si; mozo miomba te ànyari ko ŋgaonya logyene tu 'do si. 16 Lidri Tura ro se kayibe ori Yerusalema ya, eziyi ti'bi kpate ndi ŋga cini dritoto be ago logyeyite Sabata si lidri Yuda ro ri Yerusalema ya. 17 'Dooko maŋgate kyilaro dri'bai Yuda ro be ago matate ànyari makye: “Mìndre takozi se nyàbe ugu loyena ono! Nyà ugu Sabata o'ba ko a'done alokado. 18 Inye'do zutui amiro ye ta ṛoko nonye ago inye'do Lu amaro ezi taezaro ṛoko ämädri ndi 'bakici ono be ya? Caoko nyà kayi drigi ugu kyila Lu ro ezina ndra Yisaraele dri ta Sabata enji rosi.”
19 Ondro vo kate ezi uni dereŋwà Yerusalema ro ya etovo Sabata rosi oko, mozotate dereŋwai 'bakici ro osene, ago ko upine madale Sabata vosi. Ago mara ruka lidri maro rote dereŋwai kalasi anjioko ko ŋga aza ezine 'bakici ya tu Sabata rosi. 20 Perena alo kode ritu ronye ŋgalogye'bai se cini kayibe ŋga dritoto ro logyena iyi u'duyite tesi tiṛi 'bakici ro kundusi. 21 Oko matate ànyari makye: “Tana e'di nyàori tiṛi lomvosi ni ya? Ondro ka'do mìgo nyòjo kpate oyene oso inye, mezana ami ndi.” Etoni tu ana si ànya go ikyiyi kote tona Sabata si. 22 Ago mata Lewe'bai te beṛo ànyari andivo ànyaro wäṛine ago oyine dereŋwà okwane, tu Sabata ro o'bane a'done alokado.
Miyi ta ono kpa ta maro ta Äye Lu maro ago nya'do yauni be märi tana ŋgälu miro orivoya äduako.
23 Tuse kai si mandre Yudai kpate se logyeyi 'ditoko teni Asedodo, Amona ndi Moaba be yasi; 24 ago kpäkyi ŋgagà ànyaro ro atate kala Asedodo ro ndi kala azaka be ayani, ago ànya niyi kala Yuda ata kote. 25 Ago mawasakalate ànya yibe ago matri ànya te, ma'bi rukä ànyaro te ago meŋgye drikyiri ànyaro te, 'dooko ma'ba ànya te, ruäṛune ävuru Lu rosi ekye: ko amiri ndiriŋwa amiro ozone ogyene ŋgwaàgoro ànyaro ri kode ndiriŋwa ànyaro ogyene ŋwaàgoro amiro ri kode andivo amiro ri. 26 Miti tate ànyari makye: “Inye'do Solomo 'bädri'ba 'de ṛoko ta 'ditoko inye'do rosi ya? Tu'dei cini lakosi 'bädri'ba aza i'do oso nda ronye. Lu ndaro lu nda tawi inye, ago Lu 'ba nda te 'bädri'ba ro Yisaraele cini dri, caoko 'ditoko atra ro 'ba ndate takozi oyene. 27 Inye'do mèrina te ta amiro ago màyena te takozi se 'desi ono ago màrinate Lu amaro oroako ugu 'ditoko atraro logye siya?”
28 Ŋgwaagoro aza alodi Yoyada ŋgwa Eliasiba Kohani Fopara ro, gye ŋguti Sanebalata Orona'ba ro rote, ta'doro manja Yoyada teni maresi.
29 Miyi ta anyaro Äye Lu maro tana ànya enjiyi losi kohanii ro ago tao'baro a'doro kohanii ro ndi Lewe'bai robe te.
30 Ndi mäwäṛi ànya teni ŋgase cini atraro yasi, ago mara kama te kohanii ndi Lewe'bai be ri 'dialo gyi losi ndaro ya. 31 Ago maratate tiza se abe ŋgapäṛi ozaro ozana sina 'do ezine saa na ya, ago doŋgo drikäti ezine.
Miyi ta maro Äye Lu maro takado ta.