Sänduku Tao'baro 'Bädri Felesete'bai roya
1 Ondro Felesete'bai kopayi Sänduku Tao'baro Lu rote oko, ànya ŋgyiyite ni Ebenezere yasi le 'bakici ànyaro Asedodo ya. 2 'Dooko Felesete'bai uguyi Sänduku Tao'baro Lu rote yekalu lu ànyaro Dagona roya ago edreyi anya te kuru Dagona lomvo. 3 Ago ondro lidri Asedodo ro koŋgate kyenoŋboci kyenoŋbo kinjo si oko, ndreyi Dagona 'dete vuru militi si gyini dri Sänduku Tao'baro OPI ro mile. Ago ànya ruyi Dagona te ago goyi eŋgayi nda te vo ndaro ya. 4 Ago ondro ànya go koŋgate kyenoŋboci kyenoŋbo kinjo rosi oko, ànya ndreyi Dagona go 'de kpate vuru militi si gyini dri Sänduku Tao'baro OPI ro mile. Drî ndaro ndi drì riti ndaro be lo'devoya laŋgolaŋgoro käläsi kala, e'be toto lomvo Dagona ro ayani. 5 Ono ni tase ṛoni tu ana si le tu ono si kohanii Dagona ro ndi 'dise cini kabe oci yekalu Dagona roya Asedodo ya 'debe ko ogo abane vo ana drisi owo.
6 Drí OPI ro a'dote rritiro lidri Asedodo ro dri ndi wari ànyaro be, nda 'ba ànya te rriti ya ago eza ànya te taezaro adravo ro rosi. 7 Ondro lidri Asedodo ro kondreyi tase ono te oko, ànya atayite ekye: “Beṛo kote Sänduku Tao'baro Lu Yisaraele ro ro ri orine ama yibe; tana drì ndaro te rritiro ämädri ago Dagona lu amaro dri.” 8 Ago ànya zoyi lazo te ago ziyi 'bädri'bai cini Felesete'bai rote voaloya, ago ejiyi tate ekye: “Màyena e'di Sänduku Tao'baro Lu Yisaraele ro ro siya?” Ànya zatadrite ekye: “Mì'ba äŋgyi Sänduku Tao'baro Lu Yisaraele ro ro Gata ya.” Ago Felesete'bai ŋgyiyi anya te Gata ya. 9 Ago ezina ànyari lau vosi oko, drì OPI ro a'dote rriti ro 'bakici ana dri, ago so turi amba te ago eza lidri 'bakici ana rote, 'di ombato'diro ndi 'diodeode robe se adravo lomvo ro 'debe ànya dri ana. 10 Ago ànya uguyi Sänduku Tao'baro Lu rote Ekerona ya. Ago ondro Sänduku Tao'baro kesate Ekerona ya oko, lidri Ekerona ro 'be liyite ekye: “Ànya eziyi Sänduku Tao'baro Lu Yisaraele ro rote ämädri ama tufune ndi lidri amaro be.” 11 Ago ànya ziyi dri'bai cini Felesete'bai rote, ago atayite ekye: “Mìzo Sänduku Tao'baro Lu Yisaraele ro ro kovole, mi'ba anya ogone vo modo anyaro roya, ukyi anya tufu ama 'da ndi lidri amaro be.” Tana turi odra rote orivoya amba 'bakici ya. Drí Lu rote rritiro ànya dri lau. 12 Ca ànya se kodra ko iyi adravo ru ànya te, ago liyi lidri Ekerona ro ro sate vo'buyakuru ya.