Ṯa@liim ṯǝthi ǝthi wǝthi lugwurnǝ.
(Mɔrgus 7:1-13)1 Kwaathan tǝ nǝ Lifirriisiiyyiin-ŋǝ mɔ@allimiin-gi kwǝthi Sherii@a iila Urshaliim-ŋgi, nǝreele naanɔ-gwɔ Yǝcu, nǝr uṯicǝlɔ nǝrǝccǝŋw, 2 “Talaamiiz ṯɔɔŋwa ṯotho ṯǝti dappi ǝthiyilǝ wa wɔtayyica-nyji papa-ŋalɔ lǝri lǝthi kerreny-ŋwɔ? Kaka nǝṯir-gweere ɔni rii reeŋen ŋǝmmǝŋ mac kerreny ethi-mǝ ethne!” 3 Nɔŋwsǝŋnici nɔŋwsǝccǝŋw, “Nǝ ŋaaŋa lotho lidappɔ kuruu-gilǝ kǝthi Allah, mindaŋ ǝti rɔɔmi ta@liima-lɔ ṯǝthi ŋwɔɽa ŋwaalɔ? 4 Kaka naarɔ-gwɔ Allah-ŋwɔ, ‘Ǝtiiɽi tarnyalɔ-ŋwsi-na laanyalɔ-gi’, nǝ ‘Kweere kwollo ṯǝrnyin-ŋwɔsi lǝnyin-gi ǝri ɽeenye’. 5 Laakin ŋaaŋa lǝṯi aari @allima eṯaarɔŋw, mǝ kwizi kweere ǝthi kwomne kweere kwǝthi-gi mǝcci ṯǝrnyin-ŋwɔsi lǝnyin-gi, laakin mɔŋwaarɔŋw, ‘Kwomne-ŋgwɔ kwɔmoro kwǝthi Allah’, 6 nǝreere ɔvthanni kwokwony mac ethi-gi iiɽi ṯǝrnyin-nǝ lǝnyin-gi. Nǝ sǝbǝb-gi-ṯǝ ŋgwɔ nǝni limǝ dappi kuruu-gilǝ kǝthi Allah, mindaŋ ǝti rɔɔmi ṯa@liima-lɔ ṯǝthi ŋwɔɽa ŋwaalɔ. 7 Ŋaaŋa kila lǝṯi arri ŋidiny! Isha@ya kwaamimi andasiŋw ŋiɽiiya-ŋi ŋiɽaŋali ŋǝni ŋaalɔ naarɔ-ŋgwɔŋw, 8 ‘Allah waarɔŋw, Lizi kɔlɔ lǝṯi-nyii iiɽinǝ ruunyu-ri domony, laakin rɔgwor reeŋen tǝ, nǝrnyiiruccinǝ tuk. 9 Lende lǝthi faayitha kweere ethi-mǝ kwocce nyuŋw-lɔ, kaka nǝtir-gwɔ ǝccǝ lizi @allima waamira wǝthi ŋizigwunǝŋ, kaka ǝṯɔŋworo Sherii@a kwiinyi!’ ”
Kwomne kwǝṯi ruuŋwi kwizi-nǝ.
