MƆRGUS 13 - Nuba New Testament (Nuba Ŋireeɽe) 1993 (NBA93)

Yǝcu nandisa-ŋgwɔ ŋiɽaŋali ŋǝthi ṯigiirathalɔ ṯǝthi Heikal.

1 Mɔŋw ruuthǝ ki Heikal-na, nǝ ṯilmiiz ṯuuŋwun ṯette ǝccǝŋw, “Yaa Mɔ@allim, iisa-ṯi yaali yisaaw-yisaaw, nǝ dɔɔnɔŋw kwisaaw-kwisaaw!” 2 Nǝ Yǝcu accǝŋw, “Aŋgwa kwiisa dɔɔnɔŋw ŋgwɔ tatap kwɔppa-kwɔppa? Liti linḏi ethi duŋgwǝci kaali keere ethi ɔrgwɔthi keŋgen-la mac; kiti kinḏir ethi ove kithaay mac.”

Ṯurvǝ-ŋǝ ṯǝɽǝ-thi yǝy-lɔ.

(Maṯṯa 24:3-14Luuga 21:7-19)

3 Mɔŋw ruuthǝ ki Heikal-na, nɔŋw naanalɔ kaayin-la wǝni Zeiṯuun wɔnaanisa Heikala kworo, nǝ Bɔṯrɔs-ŋǝ Ya@guub-gi nǝ Yuhanna-ŋǝ Andraaws-gi, nǝr uṯicǝlɔ cuk-cuk nǝrǝccǝŋw, 4 “Andica-nyŋi-ṯi ṯaccaŋ-ṯuk kwɔrɔ kwinḏi-gi ŋiɽaŋal ŋɔ ethǝrrini, nǝ @alaama wundǝr wǝndu winḏi ethoro, mindaŋ mǝ ŋiɽaŋal ŋɔ rattathi?” 5 Nǝsi Yǝcu ǝccǝŋw, “Aŋrathir; mindaŋ kǝɽinyji ŋaaŋwɔsi-lɔ kweere mac. 6 Kaka ninḏir-gwɔ ethiila luuru yiriny-yi yiinyi, ǝraarɔŋw, ‘Nyii kwɔrɔ Kwɔrɔstɔ!’ Ǝrsi ṯuusi luuru. 7 Mindaŋ mǝsi neŋnelɔ ŋǝthi ŋǝryǝ, nǝ ŋǝthi ṯiṯithǝ-lǝ ṯǝthi ŋǝryǝ tok, e-ta ere appiri rɔgwori mac, nǝ ŋinḏi ethi ǝrrini, laakin ǝreere rattathi kinnǝni mac. 8 Kaka ninḏi-gwɔ bǝlǝḏ ethi diiɽǝthǝ bǝlǝḏǝ naana, a ŋeeleny diiɽǝthǝ ŋeelenyi nǝana a wurǝyu riiginni kǝzir weere-weere, a yaaŋwɔ ǝnḏi yuu tottor; ŋindǝr-ṯǝ ŋɔ ŋir kaka ṯurvǝ ṯiŋna ṯǝthi ŋelŋe ŋǝthi tɔr.

