Räṛu ta Yekalu rota
1 OPI, Miyi ta Dawidi ro
ndi rriti se cini nda kiŋgyite be.
2 Miyi tao'ba se nda ko'babe mi OPI ri tana,
ruäṛu se nda käṛurube mi, Lu Mbaraekye Yakoba ro ri se ekye:
3 “Märi oyine 'bäru kode oyine u'dune i'do;
4 märi mi maro osene ago u'dune i'do,
5 madale musuna vo aza ndi lutu OPI ri,
'ba ro Lu Mbaraekye Yakoba ro ri.”
6 Mèri ta Sänduku Tao'baro ro teni Beteleme ya,
ago mùsu anya te lowo Jearima roya.
7 Màtate makye: “Mì'de moyi zo OPI roya;
mì'de mä̀mätu kotopa giti ndaro ro kandra.”
8 Nyikyi zo loliro miro ya OPI, nyikyi Sänduku Tao'baro.
Taka'daro mbara miro robe.
9 Mi'ba kohanii miro koyeyi tase ŋgye ayani;
ago mi'ba lidri miro koyeyi kporo riyäsi!
10 Ta tao'ba miro ruindu'ba miro Dawidi ri rota;
miga 'bädri'ba onjionji miro ko zo.
11 Mi OPI mi'ba tao'ba lämu'duro te Dawidi ri,
tao'ba se migo miruna ko kovole, se mikye:
“Ma'bana ŋgwàagoro alo aza miro 'da 'bädri'ba ro mi vosi,
12 Ondro ŋgwàagoro miro kätiyi tao'baro maro
ndi tase marabe ànyari be te
'dooko ŋgwàagoro ànyaro, orinayi kpa, vo miro ya 'bädri'bai ro tu cini si.”
13 OPI nji Zaiona te;
nda le anya a'done 'ba ndaro ro:
14 “Ono ni lolivo maro äduako;
vose malebe orine kigye ni no.
15 Mäṛuna Zaiona 'da ŋgadriamba si;
ma'bana ŋgaonya ojona ati'bai anyaro 'da.
16 Mäṛuna kohanii anyaro 'da,
ago lidri anyaro oyenayi kporo 'da riyä si.
17 Ma'bana zelevoi Dawidi ro alona 'da 'bädri'ba mbaraekye ro noŋwa;
mätina miri 'bädri'ba onjionji maro ro 'da oso leko lamba ro ronye.
18 Ma'bana driupi 'da kyila'baazii ndaro dri,
oko miri 'bädri'ba ndaro ro a'dona 'da kandrakado be.”