Ǝṯi mǝccǝthisi-nǝ wɔɽe-wɔɽeny ṯɔɔvi-thi.
1 Liyǝŋgǝri liinyi, mǝ kwizi kweere kaṯṯanni kwakkisi ŋeere nyithak pir tǝ, nǝr ɔvthanni daŋgal-na ŋaaŋa kila lǝthi Ṯigɽimǝ ethi daɽimatha ŋunduŋw ṯǝjlinnǝ-thi ki-rogɽo. Nǝ aŋranni ŋaaŋa tok, mindaŋ meere mɔmmuni tok mac. 2 Ǝṯi mǝccǝthisi-nǝ wɔɽe-wɔɽeny ṯɔɔvi-thi, nǝ ṯaay-thi ṯǝ kithɔ, a ṯimmasi Sherii@a kworo kwǝthi Kwɔrɔstɔ. 3 Mɔŋwaarɔŋw kweere kwiri ŋiɽaŋal ŋeere, laakin ŋundu-tǝ kwiti kwɔrɔŋw mac, ǝṯɔŋw ǝni kwǝṯi kǝɽinyji rogɽo-lɔ ruuŋwun. 4 Laakin ethi kwette nyithak ṯǝccici rogɽo ruuŋwun, mindaŋ mǝr saawi tǝ, ŋwɔmǝ ǝthi ŋɔma ethi piŋi rogɽo ruuŋwun ŋiɽaŋal-ŋi ŋa ŋǝrrǝ-ŋwsi, ŋiti ŋǝrrǝsi kwizi kweere kwir ter mac. 5 Laazim ethi kwette nyithak uvuni ṯɔɔvi ṯǝthi rogɽo ruuŋwun.
6 Mǝr ǝccǝ kweere @allima ŋiɽaŋali ŋǝthi ŋɔgrɔstiyan tǝ, nǝr ɔvthanni ethi kannathisi mɔ@allim-gi kwuuŋwun kwomne ŋgwa tatap kwisaaw kwǝthiŋw.
7 Ǝṯi kǝɽinyjǝ rogɽo-lɔ raalɔ mac; Allah witi wǝṯir kǝɽinyjǝlɔ mac. Kaka-ṯǝ ŋgwa kwǝṯi kwizi kwee, ǝṯɔŋw-ṯǝ oro kwǝṯɔŋw ɔni. 8 Mɔŋwsi kwee ŋǝthi sɔɔrɔm kwǝthi aŋna wuuŋwun, ŋwɔɔni ṯigiirathalɔ ṯǝthi sɔɔrɔm kwǝthi aŋna; laakin ŋgwa kwǝṯisi kwee ŋir Ṯigɽim, ŋwɔɔni ŋiimiitha ŋǝṯi nannitha dok-dok ŋǝṯisi Ṯigɽim inḏǝthǝ. 9 Ŋwɔṯaŋw ǝreere mɔɔli mac, ethisi ǝrri ŋisaaw, mǝreere ajli rɔgwor-na mac tǝ, nǝ lɔɔmɔr kila-tǝ linḏi rac linḏir-li ethi ǝni. 10 Nǝrṯoroŋw nǝr ɔvthanni ethisi ǝrrici lizi tatap ŋisaaw nigaṯṯisar ṯaay kinnǝni ethisi-thi ǝrri. Nǝ nǝrṯǝ aalaci ethisi ǝrrici kila lǝthi ǝgwur wɔtɔpɔt wǝthi ṯǝmminǝ.
Ɔli kwirimthithɔ nǝ ṯaaginna.
11 Iisar-ṯi ŋwɔɔli ŋwɔppa-ŋwɔppa ŋwɔlɔcca-ŋǝsi-ŋi ṯii-thi ṯiinyi kire-kirem-ŋgwɔ. 12 Lizi kila lǝṯi ṯǝccici ethi kwɔrmɔṯasi ŋaaŋwɔsi ethi uɽunni, lindǝr-ṯǝ lǝṯi naŋni ethisi ruwǝzǝlɔ ŋǝthi aŋna, nǝ ethi ǝllini ki-rogɽo ŋiɽaŋal-ŋi ŋǝthi aŋna domony. Nǝrǝni ŋǝrrǝrsi ŋɔ ṯɔɽɔk, mindaŋ ethisi lizi ere ǝwɽi yǝy-lɔ mac ŋiɽaŋal-ŋi ŋǝthi ŋwuuɽi ŋwɔthi Kwɔrɔstɔ. 13 Nǝ kila saaṯɔk lǝṯisi ǝrri ŋǝthi ṯurmun-nǝ, nǝrseere iinyici naana mac ŋa ŋǝthi Sherii@a. Laakin nǝr naŋni ŋaaŋwɔsi ethi uɽunni mindaŋ ethǝthi ŋɔma ethi ǝllini ŋiɽaŋal-ŋi ŋǝthi ṯuuɽunnǝ ṯaalɔ. 14 Nǝ nyii-tǝ, nyeere ǝllini ŋiɽaŋal-ŋi ŋeere mac, illi ŋwuuɽi-ŋi ṯɔɽɔk ŋwɔthi Kweeleny kwǝri kwǝni Yǝcu Kwɔrɔstɔ; nǝ ŋundu-ŋgi nǝ ṯurmun ṯigrǝnni ki-ŋwuuɽi-lǝ mǝroro ŋǝni nyii, nǝ nyii tok nǝnyii ṯigrǝnni ethi ai kithaay kiyǝnǝ yǝthi ṯurmun. 15 Kaka niti nɔrɔ-gwɔ ṯuuɽunnǝ ŋiɽaŋal ŋeere mac, ǝnir-gwɔ uɽunni alla bǝri; laakin ŋiɽaŋal ŋir mɔhim, nǝ ŋelŋe ŋiyaŋ oro. 16 Ethi ŋiiɽǝnnǝ ŋǝ ŋimɽi-ŋi naani ki-lizi-nǝ tatap kila lir lǝthi Allah.
17 Ǝṯɔŋw undǝŋnǝ nyuŋwɔ kweere kwokwony mac; kaka nuuvunǝny-gwɔ yaamɔrtɔla aŋna naana wiinyi yǝthi Yǝcu.
18 Ethi ne@ma kwǝthi Kweeleny kwǝri kwǝni Yǝcu Kwɔrɔstɔ naani rigɽim-ri raalɔ liyǝŋgǝri liinyi. Aamiin.
© Nuba Ŋireeɽe New Testament © The Bible Society in Sudan, 1993.