(Mɔrgus 7:14-23)10 E-ta nǝ Yǝcu ɔrnɔṯi lizi nɔŋwsǝccǝŋw, “Niŋnarsi-ṯi ŋɔ ǝsi elŋe tok. 11 Kwomne kwǝṯi ǝnḏi kworo-gi kwiti kwǝṯi ruuŋwuci kwizi ṯɔgwori mac; illi ŋgwa kwǝṯi ruuthǝ duŋgwun-nǝ. Nɔŋworo kwǝṯi ruuŋwi ŋunduŋw-nǝ.” 12 E-ta nǝ ṯalaamiiz iila nǝrǝccǝŋw, “A kwilŋica ethaarɔŋw Lifirriisiiyyiin liti laamina mac a-niŋnar ŋiɽaŋali ŋɔ-a?” 13 Nɔŋwsǝŋnici nɔŋwsǝccǝŋw, “Kwaaɽi kweere kwiṯi kwugiithǝ Ṯǝrnyǝri mac ṯǝṯi naani ki-leere-na, ǝri allathalɔ kithaay puduk. 14 Ǝṯisi kittica yǝy mac! Lir ŋwɔɽa ŋwir lunduŋw. Mǝ kwunduŋ mɔmlotto kwunduŋǝ, ǝri iidǝthi ndǝndǝk ki-lubuŋw-nǝ.” 15 Laakin nǝ Bɔṯrɔs ǝccǝŋw, “Uppucǝ-nyji-ṯi mǝthǝlǝ-nǝ ŋgwɔ.” 16 Nɔŋwsǝccǝŋw, “Ŋiti ŋilŋithi-ŋǝsi ŋaaŋa tok mac-a? 17 Ŋiti ŋilŋithi-ŋǝsi mac-a, mǝ kwomne kweere ǝnḏi kworo-gi mindaŋ ǝṯɔŋw ɔɽi kaari-na, mindaŋ ǝṯɔŋw ralli ǝṯɔŋw ruwǝthǝlɔ-a? 18 Laakin ŋgwa kwǝṯi allitha kworo-gi kwǝni kwǝṯi ruuthǝ ki-ṯɔgwor-na, nɔŋworo kwǝṯi ruuŋwi kwizi-nǝ. 19 Ŋgwa kwǝṯi ruuthǝ ki-ṯɔgwor-na ṯuuŋwun: ǝfkǝr wigii wǝthi-yi kette dimmi ya, ǝthǝrri ŋiijinǝ nǝ ǝthisi ǝrri ŋithaathɔ ŋir ŋǝrṯǝmbǝl, ŋɔɔṯam, ŋǝluŋ, nǝ ṯɔŋwɔn tok. 20 Kwomne kwirṯa ŋgwɔ kwǝṯi ruuŋwi lizi-nǝ. Laakin ŋǝthi ethne rii-ri riti riiyinnǝ mac tǝ; ŋɔrɔŋw ŋende ŋǝṯi ruuŋwi kwizigwunǝŋi-nǝ.’”
Ṯǝmminǝ ṯǝthi kwaaw kwir Kan@aaniiyya.
(Mɔrgus 7:24-30)21 Nǝ Yǝcu ɔrlacci ǝzir wa ŋwɔḏoŋw, nɔŋweele kǝzir wǝthi mudun kwǝthi Sɔɔr-ŋǝ Sayda-gi. 22 Nǝ kwaaw kwir Kan@aaniiyya kwɔnaanɔ kǝzir wa, iila naanɔ-ŋgwɔ nɔŋw aaritha nɔŋw-ǝccǝŋw, “Tɔr ṯǝthi Ḏaawḏ-ŋǝ iinǝnyii-ṯǝ ṯɔgwor-na yaa sǝyyid! Tɔr ṯiinyi tir tiira, kirana ṯǝthi ṯigɽimǝ-nǝ ṯigii tuumǝ beṯṯen.” 23 Laakin nǝ Yǝcu ere uvici kworo mac. Mindaŋ mǝ ṯalaamiiz ṯuuŋwun iila nǝr tuurǝccǝlɔ nǝrǝccǝŋw, “Ṯiŋathi kithaay! Kaka kwakithathɔ-ŋgwɔ nyuŋwsi kenyjer-gilɔ!” 24 Nǝsi Yǝcu ǝŋnici nɔŋwsǝccǝŋw, “Lɔɔsasa-nyii ki-yaaŋal yɔthɔɔthɔ yǝthi lizi lir Israa-iil ṯɔɽɔk.” 25 Nǝrṯǝ oroŋw mindaŋ nǝ kwaaw iila nɔŋw iidǝccǝlɔ ŋwɔɽelle-na nɔŋwɔccǝŋw, “Mǝccǝnyii-ṯǝ ya sǝyyid!” 26 Nǝ Yǝcu ǝŋnic nɔŋwɔccǝŋw, “Ŋende ŋɔvthanna ethi dimmǝthǝ nyelle ethnc, ethi kǝṯṯici nyinyǝnu.” 27 Nǝ kwaaw ǝŋnjci nɔŋwɔccǝŋw, “Aw a kwɔvthasa rac yaa sǝyyid. Laakin nyinyǝn nyǝṯi-pǝ mumnǝthǝ kwuthunǝŋ-lɔ kwǝṯi bibindatha rerbeeza reeŋen kuṯtu.” 28 Mindaŋ nǝ Yǝcu ǝŋnici nɔŋwɔccǝŋw, “A kwir kwaaw kwette kwǝthi ṯǝmminǝ ṯɔppa ṯimni! Ethir-ŋǝ ǝrrinici ŋir-ga ŋinaŋna-ŋasi.” Nǝ ki-lɔɔmɔr-la ṯǝ kila nǝ tɔr ṯuuŋwun tir tiira sawanni tɔc.
