1 “Ŋandica-ŋǝsi ŋɔ mndaŋ mǝ ṯǝmminǝ ṯaalɔ ere ajli mac. 2 Liŋǝsi ruttutǝlɔ ki-limajma@-na. Lɔɔmɔr kila linḏi ethiila, mindaŋ mǝŋǝsi kwette nyithak eɽinye tǝ, ŋwɔ kittatha ethaarɔŋw ŋǝni ŋǝrricǝ-nyji Allah. 3 Ŋinḏirsi ethisi ǝrri ŋɔ kaka niti nilŋithir-gwɔ Papa-ŋw mac, wala ethi elŋe nyuŋwɔ. 4 Laakin ŋandica-ŋǝsi ŋɔ mindaŋ mǝ lɔɔmɔr leeŋen iila linḏirsi-li ethisi ǝrri ŋɔ, e-ta esi-mǝ kithaayini ŋa ŋandica-ŋǝsi.
Ŋothɽor ŋǝthi Ṯigɽim Ṯirllinǝlɔ ter.
“Nyii kwiti kwɔmǝ-ŋǝsi rarmatha mac kinaŋw-lɔ tuk kwon-kwon ethi andaci ŋaaŋwɔsi kwomne-ŋgwɔ, kaka a-naaninyii-gwɔ ŋaaŋa-li. 5 Laakin kirem tǝ, nyaaɽitha naanɔ-gwɔ kwɔɔsa-nyii, laakin ŋweere kweere mac kwaalɔ kwinḏi-nyii ethi uṯicǝlɔ ethaarɔŋw, ‘A kwinḏi etheele ṯaka?’ 6 Laakin kaka mǝŋǝsi-gwɔ andaci ŋiɽaŋali mindaŋ, ṯɔrɔɔnyɔna ṯimǝ urǝnni rɔgwori raalɔ deddep. 7 Laakin ŋɔ ŋandisa-nyji ŋir rerrem: ŋinḏi ethoro faayitha kwaalɔ mǝnyii ele kithaay, nǝ mǝnyii ere ele kithaay mac tǝ, a kwumǝccǝ ere iila naamiŋa-gwɔ tok mac; laakin minyeele tǝ ŋǝsi usicǝ. 8 Mɔŋwiila tǝ ŋwɔ baaŋaci ṯurmunǝ ŋikiyaŋi ŋeeŋen, ŋirllalɔ nǝ hɔkwɔma tok: 9 ŋǝthi ŋikiya tǝ, nǝroro ŋiti ŋǝmminicǝr-nyiiŋi mac, 10 ŋǝthi ŋirllalɔ tǝ, kaka ninḏiny-gwɔ ethaaɽitha naanɔ-gwɔ Papa, mindaŋ ǝrnyeere ese kwokwony mac; 11 nǝ ŋǝthi hɔkwɔm tǝ, nǝroro ŋǝthi kweeleny kwǝthi ṯurmun kɔthɔ kwɔmǝ haakimni.
12 “Nyii ŋgwɔ-tǝ kwǝthi ŋiɽaŋali ŋittǝzir ŋǝthisi andaci ŋaaŋwɔsi, laakin ŋiti ŋǝsi ǝthici ŋɔma-na kinnǝni kire-kirem-ŋgwɔ mac. 13 Mǝ Ṯigɽim ṯǝthi ŋirllalɔ iila tǝ, kwɔŋǝsi iili ki-ŋiɽaŋal-na ŋa tatap ŋir rerrem kaka niti ninḏi-ŋgwɔ ethisi andasi sɔlṯa-gi kwuuŋwun mac, laakin ŋette nyithak ŋinḏi-ŋwsi ethisi neŋne, nǝroro ŋɔŋwsi andasi mindaŋ mɔŋwsi andaci ŋaaŋwɔsi ŋa ŋinḏi ethiila. 14 Ṯinḏi-nyii ethi niinǝ, kaka ninḏi-ŋgwa ethisi aavi ŋa ŋǝni ŋiinyi ŋwɔsi andaci ŋaaŋwɔsi. 15 Kwomne ŋgwa tatap kwǝthi Papa naŋworo kwiinyi; nǝrṯoro ŋɔ ŋǝccǝ-ŋǝsi-ŋiŋw, ṯinḏi ethisi aavi ŋǝni ŋiinyi ŋwɔsi andaci ŋaaŋwɔsi.
Ṯɔrɔɔnyɔna-ŋǝ ṯaamathina.
