Ɔli kwɔɔlɔcǝr-gi lɔrṯɔwa.
1 Niŋnacar-nyii-ṯi kirem ŋaaŋa lir lɔrṯɔ! Aarir ŋwal nǝ aarithana tok, kaka ninḏi-gwɔ ṯurvǝ ethiila daŋgal-na!. 2 Ŋɔrṯɔ ŋaalɔ ŋimǝ yǝthini, nǝ yireth yaalɔ yimǝsi livɽitir yee. 3 Ḏahab-ŋǝ fiḏḏa-gi kwaalɔ kwumǝ yǝthini, nǝ yǝthini ŋgwa kweeŋen kwɔmoro shuhuuḏ kwandisasa-ŋǝsi naana, mindaŋ ŋwɔ yee yaŋna yaalɔ kaka iigǝ. Ki-nyaamin-la kinyɔ nyǝthi kwaathan-ŋwɔ ŋaaŋa limǝ attasi ŋɔrṯɔwa ŋaalɔ dɔŋw. 4 @ɔmmaal wa wǝkkicǝ-ŋǝsi ŋothɽor ki-rrɔny-na, niseere inḏǝthǝ ɔjra weeŋen mac. Niŋnacarsi-ṯi nǝrmithǝthir-nǝ! Ŋwal ŋwɔthi @ɔmmaal wa waaɽica-ŋǝsi ŋgwa dɔŋw kwuununnǝ, ŋwɔmǝ ɔppathi kiyǝnǝ yǝthi Allah wir Kweeleny kwǝthi Ŋɔma. 5 Ŋaaŋa limǝ urǝzi ŋimiitha ŋaalɔ deddep ŋǝthi kwurǝyulu-ŋw kwomne-gi kwisaaw-kwisaaw nǝ ṯaamana tok. Ŋaaŋa limǝ ruulici rogɽo raalɔ laamina lǝthi ṯuɽuthǝ kworo. 6 Nǝ nǝccǝ ŋgwa kwirllalɔ haakima mindaŋ nǝ ɽeenye kwiti kwirrǝcǝ-ŋǝsi kithaay mac.
Mithǝ ṯɔgwori nǝ ṯaara kiyiiriny.
7 Ŋwɔṯaŋw liyǝŋgǝri ǝṯi mithǝ rɔgwori, mindaŋ mǝ Kweeleny aaɽa kimaara. Iisar-ṯi kwizi kwǝṯi aagɔ ŋɔrɔŋ, nǝṯɔ-ŋgwɔ mithǝ ṯɔgwori kwǝkkicǝ wurǝyuŋi kizǝn ethi riiɽi ŋwɔɔla ŋwisaaw. Ǝṯɔŋw mithici kawwa ṯɔŋwori kǝthi ŋwɔrram nǝ kǝthi ṯɔɔɽa. 8 Nǝ ŋaaŋa tok laazim ǝṯi-ṯǝ mithǝ rɔgwori-ŋw tok. A firllasi rɔgwor-la kaka mǝgwɔ Kweeleny aadithi ethiila. 9 Liyǝŋgǝri liinyi, ǝṯeere ǝrmithǝthǝnǝ daŋgal-na mac, mindaŋ mǝrŋǝsi Allah ere ǝccǝ haakima mac. Gaaḏi kimaadithi keṯṯok ǝgwur kworo. 10 Liyǝŋgǝri liinyi, kithaayinar liɽiiya kila landisa yiriny-yi yǝthi Kweeleny. Ǝsi aaɽanni mithǝŋgi rɔgwori, nǝ ṯindinyanna naana ṯǝthi ṯurvǝ tok. 11 Iisarsi-ṯi kila lǝṯi-nyji ruusi lizi laamina, kaka nǝṯir-gwɔ mithǝ rɔgwori, ŋimǝsi neŋne ŋǝthi Ayoub ŋimthiŋw-ŋi ṯɔgwori, na nǝsi elŋe ŋirṯaŋ ŋimǝsi Kweeleny inḏǝthǝ kwaathan-gi. Kaka nuurǝnnǝ-gwɔ Kweeleny ŋimɽiyǝnǝ deddep nǝ ǝṯi ṯɔgwor yee-na tok.
12 Laakin ŋɔ tatap liyǝŋgǝri liinyi, ǝṯeere aari haalifa mac leere-li alla wurǝyu-yi, ya haliifa-yi welle nyithak, laakin ǝṯi kǝni aari “Aw” mǝ naŋni ethaari “Aw”, nǝ “Bǝri” mǝ naŋni ethaari “Bǝri”, mindaŋ meere iila ki-hɔkwɔm-na mac wǝthi Allah.
13 Ŋgwa kweere daŋgal-na kwiithi ṯurvǝ? Ǝthɔŋwaari kiyiiriny. Ŋgwa kweere kwǝṯaamina? Ǝthɔŋw kette rilŋa kwɔrtathɔ. 14 Ŋgwa kweere daŋgal-na kwuumǝ? Ǝthɔŋw ɔrnɔṯa lishiyuukha lǝthi kǝniisǝ ethǝrici kiyiiriny mindaŋ mǝr ɔratha ŋiila-ŋi kindala luuŋwun yiriny-yi yǝthi Kweeleny. 15 Ṯaara kiyiiriny ṯǝmminǝ-thi ṯǝṯi sǝwi kwizi kwuumǝ, mindaŋ mǝ Kweeleny aaɽasi ŋunduŋw ki-ṯimen ṯuuŋwun, e-ta a ŋikiya ŋa ŋǝrrǝ-ŋwsi ǝri fivrinnici kithaay. 16 Ŋwɔṯaŋw, ǝṯi tutuwǝsi ŋikiyaŋi-lɔ ŋaalɔ wɔɽe-wɔɽeny daŋgal-na, ǝṯi aarathisi-na kiyiiriny wɔɽe-wɔɽeny, mindaŋ mǝ sǝwinni. Ṯaara kiyiiriny ṯǝthi kwirllalɔ ṯǝthi ŋɔma ŋɔppa beṯṯen. 17 Iliiyyǝ kwir-pa kwizigwunǝŋ kaka nyuŋwsi. Nɔŋwaari kiyiiriny tig-tig ethi kaaw ere dɔnni mac, ṯaŋw nǝ kaaw ere dɔnni kwurǝyulu mac yithlǝyu ṯoɽol nǝ nus. 18 E-ta nɔŋwaari kiyiiriny kwokwony mindaŋ nǝ leere dɔnna kawwa, mindaŋ nǝ wurǝyu riiɽi ŋwɔɔla kwokwony.
19 Liyǝŋgǝri liinyi, mɔŋw ṯirenyje kweere daŋgal-na ŋiɽaŋali-lɔ ŋir rerrem mindaŋ mǝ kweere ǝɽǝ kwokwony tǝ, 20 ethi-ŋwsi elŋe ethaarɔŋw mɔŋw urlǝ kweere kwikiyaŋ-lɔ ki-ŋikiya-na tǝ, ŋwɔni kwɔmǝ kilǝthi rogɽo rǝthi kwikiya ŋgwa ki-riɽany-na mindaŋ mǝ ŋikiya ŋuuŋun ŋittǝzir fivrinnici kithaay.
© Nuba Ŋireeɽe New Testament © The Bible Society in Sudan, 1993.