Yǝcu mɔŋgwɔ sǝwi lizi luuru.
29 Nǝ Yǝcu diiɽi kǝzir wa nɔŋweele kwindarathi bahara kwǝthi Jǝliil-ŋwɔ. Nɔŋw allɔ ki-lundǝr-lǝ nɔŋgwɔ naanalɔ. 30 Nǝ ŋwɔdɔŋw iila naanɔ-ŋgwɔ ŋwittǝzir ŋwɔmɔlthu lizi lir yomsoŋ, lir lunduŋw, lir ŋwikii mindaŋ, lanninna riŋla-lɔ, nǝ lithaathɔ littǝzir luumǝ nǝrsi kettice-lɔ ŋwɔɽelle-na ŋwuuŋwun; mindaŋ nɔŋwsi sǝwi. 31 Nǝ lizi liŋɽalɔ buruc, mǝrseese lanninna riŋla-lɔ limǝ andisalɔ bireṯ, nǝ ŋwikiya ŋwɔmǝ saawi, nǝ yomsoŋa yimǝ iirǝrǝlɔ, nǝ lunduŋǝ limǝ aami ese ǝzir-ŋwɔ; mindaŋ nǝr ɔrtatha Allah wǝthi Israa-iil.
Yǝcu mɔŋgwɔ ithni lɔɔrɔ lir arba@ alf.
(Mɔrgus 8:1-10)32 Nǝ Yǝcu ɔrnɔṯi ṯalaamiiza ṯuuŋwun nɔŋwsǝccǝŋw, “Ṯɔgwor kɔthɔ tiyathiny ki-lizi, kaka mǝrnyii-gwɔ naanasi yaaŋwɔn ṯoɽol liti liithi kwomne kweere mac; ninyeere ǝmmini mac ethisi ṯiŋatha kithaay-la yaaŋwɔ-yi, mindaŋ etheere ajli kǝzir weere kithaay-la mac.” 33 Nǝ ṯalaamiiz ǝccǝŋw, “Nyiiŋǝ laalasi ethneya wittǝzir ṯaka manɔ ki-sahraa-na kɔnɔŋw ethi ithni dɔŋw kɔlɔ tugwrǝ?” 34 Nǝsi Yǝcu ǝccǝŋw, “A lǝthi rǝghiivǝ tha?” Nǝrǝccǝŋw, “Dɔvokwɔɽony, nǝ nyɔm nyokwo.” 35 Nǝ Yǝcu andaci lizi ethi naanalɔ kwurǝyu-lu. 36 E-ta nɔŋw dimmi rǝghiivǝ rir dɔvokwɔɽony nǝ nyɔm tok, nɔŋwɔccǝ Allah shukran, nɔŋwsi undǝnǝ, mindaŋ nɔŋwsi inḏǝthǝ ṯalaamiiza, e-ta nǝsi ṯalaamiiz kannaci lizi. 37 Nǝr ethne tatap nǝr bee. Ṯaŋw nǝ ṯalaamiiz dimmi luvǝ dɔvokwɔɽony luurǝnnǝ ethneya deddep wumǝ ǝɽinni. 38 Nǝ lɔr ṯarr lithna nǝroro arba@ alf, nǝreere ǝnyji layɔ-ŋwɔsi kwelle-gi mac. 39 Kwaathan-tǝ nǝ Yǝcu kette lizi kithaay, mindaŋ nɔŋwɔnḏi ki-mɔrkǝb-nǝ nɔŋweele kǝzir wǝni Majdall.
© Nuba Ŋireeɽe New Testament © The Bible Society in Sudan, 1993.