Uru Babelona ro
1 Ono ni ta se OPI katabe ma Yeremaya ri ta wari Babelona ro rota ndi lidri na be owo ekye:
2 “Mipe lazo tu'dei ri! Nyayo tana!
Nyeŋga bere ago nyayo lazona!
Nyada'do tana ko, ago nyayo mikye:
‘Babelona 'dete!
Epere lu anyaro Mareduka te riya!
A'ba lui edeedero Babelona ro te driupiro,
ago oronyo beti lui edeedero anyaro te!’
3 “Tu'de aza ikyite ni mä'dudrisi Babelona gotane se o'bana 'da a'done tandro ro ago 'diaza unina kote orine lau. Lidri ndi koronyai be umunayi 'da.”
Ego Yisaraele'bai ro
4 OPI ka ata ekye: “Ondro tu ana kesate oko, lidri Yisaraele ro ndi Yuda robe ikyinayi 'da ezi liyi be, ago ugu ma OPI Lu ànyaro uṛibe. 5 Ànya ejinayi liti se kabe oyi Zaiona ya tana 'da 'dooko oyinayi 'da kigyero atabe ekye: ‘Nyìkyi mi'de ma'ba tao'baro äduako OPI be, se tana unina ko ujene alona.’
6 “Lidri maro labate oso timele se kujebe se lekye'ba nai ko'babe ujene di 'bereŋwai lako 'do ronye. Ànya abayite wayiro, ago ànya ijeyi ta vose 'ba ànyaro be kigye ana rote. 7 Ŋgase cini kabe ànya usu iyi gotayi ànya te. Kyila'baazii ànyaro kayi ata ekye: ‘Ama ko taenjibe, tana ànya yeyi takozi te OPI se ni lolivo anyaro ri, OPI se zutui ànyaro yiyi tabe kigye 'do.’
8 “Mìmu ni Babelona'bai ri, ni wari ànyaro yasi, ami lidri Yisaraele ro, nyà'do tegoi ronye o'dene käti! 9 Tana ma oye ya gboko tu'dei se mbaraekye iyi ro eŋgane ni mä'dudrisi ikyine Babelona gotane. Ànya oraruna 'da gyeree, oyenayi kyila 'da ago openayi 'da ṛe. Ànya orivoya äṛigo'bai kyila'bai taunièkye yi, 'boyi ätu ko ta vuru. 10 Otopana ŋga Babelona ro 'da, ago ànya se kotopayibe iyi urunayi ŋgase cini ànya koleyibe iyi 'da. Ma OPI, matani.”
O'de Babelona ro
11 OPI ka ata ekye: “Ami lidri Babelona ro, nyòtopa ŋga tu'de maro rote. Nyà'do ca orivoya riyä ro ago yai'dwesi, nyà ca ugu aba oso ti se kabe inya oto kode farasi kabe ugu aba liyi be 'do ronye, 12 oko ologona 'bakici 'desi amiro 'da vuru ago a'bana 'da driupiro. Babelona a'dona 'da tipari tu'dei cini lako; a'dona 'da vocowa gyiako ro ago vorri siŋgwa ro ro. 13 'Diaza unina ko orine Babelona ya ni kyila maro ri; oko a'dona 'da tandro ro, ago vona se cini kabe lävu lomvoigyesi a'donayi 'da lä'bilä'biro ago larolaroro tana ro.
14 “Ami kusu'bai, mìra ami gbikyi kyila oyene Babelona be. Nyèwe Kusui amiro ago mi'bo ätui cini amiro Babelona dri, tana anya ye takozi te ma, OPI ri. 15 Mìtre otre kyila ro gbikyi Babelona lomvosi! Yauono anya ozovote. Tiṛii anyaro 'de te ago eperete riya vuru. Ma OPI, ma votaro logona Babelona ri. Ta'dota nyòlogo votaro anyari, ago mìye ànya oso se ànya koye ami be ronye. 16 Mì'ba ikyi'di ŋga ko 'bädri ana ya ago alo ŋga jalia ro ko. Tana ni turi kyila'baazii ro ri mi'ba 'dicini lau ana kogo ri 'bäru, 'dicini kumu tesi wari modo iro ya.”
