Yǝcu mɔŋgwɔ ǝnḏi githiinyǝ-ŋi Urshaliim.
(Maṯṯa 21:1-11Luuga 19:28-40Yuhanna 12:12-19)1 Mǝr iilici Urshaliimi-ŋwɔ keṯṯok, kǝzir wǝni Beiṯ-faaji, nǝ Beiṯ-@aniya aayinɔ kuṯṯu wǝni Zǝiṯuun, nɔŋw ɔɔsi ṯalaamiiza ṯuugwun ṯiɽǝn, 2 nɔŋwsǝccǝŋw, “Nḏir ki-lilli-na linaanica-ŋǝsi keereny. Mǝ ɔppaṯhi kinanaŋw tǝ, a iisanni tǝɽiŋgǝŋi tette bir tir limaathar, tikekkinǝ, titi timǝr-gwɔ allɔla kinnǝni mac, kǝdithǝr a mɔltha. 3 Mɔŋwɔccǝ ŋaaŋwɔsi kweere-ŋw, ‘Ŋotho ŋǝrrǝ-ŋǝsi ŋɔ ŋɔrɔŋw?’ ǝccǝriŋw, ‘Kweeleny kwɔrɔ kwɔnaŋna, e-ta ŋwɔɽǝ kɔnɔŋw fittak’.” 4 Mǝreele nǝr kaṯṯasi tǝɽiŋgǝŋi tir limaathar tikǝkkinǝ kǝgwur wǝthi dɔɔnɔ, ṯaay kǝni. Mǝr kǝdithǝ, 5 nǝsi lizi lokwo lirlɔ kinaŋw ǝccǝŋw, “Aatha kwɔrɔ ŋgwɔ kwǝrrǝŋǝ, a lotho limǝ kǝdu tǝɽiŋgǝŋi?” 6 Nǝrsi ǝŋnici kaka-ṯǝ ŋa ŋandicasi Yǝcu, e-ta nǝsi lizi duŋgwǝci nǝreele. 7 Nǝr mɔlca Yǝcu-ŋw tɔɽiŋgǝŋi tir liimaathar nǝr ɔgɽatha yirethi-la yeeŋǝn; mindaŋ nǝgwɔ Yǝcu dallɔ-la, 8 nǝ littǝzir kwurbuci yirethi-lɔ yeeŋen ki-thaay-la, nǝ lithaathɔ nǝr kilaŋtitha rill rǝthi yaaɽi nǝrsi kwurbicǝlɔ ki-thaay-la tok. 9 Nǝ kila liŋnaca ŋunduŋw keereny, nǝ likwaathathɔ kuṯṯunǝ nǝr kette ŋwɔkǝɽiŋi nǝraarɔŋw, “Ethi Allah niini-nǝ! Ethi Allah ɔrtatha ŋgwa kwinḏi yiriny-yi yǝthi Kweeleny! 10 Ethi Allah ɔrtatha ŋeelenyi ŋinḏi ethiila, ŋǝthi Mǝlik kwǝni Daawḏ, kwir papa kwǝri! Ethi kǝniny Allah niininǝ kindala kider!” 11 Mɔŋw ɔppathi Urshaliim, nɔŋwɔnḏi ki Heikal-na, mindaŋ mɔŋw raaŋitha kwomne-lɔ tatap, na mǝ kirakalɔ oro tǝ, nǝr ruu ṯalaamiiz-thi ṯuuŋwun ṯir wrii-kwuɽǝn nǝreele Beiṯ-@aniya.
Yǝcu mɔŋgwɔ ollo kwɔɔtha.
(Maṯṯa 21:18-19)12 Mǝ ŋɔrpɔ-ŋgwa oro tǝ, nǝr aaɽa min Beiṯ-@aniya, nǝ yaaŋwɔ yee Yǝcu-ŋwɔ. 13 Mɔŋweese kwɔɔtha kinǝŋgwu tuk kwuruunǝ kurvu-kurvuk, nɔŋweele ethi iisaaca ŋwɔɔtha ŋweere. Mindaŋ mɔŋweele keṯṯok, mɔŋweere keṯṯok kwomne kweere mac illi yǝni ṯɔɽɔk, kaka niti nɔrɔ-gwɔ lɔɔmɔr lǝṯi-li lɔɔtha riiɽi kinnǝ mac. 14 Nǝ Yǝcu ǝccǝ kwɔɔthaŋw, “Kwiti kweere kwɔŋǝ yecce ŋwɔɔtha kwokwony mac.” Nǝ ṯalaamiiz ṯuuŋwun niŋnaci nandisaŋw.
Yǝcu mɔŋgweele ki Heikal-na.
(Maṯṯa 21:12-17Luuga 19:45-48Yuhanna 2:13-22)15 Mǝr ɔppathi Urshaliim, nɔŋwɔnḏi ki Heikal-na, nɔŋwsi ruttǝ kila lǝṯi illilla kwomne, nǝ lǝṯisi liiṯṯatha tok ki Heikal-na, nɔŋwsi ṯanyacci rerbeeza-la rǝthi kila lǝṯi uppupi gwuruushǝ-nǝ, nǝ libǝmbǝr lǝthi kila lǝṯi illilla yɔɔthɔri. 16 Nɔŋweere ǝviri-nyŋi kweere kwappa kwomne mac, ethi-gi ruu Heikal-yina. 17 Nɔŋwsi ǝccǝ @allima, nɔŋwsǝccǝŋw, “Ŋiti ŋɔlɔɔthɔna mac-a ŋaarɔŋw, ‘Dɔɔnɔ kwiinyi kwir dɔɔnɔ kwǝthi ṯaara kiyiiriny kwǝthi lizi tatap lǝthi ṯurmunǝ?’ Laakin kwɔmǝ ruusi ŋaaŋa kaka kibaŋ kǝthi lɔɔɽam.” 18 Mǝsi rɔ-asa rǝthi kahana-ŋǝ mɔ@allimiin-gi kwǝthi Sherii@a neŋne ŋɔ, nǝr nǝŋnicǝlɔ ethi ɽeenye; kaka ṯiinyar-gwɔ ŋwɔdɔŋw nǝ kaka liŋɽi-gwɔ lɔdɔŋw tatap ṯa@liim-thi ṯuuŋwun. 19 Mǝ kirakalɔ oro tǝ, nǝr ruu ki-mǝḏiinǝ-nǝ nǝreele par.
