1 Kohani fopara cini anjite orivoya ni lidri azi ndaro lako ago aka'date ruindune Lu ri vo ànyaro ya, ŋgapäṛi ozone ago tori olone ta takozi rota. 2 Ago tana andivo ndaro orivoya mbaraako liti amba yasi, nda orivoya mbara be a'done trwe ànya se orivoya tauniako ago kabe ujeuje yibe. 3 Ago tana nda andivona mbaraako 'do ronye, beṛo ndäri ko tori olone toto takozii lidri rota oko kpa takozii modo ndaro rota. 4 'Diaza ka ko andivo ndaro onjina taoro a'doro kohani fopara ro roya. Oko Lu ka toto ni mano se a'bate kohani fopara ro uzi, oso Arona ronye.
5 Kpa oso inye, Kristo ezi taoro a'doro kohani fopara ro kote ni andivo ndaro dri. Oko Lu atate ndäri ekye:
“Mi orivoya Ŋgwa maro:
Ondro ono ma'dote Täpi miro.”
6 Nda ata kpate vo aza ya ekye:
“Nya'dona 'da kohani ro äduako,
oso Melekizedeka ronye.”
7 Ori ndaro si 'bädri ya Yesu ye mätu ndaro te ago ka taeji otre amba si ago kiliyi Lu ri, se unina ndi nda opane ni odra yasi. Tana nda logorute vuru ago ezarute, Lu eri nda te. 8 Oko nda gica orivoya Ŋgwa Lu ro, nda ni ta te a'done taoro be ni rueza ndaro yasi. 9 Ondro a'ba nda te wäṛiro oko, nda a'dote eto'ba ŋgaopa äduako ro ànya se cini kabe nda oro ri, 10 ago Lu ayo ta ndaro te a'done kohani fopara ro oso Melekizedeka ronye.
Ŋgaembaro ta Taoma E'bero ta
11 Ta amba orivoya ämäri atane ta ta ono rota, oko orivoya rritiro tana edrene ämiri tana nyà tauni liyaro. 12 Tu a'dote amba ämiri ta a'doro miemba'bai ro ta, caoko mile gi'du 'diaza ri ami embane tauniro käti lazo Lu ro rota. Ago ugu ŋgaonya ṛatararo onyane ayani, nyà gi'du leyi umvu ayani. 13 'Diaza se kabe leyi umvu orivoya gi'du ŋgagaŋwa yi, teinye tauniako ta taŋgye rota ndi takozi be. 14 Ŋgaonya ṛatararo, liti aza yasi, orivoya tana 'di'desii, se taoye si embayi andivo ànyaro te takado ndi takozi be lewene.