Ego Yisaraele'bai ro
17 OPI ka ata ekye: “Lidri Yisaraele ro labayi oso timele, se ibi kabe lanjana kepererube 'do ronye. Käti ono, 'bädri'ba Asaria ro gota ànya te, ago äduro yauono Nebukadenezara 'Bädri'ba Babelona ro tosi kowa ànyaro te. 18 Ta'dota ma, OPI Mbaraekye, Lu Yisaraele ro, mezana 'Bädri'ba Nebukadenezara ndi 'bädri ndaro be 'da, kpa oso meza 'bädri'ba Asaria robe ronye. 19 Mago mologona lidri Yisaraele ro 'da wari ànyaro ya. Ànya onyanayi ŋgaonya se kabe omba 'Bereŋwa Karemela dri ndi wari Basana roya ana be 'da, ago ŋgase cini ànya koleyibe se kabe omba wari Eperaima ro ndi Gilada robe ya 'do ojona ànya ndi. 20 Ondro tu ana kesate oko, äṛina taenji Yisaraele ro 'da, oko änina kote usune. Ago äṛina takozi Yuda ro 'da oko änina kote usune; tana me'bena lidri se mapa adri ànyaro be kwoi 'da ta takozi rota. Ma OPI, matani.”
Vure Lu ro Babelona'bai lomvo
21 OPI ka ata ekye: “Nyògota lidri Merataima ro ndi lidri Pekoda robe. Nyòtola ago nyùtufu ànya kpeye. Mìye ŋgase cini mozo ota na be ämiri oyene 'do. Ma OPI matani. 22 Eri kporo kyila oyero te wari ana ya ndi ŋgatufu koziropara be. 23 Sedri Babelona pe 'bädri cini te ṛe, oko yauono ape ago epere mbara ndaro te riya! Tu'dei cini a'doyite lä'bilä'biro ni ta tase ka'dobe Babelona ri ana rota. 24 Babelona, mi'be abari te miri, ago mi'dete, oko mini tana kote. Usu mi te ago äru mite, tana nyogbote ma OPI be. 25 Vose madro ŋga kyilaro maro be kigye ono mäpi kalana te, ago molofo ŋga kyilaro maro kyila oyero te tesi, tana ma, OPI Mbarapara se Mbaraekye ono, ma orivoya losi be oyene wari Babelona ro ya. 26 Nyògota anya lamadri cini yasi ago mipi kala kyiro inya ro ro uŋbo! Midrokala ŋgase otopabe iyi ro oso abe kala inya ro odrona 'do ronye! Nyepere 'bädri 'do kpeye! Cu nye'be ŋga aza ko! 27 Nyutufu kyila'bai ànyaro kpeye! Nyotola ànya! Lidri Babelona ro te kandrakozi be! Tana tu esate ànya ezaza!”
28 (Nyèri voopa'bai kayi umu ni Babelona yasi ta ayone Zaiona ya, tase OPI Lu amaro ko'debe votaro logone ta tase Babelona'bai koyeyibe Yekalu ndaro ri ana rota.)
29 “Nyàta kusu'bai ri Babelona gotane, 'dicini se kuniyi ŋgau'bo be kusu si ago ätu si iyi. Mìmudri 'bakici ana ro gbikyi ago mì'ba 'diaza kopavo ko. Nyòlogovo tase cini ànya koyebe 'do ro, ago mìye ta rigye oso koye ta be azii ri ronye, tana anya yetate driuŋgyi si ma, Se alokado Yisaraele ro ono ri. 30 Ta'dota utufuna agoànji anyaro 'da litiŋwai 'bakici ro drisi, ago utufuna kyila'bai cini anyaro 'da tu gi ana si. Ma OPI, matani.
