MAṮṮA 24 - Nuba New Testament (Nuba Ŋireeɽe) 1993 (NBA93)

Yǝcu kwandisa ŋiɽaŋali ŋǝthi Heikal winḏi ethi kiirathalɔ.

1 Mǝ Yǝcu ruuthǝ ki Heikal-na ethi ɔrlacci ŋwɔḏoŋw, nǝ nǝ ṯalaamiiz ṯuuŋwun iila naanɔ-ŋgwɔ nǝr baaŋaci ṯǝwccinǝ ṯǝthi Heikal. 2 Nɔŋwsi ǝŋnici nɔŋwsǝccǝŋw, “Aw, ŋa ŋiisa-ŋasi ŋɔ tatap ŋǝmǝ-ŋǝmmǝŋǝ? Nyii kwɔŋǝsi andaci ŋiɽaŋali ŋɔ, kall kiti keere mac kǝr duŋgwǝci ethi nannatha kǝzir wuuŋwun; yǝrsi fǝthǝlɔ tatap faṯ-faṯ.”

Ṯurvǝ-ŋǝ ṯǝwɽǝ-thi yǝy-lɔ.

(Mɔrgus 13:3-13Luuga 21:7-19)

3 Nǝ a-naani-tǝ Yǝcu-lɔ kinnǝni kaayin-la wǝthi Zeiṯuun-ŋwɔ, nǝ ṯalaamiiz iila naanɔ-ŋgwɔ cuk-cuk nǝrǝccǝŋw, “Andica-nyji-ṯi kwomne ŋgwɔ tatap kwinḏi ethi errini ṯaccaŋ, nǝ aatha kwɔrɔ kwinḏi ethoro mindaŋ ethi-mǝ elŋe ŋiɽaŋali ŋǝthi kilyǝ kɔɔŋa, nǝ lɔɔmɔr linḏi-li ṯurmun ethi ernene.” 4 Nǝsi Yǝcu ǝŋnici nɔŋwsǝccǝŋw, “Aŋricar, ǝŋǝsi kweere ere kǝɽinyjǝlɔ mac. 5 Kaka ninḏi-gwɔ lizi ethiila luuru yiriny-yi yiinyi ǝraarɔŋw, ‘Nyii kwɔrɔ kwir Kwɔrɔstɔ!’ Mindaŋ ǝri ṯuusi lizi littǝzir. 6 Ǝsi neŋne ŋǝthi ṯuwǝn-lɔ keṯṯok-keṯṯok, nǝ kǝzir wɔɔlɔna tok; laakin ere apri rɔgwori mac. Ŋɔ ŋinḏi ethi ǝrrini rac, laakin nǝreere ǝniŋw ṯurmun ṯinḏi ethi ernene kinnǝ mac. 7 A libǝlǝḏ ṯɔgthathisi-na; a Ŋeeleny ṯɔgthathisi-na. A yaaŋwɔ ǝnḏǝthǝ lizi, a wurǝyu riiginni ǝzir naana wuuru. 8 Nǝ kwomne ŋgwɔ tatap nɔŋwaaɽanni ŋijma ŋiŋna ŋǝthi ŋelŋe.

9 “E-ta ǝrŋǝsi ɔmɔmmi, ǝrŋǝsi kette ki-rii-na rǝthi sɔlṯa ethi inḏǝthǝ ŋaaŋwɔsi jiizǝ, mindaŋ ǝrŋǝsi ɽeenye. Ǝŋǝsi lizi tatap wǝzi sǝbǝb-gi kwiinyi. 10 A luuru duŋgwǝci ṯǝmminǝ ṯeeŋen; ǝri bɔɔŋwɔthathisi-na wɔɽe-wɔɽeny, na ǝri uwǝthisi-nǝ wɔɽe-wɔɽeny tok. 11 A liɽii lir lǝluŋw iila ǝri ṯuusi lizi luuru. 12 A ŋiɽaŋal ŋigii karbatha ǝzir tatap, mindaŋ a ŋimɽi ŋǝthi lizi luuru ṯee jiɽe-jiɽep. 13 Laakin kweere kwǝsi indinyanni naana mindaŋ mǝr rattaathi, ŋwɔ kilaaw. 14 Nǝ ŋŋaŋal ŋɔ ŋisaaw ŋǝthi Inyjiil wǝthi Ŋeeleny ǝrŋi aari bǝshirǝ ṯurmunǝ naana tatap, ethoro shuhuuḏ kwǝthi lizi tatap; e-ta ǝmǝ ṯurmun ernene.

