1 Ànya se orivoya iyeäṛii beṛo ànyari 'desii ànyaro orone, ukyi 'diaza ata ta undiro 'da ävuru Lu ro ndi ŋgaemba amaro be lomvo. 2 Iyeäṛii se 'desi nai Kristo'ba ro beṛo ko ànyari ànya mawone, tana ànya orivoya ädrupii ànyaro. Ka'do inye, ànyari ruindune ànyari ndra, tana ànya se kabe takado losi ànyaro ro usuna ànya orivoya taoma'bai se ànya kulube owo.
Ŋgaemba Ŋgaodo ro ndi Ŋgaamba Ŋgye robe
Beṛo miri ŋga kwoi embane ago opene. 3 Nda se kabe ta to aza emba ago koletadri kote ata ŋgye Opi amaro Yesu Kristo robe ago ŋgaemba mätu amaro robe 4 vate driuŋgyi be ago ni ŋga aza ko. Nda orivoya ole koziro be kalawasane ago kalaopene ta ata rota, ago nonye ono ka yaoko, kaladiṛi, kalambäri, tausu undiro be ezi, 5 kalawasa 'duro ni lidri se drî na usu ta ko ago se orivoya taŋgyeako resi. Ànya kusuyibe ekye mätu orivoya liti a'doro ŋgaamba be ro.
6 Oko, mätu ka 'dio'ba ŋgaamba be, ondro ŋgase nda be sina kojo nda te owo. 7 Mèzi e'diyi 'bädri ya ya? Mèzi ŋga aza ko! Mä̀nina e'di uŋgyine ni kigyesi ya? Mä̀ŋgyi ŋga aza ko! 8 Ka'do inye, ondro ama orivoya ŋgaonya be ago boŋgo be, 'do beṛo ama ojone. 9 Oko ànya se koleyibe a'done ŋgaamba be kalapa taojo roya ago abari amba amamaro ndi ole koziro be ru ànya te, se ka ànya ese vuru perene ago enjine. 10 Tana parata lu orivoya paji ta cini undiro ro. 'Di azaka se kabe ojo a'done sina anarute ni taoma yasi ago ya ànyaro lesite tusu amba be.
Taŋgaembaro 'Dialo ri
11 Oko mi, mano Lu ro, mina andivo miro ni ŋga cini kwoi ri. Nyojo osone taŋgye, a'do lu'baro, taoma, ŋgalu, yaiŋgyi ndi tokyeako be vo. 12 Mimu umukyekye taoma ro mbara cini miro si, miru adri äduako robe andivo miro ri, tana ta adri ono rota anjioko Lu zi mi te tuse nyedrete ŋgyiri nyayo taoma miro tana te tazevoedre'bai amba kandra owo. 13 Mata mi, Lu se kabe adri ozo ni ŋgacini ri ono kandra, ago Kristo Yesu kandra, se edrete ŋgyiri ayo taoma ndaro tana te Poneto Pilato kandra, 14 ota miro orone ago ànya ätine ŋgyero madale Tu se Opi amaro Yesu Kristo ka'daruna 'da sina si. 15 Lu o'bana ta 'do 'da a'done tu ŋgye na si, Lu se ni kado ago toto ni 'Dimiri'ba yi, 'Bädri'ba 'bädri'bai ro ago Opi opii ro. 16 Nda toto ni oŋgwaako, nda ka ori ŋgaeyi se 'diaza ni ko osane kigye ya. 'Diaza alo ndre nda kote, 'diaza alo unina ko cu nda ondrene. Taoro ndi mbara be ka'do ndäri äduako! Amen.
17 Mita ànya se orivoya ŋgaamba be ŋgà 'bädri ono rosi ko a'done driuŋgyi be, ko mi ànyaro o'bane ŋgà vociako ŋgaamba ro dri, oko Lu dri ayani, se kabe ŋgacini ozo ämäri dritai ro a'doza ämäri riyä si. 18 Mita ànya takado oyene, a'doza ŋgaamba be losi kado si, ka'doyi robe dritai ro nja ŋgala'done azii be. 19 Liti ono yasi ànya odronayi ŋga 'da kuru andivo ànyaro ri ŋgaodro se a'dona 'da kotopa ṛatara ro ro tu mileya ta. Ago 'dooko ànya a'donayi 'da mbara ro a'done adri se endaro be.
20 Timoteo, nyäti ŋgase äpäṛite mirigye 'do londro ro. Mina ata undiro ndi kalawasa amaama robe se orivoya koziro lidri azaka kabe uzina “Tauni” 'do. 21 Tana azakana ekye iyi sina, ago tana si ànya ijeyi liti taoma rote.
Tai'dwero Lu ro kori ami cini be.