31 “Babelona, mi orivoya twi driuŋgyi be, ta'doro ma, OPI Lu Mbaraekye ono, ma orivoya kyilaro mibe! Tana tu esate märi mi ezaza. 32 Tu'de se driuŋgyiekye miro ono lapana 'da ago o'dena 'da, ago 'diaza unina ko eŋgane kuru, Masona asi 'da 'bakicii miro drisi, ago ozana ŋga cini se gbikyi lomvoigyesi iyi 'da.”
33 OPI Mbaraekye ka ata ekye: “Ate lidri Yisaraele ro ndi Yuda robe ezana. Vona cini se kuruyi ànya be kamba'bai ro iyi kayite ànya gaga ago e'beyi ànya kote oyine. 34 Oko Driute'ba ànyaro orivoya mbara be, ävuru ndaro ni OPI Mbaraekye. Nda andivona ondrena vo ànyaro 'da ago ezina taliatokpe 'da 'bädri ya, oko ezina rriti 'da lidri Babelona ro dri.”
35 Opi ka ata ekye:
“Odra orivoya Babelona ri!
Odra orivoya lidri na ri,
dri'bai na ri, ago lidri na se tavouni be iyi ri.
36 Odra orivoya nebii se koweoga'bai ro iyi ri, tana ànya orivoya amaamaro!
Odra orivoya kyila'bai ànyaro ri,
tana ànya ka'doyi robe turituriro amba!
37 Nyùtufu farasii ànyaro ago nyòtoŋgo arabia kyila ro ànyaro!
Odra orivoya kyila'bai ànyaro se agyebe päläti si iyi ri,
tana ànya ka'do robe mbaraako!
Nyèpere lakaza ànyaro;
tana otopa robe.
38 Mì'ba 'bu kori u'diako wari ànyaro ya
tana goloi ànyaro kose robe gbe.
Babelona orivoya wari se lui edeedero be owo,
se ka lidri o'ba a'done amaamaro.
39 “Tana ta'doro koronyai vocowa ro, muyii ndi aricoro yibe ago orinayi teni Babelona ya. Lidri ri ogo orine lau te i'do tona, ca tuse cini kabe oye ikyine mileya iyi ya. 40 Oso mepere Sodomo ndi Gomora be ndi 'ba'desii se lototi kai be ana ronye, mayena kpa inye ayani Babelona ri. 'Diaza ri ogo orine kpa to'dina lau te i'do alona ca toto fere. Ma, OPI, matani.”
41 “Lidri ka eziikyi ni mä'dudrisi,
tu'de se mbaraekye ana;
'bädri'bai amba kayi ruede 'bädri lozo yasi kyila oyene.
42 Ànya ruyi kusui ànyaro ndi äzui ànyaro be te;
ànya orivoya siomba be ago yauniako.
Kporo ànyaro orivoya oso udi gyi'desi ro ronye;
ànya kayi lämu farasii si,
nja kyila oyene lidri Babelona ro be.
43 'Bädri'ba Babelona ro keri tana te oko,
drìi ndaro drate nyaṛo.
Lomvoluwu ru nda te,
luwuna te oso toko se kabe uti 'do ronye.
44 “Mefona 'da oso ibi kabe efo ni ice coko Yaradene kalasi yasi kabe oyi le wari se lowo luru be ya 'do ronye, ago ma'bana Babelona'bai 'da umune ndrinwa ni wari ànyaro yasi. 'Dooko dri'ba se mabe onjina 'do mirina tu'de ana 'da. A'di ojona yi ni mabe ya? A'di otona ozi ni mabe ya? 'Dimiri'ba eŋwani edrena ni ŋbi mamile ya? 45 Ka'do inye nyeri ta se marabe Babelona lomvo ono ro ndi tase malebe oyene lidri na ri ono. Ca ŋgàga ànyaro orona 'da di, ago 'dicini landrena 'da turiro ŋgakozi se kabe a'do ànyari ana ta. 46 Kporo o'de Babelona ro o'bana 'bädri cini 'da rukandane, ago erina totrena 'da tu'dei cini lako.”