Nyä̀mätu Ama ta
1 Äduro, ädrupii ago endreŋwai amaro, nyä̀mätu ama ta, tana lazo Opi ro kugu rulari robe ndrindri ago äru robe taoro si kpa oso ka'dobe ami lako ronye. 2 Nyä̀mätu kpa tana Lu kopa ama robe ni lidri kozi ago undiro rigyesi, tana 'dicini ma ko lazo ya.
3 Oko Opi orivoya 'diri, ago nda tombana ami 'da ago gagana ami 'da londroro ni Nda se Kozi ono ri. 4 Opi ko'ba ama taoyine ami ya, ago màma ndi endaro nyà gi ugu losi oye ago nyùguna tase màbe atana ämiri ono oyena ndi 'duro.
5 Opi kelepe ami tauni ndra ŋgalu Lu ro roya ago yaiŋgyi se ozobe Kristo si ya.
Kama Losi Oyero
6 Ädrupii ago endreŋwai amaro, màta ami ävuru Opi amaro Yesu Kristo roya ruonane ni taoma'bai se kabe ugu ori tovo ro iyi resi se soyi kote ta miembaro se mòzobe ànyari ono vo. 7 Ami andivo mìni ṛote kado anjioko beṛo ämiri taoyene kpa oso màyebe ronye. Tana ama ko tovo ro tuse ama be ami yibe si. 8 Mä̀ru ŋga kote ni 'diaza alo rigyesi teinye awi ŋga ozoako driigye. Oko, màye losi te mbarasi, mùgu losi oyete kitu si ago ŋgäkyi si tana ukyi mà'do 'da ŋgaläŋgyi ro ämiri. 9 Màyete nonye, ko tana ama orivoya taŋgyeako päläti amaro urune; oko màyete nonye a'done taka'daro ro ämiri osone voigye. 10 Ama be ami yibe, mòjote ta itine ämiri màkye: “Nda se kogatezo losi oyene mì'ba konya ŋga ko.”
11 Mà ta ono ata tana mèri ta be ekye lidri azaka orivoya ami lako se kayi ori tovo ro se yeyi ŋga aza ko oko kayi gialo loci losi lidri azi ro yasi. 12 Ävuru Opi amaro Yesu Kristo rosi màta lidri kwoi ago mà ànya emba orine ŋgyero ago losi oyene ŋga usuza ori modo ànyaro rota.
13 Oko ami, ädrupii ago endreŋwai, beṛo ko ämiri okwane ni ugu takado oyevoya. 14 Ondro 'diaza ka'dote lau koro lazo se màbe ozona ämiri taegyi ono ya ono kote, mìndre nda kado ago mìye ŋga aza ko nda be, tana nda ka'do robe driupi ro. 15 Oko mìye nda ko kyila'baazi ronye; oko, mìtadrina oso taoma'bai azi ronye.
Ata Ädu
16 Opi andivo, se orivoya ni etovo taliatokpe amaro ro, kozo taliatokpe ämiri tu cini si ago taoye cini yasi. Opi ka'do ami cini be.
17 Ma modo megyi ta ono ni drí modo maro rosi: Mede ni ma Paulo resi. Ono ni liti se mabe taegyi cini onde sina owo; ono ni taegyi maro owo.
18 Tai'dwero Opi amaro Yesu Kristo ro ka'do ami cini be.