9 “Laakin aŋrinnar ki-rogɽo raalɔ; kaka ninḏir-gwɔ ethi ɔmɔmmi ŋaaŋwɔsi ǝrŋǝsi iili ki-mahkama-na, ǝrŋǝsi ippipi ki-limajma@-na; nǝ ǝ rillili kiyǝnǝ yǝthi hɔkkaam, nǝ kiyǝnǝ yǝthi limǝlik sǝbǝb-gi kwiinyi, ethi ruwǝzi shahaaḏa-lɔ kiyǝnǝ yeeŋen. 10 Laazim ǝri iṯithi ŋiɽaŋali-la ŋǝthi Inyjiil kerreny ki-lizi-nǝ tǝtap. 11 Mǝrŋǝsi ɔmɔmmi mindaŋ mǝrŋǝsi iili ki-mahkama-na tǝ, ǝṯeere pinni rɔgwor-na mac, kaka niti mǝgwɔ lɔɔmɔr iila kila kinnǝ mac, ethaarɔŋw, aatha kwɔrɔ kwǝnyii andasi; laakin andisasi kǝniny ŋette nyithak ŋǝŋǝsi Ṯigɽim Ṯirllinǝlɔ ter inḏǝthǝ ethisi andasi, kaka niti nɔrŋa-gwɔ kwinḏisi ethisi andasi mac, laakin nǝ Ṯigɽim Ṯirllinǝlɔ ter oro. 12 A kwɔr bɔɔŋwɔthi eŋgen kwir kwɔr ethi ɽeenye, a papa bɔɔŋwɔthi tiɽiŋǝyin, a nyelle dindǝthǝ rǝrnyin-ŋwɔsi naana lǝnyin-ŋǝli ethisi ɽeenye, 13 mindaŋ ǝrŋǝsi wǝzi tatap sǝbǝb-gi kwiinyi. Laakin kweere kwǝsi indinyanni naana kwundǝr-ṯǝ kwiglaaw.

Ŋitheny ŋɔppa ŋigii.

(Maṯṯa 24:15-28Luuga 21:20-24)

14 “Laakin mǝ ese ŋiɽiginǝ ŋinaanɔ kǝzir witi wɔvthannar-gwɔ ethi-gwɔ naani mac (ŋiɽaŋal ŋɔ ŋir ŋǝthi ŋgwa kwɔrtɔ ethisi elŋe), ŋwɔṯaŋw a kila linaanɔ Yahuuḏiiyyǝ ǝri avri ethi allɔ ki-yaayin-la; 15 nǝ ŋgwa kwɔnaanɔ ki-yiŋna-la ŋweere dappi mac ethǝnḏi kiininy kwuuŋwun ethi dimmǝ kwomne kweere; 16 nǝ ŋgwa kwɔnaanɔ ki-wuthǝr-nǝ ŋweere aaɽitha dɔɔnɔ kwokwony ethi dimmǝ kireṯhi kuuŋun mac. 17 Ǝyǝwǝy ǝnnǝ ṯɔrvǝ ṯǝthi kila liitha, nǝ ṯǝthi kila liiɽǝ ki-ŋwaamin-la ŋwa! 18 Aarir kiyiiriny mindaŋ mǝreere ǝrrini ŋɔ koo-gi mac. 19 Ki-ŋwaamin-la ŋwa, a ṯurvǝ ǝnḏǝlɔ ṯir nyoro-nyoro, ṯiti ṯimǝ ǝnḏǝ kinnǝ laamin leere mac kinaw tuk a kitta-gwɔ Allah ṯurmunǝ-lɔ kwon-kwon mindaŋ kirem kwɔmoro kimaara, nǝ ŋweere iila ṯithǝmthǝ-lɔ ṯɔrɔŋw kwokwony mac. 20 Na mǝ Kweeleny ere ɔblasa ŋwaamin-na ŋwa mac ta, a kwizigwunǝŋ ere kilaaw kweere mac; laakin sǝbǝb-gi kwǝthi lizi luuŋwun liccaŋwsi-na, ŋwɔ ɔblasa ŋwaamin-na. 21 Mɔŋw andasi ŋaaŋwɔsi kweere, mɔŋwɔccǝ ŋaaŋwɔsiŋw, ‘Iisar-ṯi, Kwɔrɔstɔ kwirma-ṯǝ ŋgwala! Alla, iisamba, kwundǝr-ṯǝ ŋgwala!’ Ǝṯǝmminicǝ mac. 22 Kaka ninḏi-gwɔ lokworɔstɔ-ŋǝ liɽɽi-li lir ŋidiny ethiila, ǝrsi ǝrri ŋir ŋilim, mindaŋ mǝr-ŋi ṯuusi kila liccasi Allah-na, mǝrsi kattaci ṯaay. 23 Laakin ǝṯi aŋratha ŋaaŋa beṯten, nyii kwɔmǝ-ŋǝsi rarmatha nǝŋǝsi andaci ŋiɽaŋali niti nǝrrinǝr-gwɔ kinnǝni mac.

