OPI ka Lidri ndaro uzi Egone ndare
1 Imba njidriena, ndroa ṛiṛi 'dimiri Dariyasi 'bädri'ba Peresia ro rosi oko OPI atate nebi Zekaria ŋgwa Berekia ro kwozo Ido ro ri ekye: 2 “Ma OPI Mbaraekye ma'dote kyilaro zutui amiro be, 3 oko yauono nyata ànyari, OPI Mbaraekye ekye: ‘Nyègo mare ago megona ndi amire. 4 Nyà'do ko oso zutui amiro ronye. Se kyeno nebii ayoyitate ànyari ko lori koziro ndi taloye koziro be lorine tona. Caoko ànya eriyi ta maro kote ago royi ma kote. 5 Yauono zutui amiro gaŋwaroya? Ago inye'do nebii riyi ndi todra ako ya? 6 Mozo ota ndi tase maro marabe te zutui amiro ri ruindu'bai maro nebii si, oko ànya royi kote ago ezaruyite tana ro. 'Dooko ànya etayidrite, ago niyite anjioko ma OPI Mbaraekye meza ànya ni takozi ànyaro ta oso se ma'ba tabe oyene ana ronye.’ ”
Rulofo Farasii ro Nebi ri
7 U'du 'buteritu fosu imba 'butealo foalo rosi, (se ni imba Sebata ro), ndroa ṛiri 'dimiri Dariyasi ro rosi oko, OPI ezo lazo te ma Zakaria ri rulofo si. 8 Mandre 'diaza te ŋgäkyi si ka ugu umu farasi okaro si. Nda kyi edrete ice kyedo ro lako vodelero ya; ago nda kundusi farasii azaka orivoya okaro, warawararo ago onjero. 9 Ndi meji nda te makye: “'Desi, farasii kwoi takacina e'diya?”
'Dooko malaika se kabe ata mabe ana zatadri maro te ekye: “Kode ànya 'bo e'diyi ya maka'dana tana 'da miri.” 10 Ndi mano se kedrebe ice kyedo ro lako ana zatadri te ekye: OPI zo ànya ni oyine 'bädri täkyine.
11 Ànya itiyi tate malaika OPI ro se ana ri ekye: “Mabate gbikyi 'bädri yasi ago mandrete 'bädri cini kayi ori liatokpe ro.”
12 'Dooko malaika atate ekye: “OPI Mbaraekye, nya'dote kyilaro Yerusalema be ago 'bakici Yuda robe yauono ndroa na te 'butenjidrieri. Mile a'done ndroa na mu'du moda mi'dena gwo yauni ka'dane ànyari ya?”
13 OPI zatadri malaika se kabe ata mabe ana rote ata kadoro yauni rosi. 14 Ndi malaika se ana atate märi tase OPI Mbaraekye katabe ana ayone, se ekye: “Ma orivoya ŋgalu ndra be ta 'bakici alokado maro Yerusalema rota, 15 ago ma orivoya kyilaro amba tu'dei se kayibe ori tokpero kwoi yibe, tana ondro ma'do kote kyilaro amba lidri maro be, tu'dei kai 'bayi lidri maro ro ruezane. 16 Ta'doro megote Yerusalema ya yauni ka'dane 'bakici ono ri. Ago ologona Yekalu maro 'da kigye, ago ago abena 'bakici ono 'da.”
17 Malaika ana ata kpate märi taayone ekye: “OPI Mbaraekye ekye; 'Bakici iro ogo ogana 'da twi ŋga kado si, ago yigo yipana Yerusalema 'da kpa to'dina ago ogo a'dona 'da 'bakici andivo iro ro.”
Rulofo Koyii ro
18 Ago rulofo aza ya mandre koyi su 'daŋgo rote. 19 Ago meji malaika se kabe ata mabe ana te makye: “Kwoi e'diyi ya?” Nda zatadri maro te ekye: “Kwoi ni koyii se kepere Yuda, Yisaraele ndi Yerusalema be ono owo.”
20 'Dooko OPI ka'da losi'bai su lori be te märi. 21 Ago mejitate makye: “Lidri kwoi kayi ikyi e'di oyeya?”
Nda zatadrite ekye: “Kwoi ni koyii se kepere Yuda be se 'ba 'diaza eŋgadri kote 'do owo. Lidri kwoi ikyiyite turi osone ànya ya, ago koyii tu'dei se kepereyi Yuda be 'do ogane vuru.”