Rulofo Kohani Fopara ro Nebi ri
1 Rulofo aza ya OPI ka'da Yosua Kohani Fopara te märi, edrevoya malaika OPI ro kandra, ago Satani edrete drigo Yosua roya nda kicune. 2 Malaika OPI ro atate Satani ri ekye: “Satani, OPI ka mi kozi! Nda se kulu Yerusalema be ono ka mi kozi. Mano gi ono laba oso tiza se ewete ni asi yasi 'do ronye.”
3 Tana Yosua edrete malaika kandra lau so boŋgo undiro yi. 4 Ago malaika se ana atate ànya se kedreyibe nda kandra kai ri ekye: “Mìtri boŋgo undiro 'do ni Yosua lomvosi.” 'Dooko nda atate Yosua ri ekye: “Mana takozi miro te ago mozona boŋgoi to'diro 'da miri osone.”
5 Nda ta ànya se kedreyibe nda kandra kai te boŋgo wäṛiro uvune drî Yosua roya. Ndi ànya vuyi boŋgo wäṛiro te ndädri ago soyi boŋgo te nda lomvo; 'dooko malaika OPI ro edrevoya lototi.
6 'Dooko malaika ititate Yosua ri ekye: 7 OPI Mbaraekye atate nonye ekye: “Ondro ka'do miro ota maro te ago miye kama se mozobe miri 'do te, 'dooko nya'dona ndi 'du 'desi Yekalu maro ro ndi goko na be, ago merina mätu miro ndi kpa oso mabe malaikai se kedreyibe noŋwa ono ro erina 'do ronye. 8 Nyeri dri, mi Yosua, Kohani Fopara, nyeri dri, mi ndi kohanii azi miro be, ami se orivoya taka'daro yi tu kado mileya ro ono: mezina ruindu'ba maro se äzibe Gwoṛi ono 'da! 9 Mindre kuni se mababe Yosua kandra ono orivoya lama njidrieri be, magana taegyi 'da driigye, ago manana takozi wari ono ro 'da u'du alodi si. 10 Tu gi ana si vo ami cini ro uzina oriazi ndaro 'da ikyine riyä oyene ämvukonoro amiro ndi ice kyi'du ro amiro be zele.”