1 Ago ondro Samuele katate, lidri cini Yisaraele ro eri ta ndaro te.
Felesete'bai Payi Sänduku Tao'baro te
Tu ana si Yisaraele'bai fote tesi kyila oyene Felesete'bai be; ànya otoyi gawa te Ebenezere ya, ago Felesete'bai otoyi gawa te Afeka ya. 2 Felesete'bai gotayi Yisaraele te, ago ondro kyila keperevote oko, ànya peyi Yisaraele te ṛe, ago fuyi mànoago te kutu su (4,000) vo kyila oyero ya. 3 Ago ondro kyila'bai kegoyite kovole gawa ya oko, dri'bai Yisaraele ro atate ekye: “Tana e'di ondro ono OPI 'ba Felesete'bai gwo ama opene ṛe niya? Mì'de mèzi Sänduku Tao'baro OPI ro noŋwa ni Silo ya, tana nda kikyi robe ama lako ago kopa ama robe ni mbara kyila'baazii amaro ro ri.” 4 Ago ànya zoyi lazo'bai te Silo ya, ago ni nasi ezi Sänduku Tao'baro OPI Mbaraekye ro te, se rite beti malaikai vookwaro dri ana. Ago ŋgwàagoro ritu Eli ro Hofeni ndi Finasa be, ikyiyite lau Sänduku Tao'baro Lu robe.
5 Ondro Sänduku Tao'baro OPI ro kesate gawa ya oko, Yisaraele'bai cini tre otre riyä rote mbara amba si, ago gyini kandaru ndi kanda. 6 Ago ondro Felesete'bai keriyi kporo amo rote oko, ànya atayite ekye: “Tana e'di amo a'do gwo amba gawa Ebere'bai roya niya?” Ago ondro ànya kuniyite anjioko Sänduku Tao'baro OPI ro esate gawa Ebere'bai roya oko, 7 Felesete'bai a'dote turituri ro; ago ànya atayite ekye: “Lu esate gawa ànyaro ya.” Ago ànya atayite ekye: “Wu, amate rriti ya! Ŋga aza oso nonye a'do kote ämäri kätina. 8 Wu, ama te rriti ya, A'di unina ni ama opane ni mbara lui mbaraekye ono ro yasi ya? Kwoi ni lui se tufuyi Ezipeto'bai be taezaro cini dritoto si vocowa ya ana owo. 9 Nyùturi ko Felesete'bai, Mìye kyila oso mànoago ronye, ukyi nyà'do 'da iyeäṛii ro Ebere'bai ri oso sedri ànya ka'dobe ämäri ronye. Ta'doro mìye kyila oso mànoago ronye.” 10 Ago Felesete'bai yeyi kyila te mbara si, ago peyi Yisaraele te ṛe, ago kyila'bai Yisaraele ro muyite mano alo mute 'ba iro modona ya. Utufu lidri te orivoya amba, kyila'bai Yisaraele'bai ro se kabe aba pa si utufute orivoya kutu 'butenätu (30,000) lau. 11 Ago apa Sänduku Tao'baro OPI rote, ago ŋgwàagoro ritu Eli ro Hofeni ndi Finasa be äfute.
Odra Eli ro
12 Mano Benjamina ro aza imute ni vo kyila ro yasi, ago esate Silo ya 'bu'dä. Ago a'do tusuro ndaro ka'daza, nda wa boŋgo ndaro te ago da durufu te drî ndaro ya. 13 Ondro nda esate oko, nda usu Eli orivoya vo oriro ndaro dri litibiṛi ya voondrevoya, tana ya ndaro 'du loŋgaloŋga ro ta Sänduku Tao'baro Lu ro rota. Ago ondro mano ana kesate 'bakici ya ago kiti lazo te oko, lidri cini 'bakici ya amote liyi be. 14 Ondro Eli keri kporo liyiro te oko atate ekye: “Amo 'do e'di roya?” 'Dooko mano ana imute ndrindri Eli re ago iti tate ndäri. 15 Ndroa Eli rote 'butenjidriesu fonjidriena (98) ago mi ndaro zwete, ago ni voondre kote. 16 Ago mano ana atate Eli ri ekye: “Ma ni nda se kikyibe ni kyila yasi owo; mimu te ondro ni kyila yasi.” Ago Eli eji nda te ekye: “Ta e'diro a'doni ya, ŋgwa maro?” 17 Nda se kezo lazo be ana zatadrite ekye: “Yisaraele'bai muyite ni Felesete'bai risi; utufu lidri amaro te orivoya amba. Ago ŋgwàagoro ritu miro, Hofeni ndi Finasa be, äfu kpate ago Sänduku Tao'baro Lu ro apate.”
18 Ondro mano ana kata ta Sänduku Tao'baro Lu ro tana te oko, Eli e'dete kunduunduro ni vo oriro ndaro se loto dereŋwa lomvo ana drisi; ago kyembe ndaro laŋgote ago nda drate, tana nda te orivoya agoambago ro, ago läŋgyiläŋgyi ro. Nda a'dote dri'baro Yisaraele dri ndroa na 'butesu.
Odra Ävuzi Finasa ro ro
19 Ago toko Finasa ŋgwa Eli ro ro orivoya ŋgwa be, ago te ti utine. Ago ondro anya keri lazo te ekye apa Sänduku Tao'baro Lu rote, ago ambago anyaro ndi ago anyaro be drate oko, dori ya anyaro eto luwute ago anya ti ŋgwa te. 20 Ago ondro anya te ti odrane oko 'ditoko se kikyibe anya utine kai atate anyari ekye: “Nyuturi ko, tana miti ŋgwaagoro te.” Oko anya zatadri kote ago ti ta ata se ànya kabe atana ro kote. 21 Ago anya zi ävuru ŋgwa rote Ikaboda, se takacina anjioko. “A'do 'Desi Lu ro e'be Yisaraele te,” tana Sänduku Tao'baro Lu ro apate, ago ambago anyaro ndi ago anyaro be drate. 22 Ago anya atate ekye: “A'do 'desi Lu ro e'be Yisaraele te, tana apa Sänduku Tao'baro Lu rote.”