Ḏǝris ṯǝthi kwɔɔtha.
(Maṯṯa 21:20-22)20 Mǝr aaɽa ŋɔrpana ŋgwa, nǝreese kwɔɔtha kwɔmǝ ɔnḏi rɔvɔɔ-ri-na tatap kwɔrop. 21 Nǝ Bɔṯrɔs kithaayini nɔŋwɔccǝŋw, “Yaa Mɔ@allim iisa-ti! Kwɔɔtha-ŋgwa kwulluthu-ŋǝ kwɔmǝ-tǝ ɔnḏi kwɔrop!” 22 Nǝsi Yǝcu aŋnici nɔŋwsǝccǝŋw, “Ǝṯǝthici Allah ṯǝmminǝ-nǝ. 23 Nyii kwǝccǝ-ŋǝsi-mǝ ŋwɔ rerrem, mǝ kweere nyithak andaci aayinɔ wɔ, ethi accǝŋw, ‘Iidǝthi ki-bahar-na’, mɔŋweere oro rɔgwor-na riɽǝ-riɽǝn mac, mɔŋwɔthi ṯǝmminǝ ethaarɔŋw ŋa ŋandisa-ŋwsi ŋinḏi ethǝrrinici ŋunduŋw, ǝrtǝ ǝrrinici ṯǝŋw. 24 Ŋwɔṯaŋw nyii kwǝccǝ-ŋǝsi-mǝ ŋwɔ, mǝ ɔṯalɔ kwomne-gi kweere nyithak ki-ṯaara-na kiyiiriny tǝ, ǝṯǝthi ṯǝmminǝ ethaavi e-ta ǝtaavi. 25 Mǝ rilli ethaari kiyiiriny, mǝgǝthi kweere wǝŋ tǝ, ǝṯisi fivrici kithaay, mindaŋ mǝŋǝsi ṯarnyala ṯaalɔ ṯǝṯi nanni ki-leere-na fivrici ŋaaŋwɔsi ŋikiyaŋi ŋaalɔ tok. [ 26 Nǝ mǝseere fivrici lithaathɔ mac tǝ, ǝŋǝsi ṯarnyalɔ ṯaalɔ ṯǝṯi nanni ki-leere-na ere fivrici ŋaaŋwɔsi ŋikiya-ŋi ŋaalɔ tok mac.”]
Yǝcu mǝr-gwɔ uṯicǝlɔ sɔlṯa-gi kwuuŋwun.
(Maṯṯa 21:23-27Luuga 20:1-8)27 Nǝr aaɽitha Urshaliim kwokwony. Mindaŋ mǝ Yǝcu iirǝrǝlɔ ki Heikal-na tǝ, nǝ rɔ-asa rǝthi kahana-ŋǝ mɔ@allimiin-gi kwǝthi Sherii@a nǝ lishiyuukh tok iila naanɔ-ŋgwɔ, 28 nǝrǝccǝŋw, “A kwǝṯi ǝrri kwomne-ŋgwɔ sɔlṯa-gi kwǝthi ǝyǝ, alla ǝyǝ kwɔrɔ kwinḏǝthǝ-ŋǝ sɔlṯa ethisi-gi ǝrri?” 29 Nǝsi Yǝcu ǝccǝŋw, “Nyii kwɔŋǝsi uṯicǝlɔ ŋiɽaŋal-ŋi ŋette tok; mǝrnyii ǝŋnici tǝ, ŋǝsi-mǝ andaci sɔlṯa kwundǝr kwǝndu kwǝṯiny-gi ǝrri kwomne-ŋgwɔ. 30 Mǝ@muudiiyya kwǝthi Yuhanna kwǝthi ki-leere-naŋw kwirii alla kwǝthi lizigwunǝŋ kwɔrɔ? Ǝŋnicǝr-nyii-ṯi.” 31 Nǝri ɔppathalɔ deŋgen-na, nǝraarɔŋw, “Mǝrǝccǝŋw, ‘Kwǝthi ki-leere-naŋw kwɔrɔ’, kwǝnyji ǝccǝŋw, ‘Nǝ kwende kwǝmminicǝ-ŋe?’ 32 E-ta kwǝri ǝccǝŋw, ‘Kwǝthi lizigwunǝŋ kwiri-a’?” Nǝrǝni lithiinya lizi, kaka naarir-gwɔŋw tatap Yuhanna kwɔrɔ kwiɽii rerrem. 33 Ŋwɔṯaŋw nǝr ǝŋnici Yǝcu-ŋw nǝrǝccǝŋw, “Ŋiti ŋilŋica-nyji ǝzir mac.” Nǝsi Yǝcu ǝccǝŋw, “Nǝ nyii tok ŋǝseere andaci mac, sɔlṯa kwundǝr kwǝndu kwǝṯiny-gi ǝrri ŋothɽor ŋɔ.”
© Nuba Ŋireeɽe New Testament © The Bible Society in Sudan, 1993.