Kilyǝ kǝthi Tɔr tǝthi Kwizigwunǝŋ mɔŋwaaɽa.

(Maṯṯa 24:29-31Luuga 21:25-28)

24 “Laakin ki-ŋwaamin-la ŋwa, mǝ ṯurvǝ ernene, ǝ aaŋwɔn oro kirim, ǝ ǝwǝ ere ṯiŋatha fɔɔri-lɔ kwuuŋwun mac, 25 a rɔɔrɔm irdidǝ ki-leere-na a ŋɔma ŋǝthi leere riiginni. 26 E-ta ǝrmǝ ese Tɔɔrɔ tǝthi Kwizigwunǝŋ tinḏi ŋwebleth-ŋina ŋɔma-ŋi ŋɔppa, nǝ ŋinith-ŋi tok. 27 Mindaŋ ŋwɔ tiŋatha limeleka, ki-rɔkɔn rir kwaɽiŋan rǝthi ṯurmun, ǝri raaysa lizi dɔŋw luuŋwun liccaŋwsi-na ǝzir naana tatap wǝthi ṯurmun.

Ḏǝris ṯǝthi kwɔɔtha.

(Maṯṯa 24:32-35Luuga 21:29-33)

28 “Ilŋithirsi-ŋɔ naanɔ-gwɔ kwɔɔtha. Mǝ rill ruuŋwun oro tul-tul, mindaŋ mǝr ruu yǝni tok, elŋe ethaarɔŋw kiɽaa kimaadithi keṯṯɔk. 29 Ŋwɔṯaŋw mǝ ese kwomne-ŋgwɔ kwumǝ ǝnḏǝ, elŋe ethaarɔŋw kwumǝ aadithi ǝgwur kworo keṯṯɔk. 30 Nyi i kwǝccǝ-ŋǝsi-mǝ ŋwɔ rerrem, lizi lǝthi lɔɔmɔr kɔlɔ liti lernene kinnǝni mac mindaŋ mǝ kwomne-ŋgwɔ ǝrrini tatap. 31 Leere-ŋa wurǝyu-yi ǝri ernene kithaay, laakin ŋiɽaŋal ŋiinyi-tǝ ǝreere ernene ḏuṯ.

Kwiti kweere mac kwilŋithi laaminɔ alla saa@.

(Maṯṯa 24:36-44)

32 “Laakin ŋǝthi laamin kila, nǝ saa@ tok, nǝsi kwizi ere kweere kwilŋithisi mac, wala limeleka lǝthi ki-leere-naŋw, wala Tɔr, laakin nǝroro ŋǝthi Papa ṯɔɽɔk. 33 Aŋricar, nǝ iccaci tok; kaka niti nilŋicaŋa-gwɔ lɔɔmɔri mac linḏi ethiila. 34 Ŋaaɽinna kwɔɔrɔ kwinḏi ŋiirin, nɔŋw kette yaḏaama ethi aŋraci dɔɔnɔŋwɔ, nɔŋwsi kannaci ŋothɽor, nɔŋw andaci kwaŋɽa kwǝthi ǝgwur ethi aŋratha tetter. 35 Ŋwɔṯaŋw, aŋrinnar naana, kaka niti nilŋithiŋǝ-gwɔ mac ethaarɔŋw kweeleny kwǝthi dɔɔnɔŋw kwinḏi ethiila ṯaccaŋ, ya ŋwiila kirakalɔ, alla kulŋǝ-nǝ, alla kɔthɔgɽi-gi, alla ŋɔrpana. 36 Mɔŋw ǝndinǝlɔ pugwuṯ laazim kwɔŋwseere ṯǝrmizǝlɔ linḏirɔ mac. 37 Ŋa ŋimǝ-ŋǝsi andaci, ŋǝni-ṯǝ ŋandica-nyji lithaathɔ tatap; aŋrinnar!”