Bɔɔlɔs mǝgwɔ Yahuuḏ ǝccǝ ishṯǝki.
1 Mǝ ŋwaamin ṯɔthni ere tǝ, nǝ Hanaaniiyya kwir Rǝ-iis Rɔppa rǝthi kahana ele Gaysarnyya ŋundu-ŋǝ lishiyuukh-li lɔkwɔ nǝ mɔhaǝmi kwǝni Ṯǝrtulluus tɔk. Nǝreele nǝr rilli kiyǝnǝ yǝthi haakim wǝni Fiiliiks, mindaŋ nǝr kettice Bɔɔlɔs-ŋwɔ shǝkiyǝ naanɔ-ŋgwɔ 2 E-ta mǝr ǝnyjǝ Bɔɔlɔs-ŋwɔ, nǝ Ṯarṯullus aari ibṯǝḏi ethi andasi ŋiɽaŋaii ŋǝthi shǝkwǝ nɔŋwaarɔŋw,
“Yaa sǝyyiḏ al-haakim, a kwɔmǝ-nyji mɔmlotto ṯǝthinǝ-thi yǝnǝ ṯɔɔŋwa ŋwɔɔmɔri ŋwɔ tatap linaanɔ laami naana, nǝ nǝrri kwomne kisaaw-kisaaw kwǝthi bǝlǝḏ kwǝri. 3 Ǝṯi-nyii-gi aamina ǝzir naana tatap, nǝ ŋwɔɔmɔri tatap tok, ninyǝni laamina beṯṯen ŋaa-ŋgi. 4 Nǝ kaka niti ninaŋnany-gwɔ ethi kiiraci ŋaaŋwɔ lɔɔmɔr-lɔ domony mac, ŋwɔṯaŋw ŋǝ tuurǝccǝlɔ ethisi iɽinyanni naana ethi kettice nyuŋwsi kǝni ethi andaci ŋaaŋwɔ ŋiɽaŋali ŋoko ŋɔbla keṯṯok. 5 Nyiiŋǝ ligaṯṯisa kwɔɔrɔ-ŋgwɔ kwir khaṯar, kwǝṯi ɔkkwɔkwazi Yahuuḏǝ ǝzir naana tatap, nǝ nɔŋworo nda lǝthi dɔŋw lir Nassaarii. 6 Nɔŋw tǝcci tok ethi ruuŋwi Heikala-na, ŋwɔṯaŋw nǝnyii-mǝ mithǝ [nǝnyeele ethi ǝccǝ haakima ŋiɽaŋal-ŋi ŋǝthi sherii@a kwǝri. 7 Laakin nǝ gaa-iḏ iila kǝni Liisiiyaas nɔŋw urṯǝthǝ nyuŋwsi ŋɔmaŋi-na ki-rii-na rǝri. 8 Nǝ Liisiiyaas alla waamira ethi kila ligitta shǝkiyǝ ethi iila kiyǝnǝ yɔɔŋwa.] Na mǝ uṯici kwɔɔrɔlɔ ŋgwa, rogɽo-ri rɔɔŋwa wɔɽe-wɔɽeny, ǝsi elŋe naanɔ-ŋgwɔ ŋa tatap ŋǝccǝny-ŋi ŋunduŋw ishṯǝki.” 9 Nǝ Yahuuḏ ǝmmini ŋiɽaŋali ŋa tatap ŋǝthi shǝkwǝ, nɔraarɔŋw ginḏǝr-ṯǝ ŋa.
Bɔɔlɔs mɔŋgwɔ rocce rogɽo ruuŋwun kiyǝnǝ yǝthi Fiiliiks.
10 Nǝ haakim andaci Bɔɔlɔs-ŋwɔ ŋurgumi ethandasi. Ṯaŋw nǝ Bɔɔlɔs aarɔŋw, “Nyii kwilŋithi rac ethaarɔŋw a kwir haakim wǝthi bǝlǝḏ ŋgwɔ yithlǝyu yuuru. Nǝ ŋwɔṯaŋw nǝnyii-mǝ aamina ethi rocce rogɽo riinyi kiyǝnǝ yɔɔŋwa. 11 A kwǝthi ŋɔma rac ethelŋe rogɽo-ri rɔɔŋwa, ki-ŋwaamin-la ŋwɔmǝ ṯamthɔ ŋwir wrii-kwuɽǝn ŋwɔmǝny-ŋi ele Urshaliim ethi kwoccalɔ. 12 Nǝ Yahuuḏ ere kaṯṯasi nyuŋwɔ mac ki Heikal-na kwɔppathir-lɔ kwizi-gi kweere, wala ethi kaṯṯasi nyuŋwɔ kwɔkkwaza lizi ki-limajma@-na wala kǝzir weere ki-mǝḏiinǝ-nǝ. 13 Wala ethǝthi ŋɔma ethi inḏǝthǝ ŋaaŋwɔ lɔɽɔjɔ lǝnyjǝr-nyii-li nda naana kire-kirem ki-shǝkwǝ-nǝ ŋgwɔ. 14 Nyii kwɔŋa ilŋithini ŋiɽaŋali ŋɔ; nyii kwǝṯi kwogwɔcce Allah-lɔ wǝthi papa-ŋa lǝri Ṯaay-thi-ṯǝ kitha ṯuruuzǝr ŋundu-ŋǝ ŋidiny. Laakin ǝṯi-nyii ǝmminici ŋiɽaŋali ŋa tatap ŋɔlɔɔthɔna ki Sherii@a-na kwǝthi Muusǝ nǝ ki yiṯaab-na tok yǝthi liɽii. 