A kwɔr ǝmi Allah-na aŋgwɔrɔ.
1 Aarir isṯimir lamɽathisa-na ŋiyaŋga-ŋi ŋǝthi ŋɔgrɔstiyan. 2 Kithaayinar ethisi aalanni lithimthina ki-dɔɔnɔ-na kwaalɔ. Kaka ninaanir-gwɔ lokwo lǝrrǝzi ŋɔ mindaŋ nǝr aalanni limeleka liti lilŋicar-si mac. 3 Ǝṯisi kithaayini kila linaanɔ ki-sijin-nǝ, ethoro kaka ǝṯi-li naani ki-sijin-nǝ. Kithaayinarsi kila libii ṯurvǝ, ethoro kaka ǝṯi-li bee ṯurvǝ kildɔŋw. 4 Ethi ṯaaga iiɽinninǝ daŋgal-na tatap, nǝ laazim a lɔr-ŋa laaw-li leeŋen ṯiinyathisi-na wɔɽe-wɔɽeny. Kaka nǝṯisi-gwɔ Allah ǝccǝ kila haakima lǝṯi uri yǝy-lɔ nǝ kila lǝṯǝrri ŋiijinǝ. 5 Tuccǝr ṯamɽa-na tuk ṯǝthi ŋwuruush, nǝ ǝṯi-ṯǝ ǝmmini ŋgwa kwǝthi-ŋǝ, kaka naarɔ-gwɔ Allah-ŋw, “Nyii kwiti kwɔŋǝ duŋgwǝci mac, wala ethi ɔrlacci ŋaaŋwɔ ŋwɔdoŋw.”
6 Ŋwɔṯaŋw mindaŋ ǝraarɔŋw tatap ŋundu-ŋǝli:
“Kweeleny kwir ṯimǝccǝ ṯiinyi,
mindaŋ nyeere ṯeenye mac.
Aatha kwɔrɔ kwinḏiny kweere ethi ǝrrici?”
7 Ǝṯisi kithaayini kila lir ŋwɔɽa ŋwaalɔ, kila landica-ŋǝsi ŋǝthi Allah. Kithaayinarsi ethaarɔŋw, lǝṯi nanni aŋgwɔrɔ, nǝ ŋiɽany ŋeeŋen tok, mindaŋ mǝ kwakithatha ṯǝmminǝ-lɔ ṯeeŋen. 8 Yǝcu Kwɔrɔstɔ kwir-ṯa kwette-kwette, kilgin, aŋwunɔ, nǝ kwǝṯi nannitha dok-dok. 9 Ǝṯi ṯɔɔthɔ mac ṯa@liim-thi kitha ṯithimthina. Kaka nɔvthannar-gwɔ ethaavi ŋɔma ki-rɔgwor-na ne@ma-gi kwǝthi Allah, ŋiti ŋir ŋǝthi gawaaniin kǝthi ethne mac, nǝ kila limǝ iinyici gawaaniinǝ ŋgɔ naana ŋwɔseere mǝcci mac. 10 A kwǝthir ŋwɔthgwunǝ ŋwɔri ŋwiti ŋwɔvthannica kahana kǝṯi akkɔ ŋɔthɽor kǝzir wǝthi Yahuuḏ ethi-gwɔ ethne-la mac. 11 Ǝṯi rǝ-iis rɔppa rǝthi kahana aava ŋiinǝ ŋǝthi haywaanaaṯ Kǝzir Wirllinǝlɔ ter ethisi rillici Allah-lɔ kaka kiraama kǝthi ŋikiya; laakin yaŋna yǝthi haywaanaaṯ tǝ, ǝṯirsi uɽǝzi fǝriigǝ ṯɔɔɽɔthala. 12 Nǝ Yǝcu tok, nɔŋw ai mǝḏiinǝ ṯɔɔɽɔthala, mindaŋ ethi suuɽi lizi ki-ŋikiya-na ŋeeŋen ŋin-ŋi ŋuuŋun wɔɽe-wɔɽeny. 13 Ŋwɔṯaŋw ǝri ruwǝthǝthǝ ŋunduŋw naana fǝriigǝ ṯɔɔɽɔthala, ethi-li ɔɽɔmaṯṯi ki-fǝthiyǝ-nǝ kwuuŋwun. 14 Kaka niti nǝthir mǝḏiinǝ kwɔnannathi dok mac kɔnɔŋw kwurǝyulu, laakin nǝrǝni linaŋna mǝḏiinǝ-lɔ kwinḏi ethiila. 15 Nǝrṯoroŋw ǝri biɽǝthǝ Allah yiriny nyaamin tatap kaka kiraama kǝri Yǝcu-ŋgi, kir haḏiiyyǝ wǝthi ruunyu rǝri ethi iiɽǝzi yiriny yuuŋwun. 16 Ǝṯi-ŋi ṯɔɔthɔna mac ethisi ǝrri ŋisaaw nǝ ethi mǝccǝthisi-nǝ kaka nɔrgwɔ ṯǝ kiraama-ŋgɔ kǝṯi ǝmi Allah-na.