Ŋitheny ŋɔppa ŋigii.

(Mɔrgus 13:14-23Luuga 21:20-24)

15 “A leese ŋiṯiginǝ ŋandisa-ŋi kwiɽii kwǝni Ḏaaniyaal, ŋinḏi ethi rilli kǝzir wirllinǝlɔ ter (ŋa ŋgwa kwinḏi ethi ɔrti ŋiɽaŋali ŋɔ ŋɔvthanna ethisi elŋe).

16 “Nǝ kila linaanɔ Yahuuḏiiyyǝ, laazim ǝri avri ǝri allɔ ki-ŋwundǝr-lǝ. 17 Ŋgwa kwɔnaanɔ kiyiŋna-la ŋweere ǝthi lɔɔmɔri mac ethi-li dappi ethǝnḏi ki-dɔɔnɔ kwuuŋwun ethi dimmǝ kwomne kwuuŋwun, 18 Nǝ ŋgwa kwɔnaanɔ kwuthǝr ŋweere ǝthi ŋɔma mac ethaaɽi ethi dimme kirethi kuuŋun. 19 Ǝnnǝ ṯurvǝ ṯinḏi-mi ethǝnḏi ki-ŋwaamin-la ŋwa, ṯǝthi laaw liitha, nǝ kila lǝṯiiɽi tok. 20 Aarir Allah kiyiiriny mindaŋ meere apralɔ koo-gi ya ki-laamin-la lǝthi Sǝbiṯ mac. 21 Kaka ninḏi-gwɔ ṯurvǝ ethǝnḏǝlɔ ṯir nyoro-nyoro ṯiti ṯimǝ naani kinnǝ laamin leere mac, kinaŋw tuk a kittina-gwɔ ṯurmun-lɔ kwon-kwon mindaŋ kirem kwɔmoro kimaara. Mindaŋ ǝreere ǝrrini ŋeere ŋɔrɔŋw kwokwony mac. 22 Laakin Allah wɔmǝ ǝmrǝṯisi nyaamin kworo; ǝŋgwɔŋw-seere ǝrri ŋɔ mac, ǝŋgwɔŋweere kweere mac kwǝŋgi naani kwɔmiithɔ laakin sǝbǝb-gi kwǝthi lizi luuŋwun lǝllɔŋwsi-nǝ, a Allah amrǝṯisi nyaamin kworo.

23 “E-ta mɔŋw ǝccǝ ŋaaŋwɔsi kweere-ŋwɔ, ‘Iisarmba! Kwɔrɔstɔ kwɔrmaṯa ŋgwɔ!’ Alla ‘kwɔrpa ŋgwala kinanaŋw!’ Ǝṯǝmminicǝ mac. 24 Kaka ninḏir-gwɔ ethiila lǝṯi ruusi rogɽo reeŋen Lɔkwɔrɔstɔ ŋidiny, nǝ liɽii lir ŋidiny tok, ǝrǝrri ŋilima ŋɔppa-ŋɔppa, nǝ ṯiliŋɽasa tok, mindaŋ mǝrsi kaṯṯaci ṯaay ethisi ṯuusi kila liccasi Allah-na. 25 Niŋnarsi-ṯi! Nyii kwɔmǝ-ŋǝsi ṯǝmsici ŋiɽaŋali nǝŋsi andaci niti ninḏi lɔɔmɔr kinnǝ mac. 26 Ya mǝrŋǝsi ǝccǝŋw, ‘Iisar-ṯi, ŋgwana ki-sahraa-na! Ǝṯinḏi kinanaŋw mac!’ Alla mǝrŋǝsi ǝccǝŋw, ‘Ŋgwɔ kwuluccunǝ kɔnɔŋw!’ Ǝṯisi ǝmminicǝ mac. 27 Kaka ninḏi-gwɔ Tɔr ṯǝthi Kwizigwunǝŋ ethiila kaka ṯimen ṯǝṯi erṯe leereya naana fɔɔri-gi kwuuŋwun, ǝṯɔŋw ruuthǝ aaŋwɔn-yi mindaŋ ǝṯɔŋw ernene ǝzir-yi wǝṯi-yi aaŋwɔn ɔɽi.