15 Ninyǝthi ṯǝkkizǝ kizǝn ṯir-ṯǝ kaka ṯǝthir ŋunduŋǝ tok, ṯǝniŋw ṯidiiɽǝ ki-ŋiɽany-na ṯǝthi lizi tatap lisaaw ligii. 16 Ŋwɔṯaŋw ǝṯi-nyii kwɔrmɔṯanni kwɔro-kwɔrop ethi naani kwɔsɔɔɽɔ ṯɔgwor-nǝ cɔr-cɔɽɔc kiyǝnǝ yǝthi Allah nǝ yǝthi lizigwunǝŋ 17 Nǝ kaka mǝnyii-gwɔ naani par min Urshaliim yithlǝyu yuuru, nǝnyii-mǝ ṯaaŋi kinanaŋw kwǝppicǝ lizi liinyi gwuruushǝ kwusugǝzǝr nǝ ethi kitta kiraama tok. 18 Nǝ kinaŋw ṯǝ nǝrrǝ-nyji ŋɔ ŋǝthi kiraama nǝrnyii-mǝ kaṯṯisa ki Heikal-na kwɔmǝ ṯimmasi kuruu kǝthi ṯusuuɽunnǝ. Nǝ lɔdɔŋw ere naani nyii-gi leere mac kinaŋw, wala ṯilakkitha-na ṯeere. 19 Illi nǝ Yahuuḏ yokwo oro yinaanɔ kinaŋw yǝthi muḏiiriiyyǝ kwǝthi Aasiiyya-ŋw; ṯaŋw nǝr ɔvthanni ethiila ŋunduŋǝ rogɽo-ri reeŋen ethi kette shǝkwǝ mǝrǝthi ŋundu-ŋǝ ŋiɽaŋali ŋeere ŋallisar-nyji naana. 20 Ya a duŋgwǝci lizi kɔlɔ linaanɔ kɔnɔŋw ethi andasi kaṯṯiya kiinyi ŋga kirliny-gi kiyǝnǝ yǝthi mǝjlǝs-ŋgwɔ, 21 illi ŋiɽaŋal ŋɔtɔpɔt ŋimǝ-nyji-ŋi ɔvana kiyǝnǝ yeeŋen ŋǝniŋw: ‘Ŋaaŋa kala lǝccǝ-nyii haakima aŋwɔnɔ ŋiɽaŋal-ŋi ŋǝth ṯǝmminǝ ṯǝthi ṯiḏiiɽǝ ki-ŋiɽaŋy-nǝ’.”
22 Nǝ kaka nilŋithi-gwɔ Fiiliiks Ṯaay kɔthɔ ŋǝmǝ-ŋǝmmǝŋ nɔŋw aalatha ŋiɽaŋali rii nɔŋwsǝccǝŋw, “Mǝ gaa-iḏ kǝni Liisiiyaas ɔppatha tǝ, nyimǝ ese gǝḏiiyyǝ kaalɔ.” 23 Nɔŋw ǝllici ḏoobitha kitha ṯǝṯi karni Bɔɔlɔs-ŋwɔ waamira ethi kette ŋunduŋw ki-haraasa-na, laakin ethi inḏǝthǝ hɔrriiyya wokwo, nǝ ethi duŋgwǝci limethgen ethi mǝcci kwomne-gi kweere kwǝṯɔŋw naŋni.
Bɔɔlɔs kiyǝnǝ yǝthi Fiiliiks nǝ yǝthi Ḏuruusilla.
24 Mǝ ŋwaamin ŋwokwo ere, nǝ Fiiliiks-ŋǝ kwaaw-gi kwuuŋwun kwǝni Ḏuruusilla kwir Yahuuḏiiyyǝ iila. Nɔŋw ɔɔsɔthici Bɔɔlɔs-ŋwɔ, mindaŋ nɔŋwsi kettice kǝni ethisi neŋne ŋǝthi ṯǝmminǝ ṯathi Kwɔrɔstɔ kwǝni Yǝcu. 25 Laakin mǝ Bɔɔlɔs aari isṯimir ethi andasi ŋiɽaŋali ŋǝthi ŋɔvthanna, nǝ mithǝ-ŋgi ṯɔŋwori tok, nǝ hɔkwɔm winḏi ethiila. Nǝ Fiiliiks ṯeenye mindaŋ nɔŋwɔccǝŋw, “Nḏi kǝniny kire-kirem-ŋgwɔ, mindaŋ mǝnyii kaṯṯasi fɔrsa tǝ, ŋǝmǝ ɔrnɔṯa kwokwony.” 26 Nǝ nɔŋwɔni kwɔgittathɔ ethi Bɔɔlɔs inḏǝthǝ ŋunduŋw ŋwuruushǝ; nǝ sǝbǝb-gi tǝ ŋgwɔ, ǝṯɔŋw-mǝ ɔrnɔnɔṯa ethi-gi andasi. 27 Mǝ yithlǝ yiɽǝn ere tǝ, nǝ Buurkuyuus Fasṯuus mɔrthathi ki-lɔɔbi lǝthi Fiiliiks kwir haakim. Nǝ kaka a-naŋna-gwɔ Fiiliiks ethi ǝmi Yahuuḏǝ-nǝ, nɔŋw duŋgwǝci Bɔɔlɔs-ŋwɔ ethi naani ki-sijin-nǝ.
© Nuba Ŋireeɽe New Testament © The Bible Society in Sudan, 1993.