16 “Kwaathan kwokwo-tǝ, ǝrnyeere ese kwokwony mac; nǝ kwaathan kwokwo kwokwony tǝ ǝmyeese.” 17 Nǝ ṯalaamiiz ṯokwo ṯuuŋwun andasi-na naraarɔŋw, “Ŋǝni ǝyǝ ŋɔ ŋandica-ŋwsi nyuŋwsi ŋaari-ŋiŋw, ‘Kwaathan kwokwo, ǝrnyeere ese mac, nǝ kwokwony kwaathan kwokwo ǝrnyeese’; nǝ, ‘Kaka ninḏiny-gwɔ etheele naanɔ-gwɔ Papa’?” 18 Nǝr aarɔŋw, “Ŋǝni ǝyǝ ŋǝniŋw, ‘Kwaathan kwokwo’? Ŋenḏe ŋilŋthi-nyji ŋǝni ǝyǝ ŋandisa-ŋwsi.” 19 Nǝsi Yǝcu elŋe naana linḏi ethi uṯicǝlɔ, mindaŋ nɔŋwsǝccǝŋw, “Ŋindǝr ŋɔ ŋuṯucǝŋǝ-ŋi rogɽo-lɔ raalɔ, ŋiɽaŋal-ŋi ŋandisa-nyji ŋǝniŋw, ‘Kwaathan kwokwo ǝrnyeere ese mac, nǝ kwokwony kwaathan kwokwo ǝrnyeese’? 20 Nyii kwǝccǝ-ŋǝsi-mǝ ŋwɔ rerrem, ŋaaŋa laari mindaŋ a-ronyine, laakin ṯurmun-tǝ ŋwɔ nyeŋlena; ŋaaŋa linḏi ethi jiɽiminni; laakin a ṯijiɽiminnǝ ṯaalɔ ɔrlle ŋworo ṯaamana. 21 Mǝ ŋijma accasi kwayɔ ǝṯɔŋw jiɽiminni, kaka mǝgwɔ saa@ kwuuŋwun iilicǝ; laakin mɔŋw ǝlŋe tɔɔrɔ rac tǝ, ǝṯɔŋweere kithaayini ŋijma ŋa kwokwony mac, ṯinyiŋla-thina ṯǝthi tɔr timǝ elŋenne ki-ṯurmun-nǝ. 22 Ŋwɔṯaŋw nǝthi kire-kirem-ŋgwɔ ṯɔrɔɔnyɔna, laakin nyii kwɔŋǝsi ese kwokwony rac mindaŋ mǝ rogwor raalɔ nyeŋlena, mindaŋ ǝŋǝsi kwizi kweere ere dimǝthǝ ṯinyiŋlana kɔthɔ ḏuṯ 23 Nǝ ki-laamin-la ṯǝ kila ǝrnyeere uṯicǝlɔ kwomne-gi kweere mac. Nyii kwǝccǝ-ŋǝsi-mǝ ŋwɔ rerrem, mǝ uṯici Papa-ŋwɔlɔ kwomne-gi kweere kwɔŋǝsi-tǝ inḏǝthǝ yiriny-yi yiinyi. 24 Nǝ kire-kirem-ŋgwɔ neere ɔṯalɔ kwomne-gi kweere mac yiriny-yi yiinyi; ɔṯɔr-galɔ e-ta ǝtǝ aavi, mindaŋ mǝ ṯinyiŋlana ṯaalɔ oro min-min.
Ṯithiinyǝ ṯǝthi-thi ṯiinyi ṯurmunǝ.
25 “Nyii kwǝti ŋǝsi andaci ŋiɽaŋali ŋir amthaal; laakin lɔɔmɔr kila linḏi ŋiseere andaci amthaal-yi kwokwony mac laakin ŋǝsi andicalɔ por-por ŋǝthi Papa. 26 Nǝ ki-laamin-la kila tǝ, a ɔṯalɔ yiriny-yi yiinyi; nǝ ŋǝsi ere ǝccǝŋw mac nyii kwɔŋǝsi ǝricci Papa-ŋwɔ kiyiiriny ki-lɔɔbi laalɔ; 27 kaka namɽa-ŋǝsi-gwɔ Papa rogɽo-ri ruuŋwun wɔɽe-wɔɽeny, kaka-ṯǝ namɽar-nyii-gwɔ mindaŋ nǝr-nyǝmminci ethaarɔŋw kwinḏi naanɔ-gwɔ Papa. 28 Nyii kwinḏi naanɔ-gwɔ Papa nǝnyiila ki-ṯurmun-nǝ; ŋwɔṯaŋw kwokwony, nyii ɔrlacci ṯurmunǝ ŋwɔdoŋw mindaŋ nyaaɽitha naanɔ-gwɔ Papa.” 29 E-ta nǝ ṯalaamiiz ǝccǝŋw, “A kwɔrpa-ŋgwɔ kwɔmǝ andisalɔ por-por kirem kanḏisa-gi kiti kir amthaal mac! 30 Ŋimǝ-nyji elŋe kirem ethaarɔŋw a kwilŋithi kwomne tatap, nǝ neere naŋni kwizi kweere mac ethi uṯici ŋaaŋwɔ-lɔ: nǝ ŋiɽaŋal-ŋiṯǝ ŋɔ nǝnyii ǝmmini ethaarɔŋw a kwinḏi naanɔ-gwɔ Allah.”
31 Nǝsi Yǝcu ǝŋnici nɔŋwsǝccǝŋw, “Ŋaaŋa limǝ ǝmmini kirema? 32 Lɔɔmɔr kila linḏi, nǝ limǝ kǝniny iila rerrem, minḏaŋ mǝ faathitha kiriny-kiriny daŋgal-ŋwɔsi, mindaŋ ǝrnyii ṯayyalɔ kwɔtɔpɔt; laakin ninyeere oro kǝniny kwɔtɔpɔt mac, kaka a-naanicany-gwɔ Papa. 33 Ŋimǝ-ŋǝsi andaci ŋɔ, mindaŋ mǝthi ṯibɽǝthǝlɔ pǝt duŋgwiny-nǝ. Ŋaaŋa likaṯṯasi ṯurvǝ ki-ṯurmun-nǝ; laakin rɔɔthɔr luugwul kǝniny kaka mǝny-gwɔ illazi ṯurmunǝ kii.”
© Nuba Ŋireeɽe New Testament © The Bible Society in Sudan, 1993.