17 Iiyicarsi naana kila lir ŋwɔɽa ŋwaalɔ, nǝ ǝṯi rɔmɔmmi niizaama kweeŋen. Kaka nǝṯir-gwɔ karni rogɽo raalɔ liṯi lǝṯi kaṯṯɔ wǝŋ mac, kaka lizi linḏisi Allah ethisi raaŋaci ŋothɽor ŋeeŋen. Duŋgwǝcǝrsi ethisi ǝrri ŋɔ laamina, nǝ liti lirɔɔnyɔna mac, nǝ ŋiti ŋinḏi-ŋǝsi ethǝvicǝ faayitha kweere mac.
18 Dǝŋṯinǝr ethi ǝrici nyuŋwsi kiyiiriny. Kaka nilŋithi-nyji dedder ethaarɔŋw nyiiŋǝ lǝthi rɔgwori rɔsɔɔɽɔ-na, linaŋna ethisi ǝrri ŋɔvthanna ŋwɔɔmɔri tatap. 19 Nyii kwɔŋǝsi tuurǝccǝlɔ beṯṯen, kwɔɔracca-ŋǝsi ethaari kiyiiriny, mindaŋ mǝnyii Allah ǝɽǝ naaniŋa-gwɔ fittak.
Ṯaara kiyiiriny.
20 Ethi Allah wǝthi ŋiiɽanna wɔmǝ diiɽǝ Kweelenyi kwǝni Yǝcu ki-ŋiɽany-na ŋin-ŋi ŋǝthi wa@ḏ wǝṯi nannatha dok-dok, kwir Kwaaɽa Kwɔppa kwǝthi yaaŋal, 21 ethɔŋw ɔgɽatha ŋaaŋwɔsi naana kwomne-gi kwisaaw-kwisaaw, mindaŋ mǝsi ǝrri ŋǝthi ṯɔgwor ṯuuŋwun, nǝ ŋwɔsi akkɔ daŋgal-na ŋa ŋǝṯǝmi ŋunduŋw-nǝ, Yǝcu Kwɔrɔstɔ-ŋgi; ethi ŋinith nannitha naanɔ-ŋgwɔ dok-dok. Amiin.
Ŋiɽaŋal ŋirimthithɔ.
22 Nyii kwutuurǝccǝ-ŋǝsi-lɔ liyǝŋgǝri liinyi, ethi mithǝ rɔgwori, lakkica ŋiɽaŋali kizǝn ŋǝthi ṯifirlla naana, kaka nɔbla-gwɔ juwaab-ŋgwɔ kwɔlɔcca-ŋǝsi. 23 Nyii kwɔnaŋna-ŋǝsi ethisi elŋe ŋɔ ŋǝthi ǝŋgǝri kwǝri kwǝni Ṯiimɔɔthaaws kwɔmǝr kǝdithǝ ki-sijin-nǝ. Mɔŋw ɔppatha fittak tǝ, nyigiila ndǝndǝk naaniŋa-gwɔ. 24 Aaginnicar-nyji kila lir ŋwɔɽa ŋwaalɔ nǝ kila tatap lirllinǝlɔ ter. Liyaŋgalɔ lǝthi Iṯaaliya-ŋw laaginna-ŋǝsi. 25 Ethi ne@ma nanni ŋaaŋa-li tatap. Aamiin.
© Nuba Ŋireeɽe New Testament © The Bible Society in Sudan, 1993.