28 “Kǝzir wǝṯi-gwɔ kwomne naani kwaayɔ ǝṯi-gwɔ ŋwɔfirṯaŋ raaythi dɔŋw.

Kilyǝ kǝthi Tɔr ṯǝthi Kwizigwunǝŋ mɔŋwaaɽa.

(Mɔrgus 13:24-27Luuga 21:25-28)

29 “Mǝ ṯurvǝ ernene tɔc ṯǝthi ŋwaamin ŋwa, a aaŋwɔn oro kirim, a ǝwǝ ere erṯelɔ mac, a rɔɔrɔm irdidǝ ki-leere-na a ŋɔma ŋɔppa ŋǝthi leere riiginni. 30 E-ta a @alaama wǝthi Tɔr ṯǝthi Kwizigwunǝŋ ruwǝnnǝlɔ ki-leere; mindaŋ a lizi tatap lǝthi ṯurmun aarii, mǝreese Tɔɔrɔ ṯǝthi Kwizigwunǝŋ tindi ŋwebleth-na ŋwɔthi leere ŋɔma-ŋi, nǝ ŋinith-ŋi ŋɔppa tok. 31 A kibooɽony kɔppa ṯiŋa ŋwal-lɔ, mindaŋ ŋwɔ ṯiŋatha limeleka luuŋwun ki-rɔkɔn rir kwaɽiŋan rǝthi ṯurmun, ǝri raayisa lizi dɔŋw luuŋwun liccaŋwsi-na ǝzir naana tatap wǝthi ṯurmun.

Ḏǝris ṯǝthi kwɔɔtha.

(Mɔrgus 13:28-31Luuga 21:29-33)

32 “Ethi-ŋǝsi kwɔɔtha ǝccǝ @allima ḏǝrisa, mǝ rill ruuŋwun oro tul-tul ǝṯir aari ibṯǝḏi ethi ruuthǝ, ǝṯelŋece ethaarɔŋw kiɽaa kimaadithi keṯṯok. 33 Ŋwɔṯaŋw meese kwomne-ŋgwɔ tatap, ǝsi elŋe ethaarɔŋw kwɔmaadithi keṯṯe-keṯṯok ethiila. 34 Nyii kwǝccǝ-ŋǝsi-mǝ ŋwɔ rerrem, lizi lǝthi lɔɔmɔr kɔlɔ liti lai mac, mindaŋ mǝ kwomne ŋgwɔ tatap ǝrrini. 35 A leere-ŋa wurǝyu-yi ernene kithaay, laakin ŋiɽaŋal ŋiinyi-tǝ ǝreere ernene ḏuṯ.

Kwiti kweere mac kwilŋithi laaminɔ alla saa@.

(Mɔrgus 13:32-37Luuga 17:26-30, Luuga 34-36)

