Koṛiga Ritu Kyi'du ro
1 OPI ka'da koṛiga ritu kyi'du ro se a'babe mile Yekalu roya ana te märi. (Ta ono a'dote 'dooko Nebukadenezara 'Bädri'ba Babelona ro ru Jehoiakina 'Bädri'ba Yuda ro ŋgwa Jehoiakima ro te kamba'ba ro ni Yerusalema yasi le Babelona ya, tro dri'bai Yuda ro, ŋgaede'bai ndi toka'bai be.) 2 Kyi'du kado orivoya koṛiga alo aza ya, se kate ṛo käti; oko koṛiga äziri orivoya kyi'du kozi be, a'dote koziro pari se si ko onyane. 3 'Dooko OPI atate märi ekye: “Yeremaya, mindre e'diyi ya?”
Mazatadrite makye: “Kyi'du yi. Se kadoro 'do orivoya kadopara, ago se koziro 'do orivoya koziro pari, cu si ko onyane.”
4 Ta'dota OPI atate märi ekye: 5 “Ma, OPI, Lu Yisaraele ro, mandrebe lidri Yuda ro se ärube lozo Babelona ya kai labayi oso kyi'du kado iyi ronye, ago mayena ànya 'da yauni si. 6 Mandrena vo ànyaro 'da ago mologona ànya 'da wari ono ya. Motombana ànya 'da ago märi ànya perene te i'do; mikyi'dina ànya 'da ago märi ànya eŋgyene te i'do. 7 Ma'bana ànya 'da a'done ole be ma unine anjioko ma ni OPI owo. 'Dooko ànya a'donayi 'da lidri maro, ago ma'dona 'da Lu ànyaro, tana ànya egonayi 'da mare ya cini ànyaro si.
8 “Oko ta Zedekia 'Bädri'ba Yuda ro rota, dri'bai losiro ndaro yi ndi anjoko lidri Yerusalema ro se koriyibe wari ono ya kode koyiyibe Ezipeto ya iyi be, Ma, OPI, mayena ànya cini 'da oso kyi'du se koziro pari se si ko onyane kwoi ronye. 9 Mezina rriti 'desi 'da ànya dri se tu'dei cini 'bädri ya a'donayi 'da lä'bilä'biro. Lidri uguna ànya 'da, ago ojinayi 'da ànya si, mawonayai ànya 'da, ago otrinayi latri 'da ävuru ànyaro si vose cini mabe ànya pere kigyesi iyi yasi. 10 Mezina kyila, mä'bu, ndi adravo be 'da ànya dri madale tufuna ànya 'da kpeye ni wari se mozobe ànyari ago zelevoi ànyaro ri ono yasi.”