'Bädri'ba ka Aro'boya Oye Lu ri ta Ŋgaopeṛe rota
1 Nyäräṛu OPI gaga'ba maro,
nda ka ma emba ni ta kyila rota
ago kani ma ede ta kyilaoye rota.
2 Nda orivoya gaga'ba maro ago voondre'ba maro,
mbaravo maro ago opa'ba maro,
gaga'ba maro ago ma ruopa ndra.
Nda kani tu'dei apebeṛe ezina ma zele.
3 OPI, lidri e'di yi miri ta ndaro otine;
ago miri ta ndaro usune ya?
4 Lidri orivoya oso lawa ronye;
u'dui ndaro laba orivoya
oso lindri kabe ugu lävu 'do ronye.
5 Äye OPI, miwa vokuru uŋbo, ago nyikyi vuru;
mido 'bereŋwai, ànya kolofoyi kätu robe.
6 Nyezo leko sionyi 'bu ro ro kepere kyila'baazii miro robe;
mi'bo ätu miro ago mi'ba ànya kuguyi umu.
7 Nyefo vuru ni kurusi,
nyewe ago mipa ma ni gyi ociekye yasi,
mipa ma ni mbara atrai ro yasi,
8 se itiyi taŋgye ko
ago kayi kowe oga ruäṛu si.
9 Maŋgona loŋgo to'di 'da miri, Äye Lu;
ma'bina kudi iba si 'da miri.
10 Mise nya mbara ozo ni 'bädri'bai ri
ago mipa Dawidi ruindu'ba miro te.
11 Mipa ma ni kyila'baazii maro siomba be risi;
mipa ma ni mbara atrai ro yasi,
se itiyi taŋgye ko
ago kayi koweoga ruäṛu si.
12 Mi'ba ŋgwàagoro amaro agoànji ànyaro si
kadoyi oso ŋgakyi'dikyi'dii se konde omba te ronye,
ago ndiriŋwa amaro ka'do
oso läŋgyiri se itirabe cukui zo'desi roya ronye.
13 Mi'ba kyiroi amaro ogane twi,
ŋga owaowaro dritoto rosi.
Mi'ba timele amaro lowo amaro yasi
utine kutu ro ago kutu 'bute ro.
14 Mi'ba tii amaro kilitiyi lowaro
teinye rriti utiro ako kode uje ako.
Mi'ba liyi rriti ro ka'do i'do
litiŋwà amaro yasi.
15 Tu'dei se äṛuna be nonye ni kado
lidri se Lu nayi ni OPI orivoya ni kado!