Amana ka Taäyi Yudai Tufune
1 Ta kwoi vosi 'bädri'ba Asuerosa eŋga Amana ŋgwaagoro Amedata Agaga'ba rote a'done dri'ba 'desi losi ro. 'Bädri'ba eŋga anyate 'desi ro ndrani dri'bai losi ro cini anyaro drisi. 2 'Bädri'ba ta dri'bai cini losi ro goko 'bädri'ba roya ändite vuru taoro ka'daza Amana ri oso 'badri'ba kota ànya be ronye. Oko Moredekai ändi kote vuru ago ye taoro 'do kote. 3 'Dooko losi'bai azaka se goko 'badri'ba ro ya ana ejiyi Moredekai te ekye: “Tana e'di miro ota 'bädri'ba ro kote niya?” 4 Ago ondro ànya katayite ndäri tu cini si oko nda gatezo ta ànyaro erine. Ànya itiyi tana te Amana ri tana ànya leyi ondrene ko'de Amana olena tadri taoye Moredekai ro 'do gi ndi ya. Tana Moredekai itite ànyari ekye yi orivoya Yuda yi. 5 Amana a'dote kyilaro ondro nda kunite Moredekai ändi kote vuru taoro ka'daza ndäri owo. 6 Ondro iti tate Amana ri ekye Moredekai orivoya Yuda yi oko, nda ratate ko toto Moredekai ezane ayani. Amana ratate lidri Moredekai rigä Yudai cini se orivoya 'bädri 'bädri'ba Asuerosa roya tufune.
7 Ndroa 'butealo foritu miri 'Bädri'ba Asuerosa ro rosi, imba käti se ni imba Nisana rosi oko, Amana ozotate vodo ovone (ànya ziyite Purima), u'du ŋgyena ndi imba na be usuzana tavoora ndaro oyezana. Ara tana te a'done u'du 'butealo fonätu imba 'butealo foritu se ni imba Adara ro ana si.
8 'Dooko Amana atate 'bädri'ba Asuerosa ri ekye: “Lidri azaka orivoya pererute lidri amba lakosi wari cini miri 'bädri'ba miro ro yasi; la'bi ànyaro orivoya to ni lidri cini azi ro risi, ànya ätiyi ota miri 'bädri'ba miro ro kote, ta'dota ko kado mi 'bädri'ba ri ànya olene. 9 Ondro ka'do mi 'bädri'ba mile gindi mi'ba ozo ota äfu ànya robe, ondro ka'do miyete inye, ma tao'ba mozona mo'di ojo läŋgyina ro kama nätu 'butenjidrieri fonji (375) 'da dri'bai losi 'bädri'ba ro ro ri, a'ba robe vo ŋgaodroro 'bädri'ba roya.”
10 Ndi 'Bädri'ba tri mäŋgusi ndaro te, taayoza, ago ozote kyila'baazi lidri Yuda ro ro Amana ŋgwa Amedata Agaga'ba ro ri. 11 Ago 'bädri'ba atate Amana ri ekye: Lidri ndi parata be ozote miri, miye ŋgase milebe oyene ànya si oso se tana kusi mibe ronye.
12 'Dooko äzi egyi'bai 'bädri'ba rote u'du 'butealo fonätu imba käti rosi, ago ozo ota te oso se cini Amana kata be ronye, egyite 'desii 'bädri'ba ro ri ndi wari'bai cini wari ndaro yasi be ndi dri'bai cini lidri robe ri, egyite wari cini ri egyi modo ànyaro rosi ago lidri cini ri kala modo ànyaro rosi; egyite ävuru 'Bädri'ba Asuerosa rosi ago ädite mäŋgusi 'bädri'ba rosi. 13 Ago azo waraga ono te lazo ugu'bai si wari cini 'bädri'ba ro yasi Yudai cini tufune ago tolone 'di ombato'diro ndi 'di odeodero be, 'ditoko, ndi ŋgàgaŋwa yibe ṛo tolone kyiti tu alo si, u'du 'butealo fonätu imba 'butealo foritu Adara rosi, ago ŋga ànyaro topane. 14 Waraga egyibe ono ṛo gyerena ozone ota ro wari cini yasi taayoro ro lidri cini ri a'dozana nja tu gi ana si.
15 Lazo ugu'bai muyite foroforo ota 'bädri'ba robe ago ayo ota se ana te unine 'bakici 'desi Susa yasi. Ago 'bädri'ba ndi Amana be riyite vuru ŋgaumvune, oko 'bakici Susa a'dote orivoya rugburugbururo.