36 “Laakin ŋǝthi laamin kila saa@-gi tǝ, nǝsi kwizi kweere ere elŋe mac, wala limeleka lǝthi ki-leere-naŋw, wala Tɔr illi Papa ṯɔɽɔk. 37 Kilyǝ kǝthi Tɔr ṯǝthi Kwizigwunǝŋ kinḏi ethoro kaka ŋa ŋǝrrinǝ ki-lɔɔmɔr-la lǝthi Nuuh. 38 Ki-ŋwaamin-la ŋwa ŋwiti ŋwinḏiŋi kiiru kinnǝ mac, ǝti lizi ethne nǝ ǝṯir ii, nǝ lɔr-ŋa laaw-li aagathathisi-na mindaŋ nǝ laamin ṯǝ kila iila limǝ-li Nuuh ǝnḏi ki-mɔrkǝb-nǝ; 39 nǝrseere elŋece ŋǝrrinǝ mac mindaŋ nǝsi kiiru ṯǝrmizǝlɔ, nɔŋwsi ferṯe kithaay ndendeṯ. Nǝrṯǝ ele ethoroŋw tok mǝ Tɔr ṯǝthi Kwizigwunǝŋ ele ethiila. 40 Ki-lɔɔmɔr-la ṯǝ kila, mǝ lɔr ndǝn akkɔ ŋothɽor ki-yiŋna-la ǝri dimmǝ kwette ǝri ṯayyalɔ kwette. 41 Mǝ laaw ndǝn roo kalkalɔ ǝri dimmǝ kwette, na ǝri ṯayyalɔ kwette. 42 Aŋrathir kǝniny, kaka niti nilŋithiŋǝ-gwɔ laaminɔ linḏi-li Kweeleny kwaalɔ ethiila mac. 43 Ǝŋgi kwizi kwǝthi dɔɔnɔ-ŋw elŋece ethaarɔŋw kwɔɔɽam kwinḏi ǝthiila ṯaccaŋ, ǝŋgwɔŋw naanalɔ kwigɽiṯɔ mindaŋ ǝŋgwɔŋweere duŋgwǝci kwɔɔɽami ethǝnḏi kiininy kwuuŋwun mac. 44 Ŋwɔṯaŋw laazim a-naanalɔ ŋaaŋa tok cɔgwo-cɔgwop, kaka ninḏi-gwɔ Tɔr ṯǝthi Kwizigwunǝŋ ethiila ki-saa@-la kwiti kwigittathiŋa-gwɔ mac.

Khaḏaam kirllalɔ, nǝ kiti kirllalɔ mac.

(Luuga 12:41-48)

45 “Ǝyǝ kwɔrɔ kwir khaḏaam kirllalɔ, nǝ kǝthi yǝnǝ? Kindǝr-ṯǝ ŋga kuruuzǝ sǝyyiḏ kwuuŋwun wǝkiil wǝthi yaḏaam yithaathɔ ethisi inḏǝṯṯǝ ethneya ki-lɔɔmɔr-la lǝthi ethne. 46 Khaḏaam ŋga kinḏi-pǝ ethaamina mǝ sǝyyiḏ kwuuŋwun iila mindaŋ mɔŋw kaṯṯasi kwaamisi ǝrriŋw! 47 Nyii kwǝccǝ-ŋǝsi-mǝ ŋwɔ rerrem, kwɔ sǝyyiḏ kwuuŋwun ruusi wǝkiil wǝthi kwomne kwuuŋwun tatap. 48 Laakin mɔŋworo khaḏaam kigii, e-ta ŋwaarɔŋw ki-ṯɔgwor-naŋw, ‘Sǝyyiḏ kwiinyi kwinḏi ethi naana lǝlu-ttuk’. 49 Mindaŋ ŋwaari ibṯǝḏi ethi ippipi yaḏaama kiya yakkir-yi ŋothɽor, mindaŋ ŋwɔ ethne nǝ ŋwɔ ii lizi-li lǝṯi urlǝli. 50 E-ta mǝ sǝyyiḏ kwǝthi khaḏaam ŋga aaṯa laamin lette nyithak liti ligittathi-li khaḏaam mac athaarɔŋw kwaaṯa, wala ethelŋǝ lɔɔmɔri luuŋwun. 51 E-ta a sǝyyiḏ kwuuŋwun inḏǝthǝ ṯurvǝ ṯiraara ṯeṯṯec, ŋwɔsi ɔɽɔmasi dɔŋw lizi-li likǝɽinyjinǝlɔ, ŋwɔgwɔ aarii kinanaŋw nǝ ŋwɔ yee yiŋath-na tok.