OPI Räṛu
1 Nyäräṛu OPI!
Mayena aro'boya 'da OPI ri ya cini maro si
kalaombi lidri 'diri ndaro roya.
2 Ŋgase nyabe oyena orivoya liŋgyiekye OPI!
vonai se cini yai'dwesi tana ro leyi ànya tenyine.
3 Ŋgase cini nda kabe oyena orivoya orooro ro ago orivoya 'desipara;
ago taŋgye ndaro orivoya äduako.
4 Nda 'ba taoye liŋgyiekye ndaro kote tana ijene;
OPI orivoya yai'dwe be ago yauni amba be.
5 Nda kani ŋgaonya ozo ànya se kayibe nda oro ri;
nda yi tao'baro ndaro tana te äduako.
6 Nda ka'da mbara ndaro te lidri ndaro ri
ugu warii 'diatraro ro ozona si ànyari.
7 Ŋgase cini nda kabe oyena ya nda orivoya 'diri ago ŋgye;
otà cini ndaro orivoya 'diätiro,
8 ago a'bate orine äduako,
ozo ànya te ta 'diri si ago ŋgyero.
9 Nda 'ba lidri ndaro te dritairo
ago 'ba tao'baro äduako ndaro te ànya be.
Nda orivoya alokado ago mbaraekye.
10 OPI oro ni etovo tavouni ro yi,
ànya se cini kayibe atà ndaro oro orivoya tauni kado be.
Be ṛo nda räṛune äduako.